م م وايي چې دا مهال په افغانستان کې د ماشومانو څخه په وسلوالو نښتو کې کار نه اخستل کيږي

د ملگرو ملتونو سرمنشي کوفي عنان پخپل راپور کې، افغانستان له دى کبله ستايلى چې، د دۀ په اند پکې په زرگونو کوچني وسله وال له پوځي ډلو څخه ملکي ژوند ته گرځول شوي دي .

افغانستان د نړۍ په بې وزلو او وروسته پاتي هېوادونو په ليکه کې ځاى لرې .

دغلته ډير ماشومان د ناروغيو ، خوارځواکۍ او نورو ناخوالو له کبله په کمکيني مري خو بيا هم د ځينو هڅو له برکته يې پرمختگ په نړيواله کچه ستايل کيږي.

د ملگرو ملتونو سرمنشي کوفي عنان د امنيت شورا ته په خپل يوۀ وروستي راپور کې په افغانستان کې د ٤٠٠٠ تنکيو وسلوالو مليشو په بې وسلې کولو خوښي څرگنده کړې او دا يې يو ستر پرمختگ بللى دى.

په کابل کې د ملگرو ملتونو د يوناما د مرستندويه ادارې وياندې ارين کوينټر د کوفي عنان د راپور د ځينو برخو د څرگندولو پر مهال وويل " دا مهال په افغانستان کې د ماشومانو څخه په وسلوالو نښتو کې کار نه اخستل کيږي"

له طالب جنگياليو سره په نښتو کې هم له ماشومانو څخه کار نه اخيستل کيږى د ملگرو ملتونو سرمنشي کوفي عنان

له دې سربيره د افغانستان په ملي پوځ کې هم د ماشومانو گمارنې راپورونه نه دي ورکړل شوي.

کوفي عنان د امنيت شورا د غړو څخه غوښتلي چې د هغو ډلو او واکمنيو پر خلاف سختې تگلارې پلي کړي چې په يو نه يو ډول د ماشومانو حقونه تر پښو لاندې کوي.

ښاغلي عنان په خپل راپور کې وژل او په وسلوالو ډلو کې په چارو گمارل، پر ښوونځيو او روغتونونو بريدونه، جنسي تيري او تښتونه او يرغمل نيونه هغه څرگند بريدونه پيژندلې چې د نړۍ پر بيلابيلو برخو کې پر ماشومانو کيږي.

عنان په افريقا او سويلي اسياکې١١ هېوادونه او پکې ٥٤ ډلې د ماشومانو د حقونو سرغړونکي نومولي دي.