د ايما سمپسن رپورټ په مسکوکې د بي بي سي خبرياله

	د تيلو لوړو بيو د روسي پيسې روبل ارزښت لوړ کړى دى .

نړيوال بانک وايي دغه چاره د روسيې اقتصاد ودې ته زيان رسوي .

د نړيوال بانک په يوۀ وروستي رپورټ کې راغلي دي چې د روسيې ځيني صنعتونه د روبلو د لوړې شوې بيې له امله له ستونزو سره مخامخ دي .

د تيلو د لوړو بيو له امله روسيې ته ديرې پيسې راماتې دي . خو دغه پيسې د روبلو ارزښت زياتوي او د روسيې پر اقتصاد اغيز کوي .

د روسيې توليد د نړۍ د نورو کم بيه توليداتو په وړاندې سيالي نه شي کولى . د نړيوال بانک رپورټ ښيي چې د روسيې له ١٣ سترو صنعتونو څخه اته د روان کال په لومړنيو نهو مياشتو کې وده نه ده کړې .

نړيوال بانک وايي له لويه سره د روسيې اقتصاد پياوړى دى . خو اقتصاد پوهان ډاريږي چې د تيلو ډيرې شوې پيسې ښايي پرې بد اغيز ولري .

داسې اټکل دى چې د روسي حکومت احتياطي صندوق چې د بدې ورځې لپاره پکې پيسې اېښودل شوې وي د تيلو د لوړو بيو له امله ښايي د روان ميلادي کال تر پايه ٥٢ ميلياردو ډالرو ته ورسيږي .