د انډريو واکر رپورټ ( د اقتصادي مسايلو لپاره د بي بي سي خبريال )

	د چين اقتصادي کالنۍ وده په سلو کې ٩ ده چې له تيرو دوو لسيزو د کميدو نخښې نه ښکاروي .

د اقتصادي همکارۍ او پرمختيا د ټولنې ترمخه چين ښايي په راتلونکو پنځو کلونو کې د نړۍ تر ټولو ستر صادرونکى هيواد شي .

پر چين باندې په خپل لومړني رپورټ کې دغه ټولنه وايي تر ٢٠١٠ کال پورې ښايي د چينايي توکو او اسانتياو برخه د هيوادونو ترمنځ په سوداگرۍ کې په سلو کې ١٠ ته ورسيږي .

چين د دغې ټولنې غړى هيواد نه دى .

رپورټ وايي چې د چين چټکه اقتصادي وده د ورو کيدو کومه نخښه نه ښيي . په تيرو دوو لسيزو کې چين هر کال په سلو کې نهه وده لرلې ده .

رپورټ وايي په راتلونکو پنځو کلونو کې به نړۍ ته د يوۀ صادرونکي هيواد په توگه چين تر متحدو ايالاتو او جرمني وړاندې شي .

د اقتصادي همکارۍ او پرمختيا ټولنه وايي د چين په وده کې خصوصي سيکتور مهمه ونډه لرلې ده . دا د چين له لورې د خپلې تگلارې په بدلولو کې يو مخيز بدلون دى .

اوس په اغيزمن اقتصادي فعاليت کې د بازار ځواک ډير پياوړى رول لري .
رپورټ وايي د چين تر نيمايي ډير توليد خصوصي سيکتور کوي . همدا برخه د نويو کارونو د پيدا کولو چاره پر مخ بيايي .

په ٢٠١٠ کال کې به چين تر امريکا او جرمني ډير صادرات لري .

خو له دې ټولو خبرو سره سره رپورټ يادونه کوي چې په چين کې لا هم د سوداگرۍ په قوانينو کې اصلاحاتو ته اړتيا شته . دغه راز د شتمنۍ د لرلو حقونه هم بايد ښه شي .

رپورټ وايي لا تر اوسه دولتي سيکتور ډير لوى دى او تر ډيره سرچينې ضايع کوي .

د بانکي سيکتور د اصلاح لپاره هم رپورټ وړانديزونه کوي او وايي چې د چين بانکونو ته د لويو پورونو ميراث پاتې دى چې پرې شوي نه دي .