د اسامه بن لادن د نيولو لپاره تر ټولو ډيرې پيسې اعلان شوي دي

يوې پاکستانۍ ورځپاڼې د متحدو ايالاتو د عدليې د وزارت اعلان خپور کړى دى چې د القاعدې د مشر اسامه بن لادن او د طالبانو دغورځنگ د مشر ملا محمد عمر د نيولو په بدل کې د انعام يادونه کړې ده .

متحدو ايالاتو ان هغه مهال د داسې انعامونو خبره کوله چې د طالبانو حکومت يې په افغانستان کې ونړاوۀ خو دا لوموى ځل دى چې په يوې پاکستانۍ ورځپاڼې کې داسې اعلان خپروي .

په پاکستان کې ځينې ورځپاڼه ليکونکي دا اعلان د دې څرگندويه بولي چې گواکې واشنگټن د القاعدې او طالبانو مشران په پاکستان کې پټ شوي بولي .

د ورځپاڼې په اعلان کې د ١٤ کسانو نومونه راغلي دي . اعلان وايي چې د هغوى د نيولو لپاره د معلوماتو سپارونکي ته به په ميليونونه ډالره د انعام په توگه ورکوي .

په دغو کسانو کې يوازې ملا محمد عمر افغان دى پاتې کسان د القاعدې بهرني غړي دي . د اعلان په پاى کې د اسلام اباد او واشنگټن ځينې تيلې فوني شمېرې ورکړل شوي چې د معلوماتو لرونکي پرې له امريکايي چارواکو سره اړيکي ټينگې کړي .