د طالبانو له نسکوريدو راهيسته دا پر نړيوالو سوله ساتو ځواکونو باندې لومړنى بريد دى چې په مزار شريف کې ترسره کيږي .

دغه بريد د مزار شريف په زړۀ کې هغه وخت ترسره شو چې سوله ساتي برتانيوي سرتيري پر گزمې بوخت وو .

دا لومړى ځل دى چې په مزار شريف او يا له لويه سره د افغانستان په شمال کې پر سوله ساتو نړيوالو ځواکونو دغه ډول بريد کيږي .

د بلخ ولايت پوليس وايي بريد کوونکى او له هغۀ سره په تړاو يې درې تنه نور نيولي دي .

پوليس وايي لا تر اوسه نه پوهيږي چې دغه کس څوک دى او ولې يې دغه بريد کړى و خو دا يې څرگنده کړې ده چې بريد کوونکي د پاکستان په يوې مدرسې کې پخوا زده کړې کړې وې .

ټپي شوي برتانيوي سرتيري روغتون ته رسول شوي دي .