افغانستان د نړۍ تر ټولو وروسته پاتى او نيمگړى روزنيزنصاب لري

او د يوه سوکاله راتلونکي لپاره، زده کړې وکړي - د کابل په سپورتى لوبغالي کې له چارواکو سربيره په زرگونو زده کوونکو د معارف د ملي ورځې په غونډه کې برخه لرله.

افغانستان په داسې حال کې د معارف يا زده کړو ملي ورځ نمانځي چې، له يوې خوا په ميليونونو زده کوونکو ښوونځيو ته مخه کړې.

خو له بله اړخه د ملگرو ملتونو د سازمان په وينا، د نړۍ ترټولو وروسته پاتى او نيمگړى روزنيزنصاب لري.

د مجاهدينو د برياليتوب د ديارلسمې کاليزې تر پريډ يوه ورځ وروسته، د غوايي د مياشتې پر نهمې ورځ ولسمشر حامد کرزي، د ښوونې او روزنې وزير نورمحمد قرقين او گڼو نورو چارواکو له زرگونو زده کوونکو او ښوونکو سره يوځاى د غازي په سپورتي لوبغالي کې د زده کړې د ورځى درناوى وکړ.

ولسمشر حامدکرزي د زده کوونکو د ترانو تر اوريدلو او د نمايشي حرکاتو تر ليدلو وروسته، پر زده کوونکو غږ وکړ چې، زده کړو ته لومړيتوب ورکړي او د هيواد راتلونکى روښانه کړي.

د افغانستان د بشرى پرمختگ د لمړني ملي راپور له مخې، دا مهال څه باندى پنځه ميليونه ماشومان په افغانستان کې ښوونځيو ته ځي خو دغه شمېره د ټولو افغان ماشومانو په سلو کى ٥٤ برخه جوړوي.

د بلى خوا د نجونو زده کړو دوديزه ستونزه د هيواد په سويليزو سيمو کې لا هم ستر خنډ بلل کيږي، ځکه د راپور په ليکنه په ارزگان، هلمند او زابل ولايتونو کې په سلو کې تر پنځه اتيا ډيرې نجوني له زده کړو بې برخې دي.