مشرف وايي له هندي لومړي وزير سره به په نيويارک کې ويني .

د پاکستان ولسمشر پرويز مشر يو وار بيا خپله هيله څرگنده کړې ده چې هند و پاکستان به د کشمير د لانجمن ايالت په سر په خپلو کې په داسې حال کې جوړ جاړي ته ورسيږي چې د دغو دواړو هيوادونو مشران لا د واک په گدۍ ناست وي .

ايسوسييټيد پريس خبري اژانس ته د دۀ دا خبرې تر هغه څو ورځې وړاندې راغلي چې دى به د هند له لومړي وزير منموهن سنگ سره په نيويارک کې د ملگرو ملتونو د عمومي اسامبلۍ د غونډې په پايڅوړ کې ويني .

په اسلام اباد کې د بي بي سي يو خبريال وايي دا د ولسمشر مشرف له خوا د مثبتو پيغامو د لړۍ يوه بله کړۍ ده .

په همدې ترڅ کې پاکستان اعلان کړى دى چې د دوشنبه په ورځ به دوى او هند د يو بل په زندانونو کې په سلگونو زندانيان خوشي کوي
بل پلو د پاکستان د حکومت مخالفو گوندونو له خوا هغې ملي کاربندۍ ته زړۀ ماتى ځواب ويلى شوى چې د تيرې مېاشتې د ښاروالۍ د ټاکنو پر ضد يې رابللى و .

حکومت مخالفي وايي چې په ټاکنو کې درغلي شوي او ولسمشر پرويز مشرف بايد استعفى ورکړي . د کراچۍ او کوټې په ښارونو کې هټۍ او سوداگريز مرکزونه تړلي وو .

خو په پلازمېنه اسلام اباد کې عادي حالت و .

د حکومت مخالفې ايتلاف متحده مجلس عمل مشر قاضي حسين احمد وويل دوى د کاربندۍ لپاره د خپل غږ له ځوابه خوښ دي . .

د پاکستان حکومت مخالفې ډلې د جنرال مشرف استعفى غواړي .

نورو حکومت مخالفو مشرانو هم دا خبره رد کړه چې گواکې کاربندي غلې وه .

په کوټه کې له کاربنديو سره په تړاو تر ٥٠ تنو ډير نيول شوي دي . شپږ کاله وړاندې چې ولسمشر پرويز مشرف په يوې کودتا کې واک ترلاسه کړ له هغې راهيسته دا لومړى ځل دى چې حکومت مخالفې ډلې سره يو ځاى شوې دي .