د بلخ په ولايت کې په سلگونو برتانوي سرتيري د امنيت تينگولو په برخه کې مرسته کوي .

تر دې وړاندې لومړنيو رپورټونو ښووله چې د يوۀ وسله وال کس له خوا په ترسره شوي بريد کې څلور سرتيري ټپيان شوي دي .

دا د افغانستان په شمالي ولايتونو کې د نړيوالو سوله ساتو ځواکونو پر ضد د خپل ډول لومړنى بريد دى .

د بلخ ولايت پوليس وايي دوى بريد کوونکى نيولى دى او اوس ورڅخه پوښتنې گروېږنې روانې دي .

په يوۀ بل خبر کې په افغانستان کې د امريکا د پوځ قومانده وايي د خپل يوۀ سرتيري د وژلو خبر ورکوي .

په يوۀ بيان کې ويل شوي چې د دوى سرتيرى د افغانستان په ختيځ کې ټپي شوى و خو د باگرام په هوايي اډې کې يې چې د درملنې لپاره وروستل شوى و ساه ورکړه .