يونس قانوني وايي دى پوځي کس نه دى

د افغانستان د اسلامي جمعيت پخوانى غړى او دملي غورځنگ له لورې د ولسمشرۍ په ټاکنو کې کانديد يونس قانوني وايي دى د ولسمشر کرزي د نوي حکومت ملاتړ کوي .

يونس قانوني وايي که څه هم د اوسنۍ کابينې له جوړښته پرته بله چاره نه وه خو دغه وزيران به هاله مشروعيت ومومي چې له ولسي جرگې هم تاييد شي . دۀ زياته کړه چې په دغې کابينې کې ځينې نيمگړتياوې هم وې .

ښاغلى قانوني ادعا کوي له دۀ غوښتل شوي و چې د دفاع د وزير په توگه کار وکړي خو دۀ دغه غوښتنه ځکه ونه منله چې خپله پوځي کس نه دى .

د ولسمشرۍ دغۀ کانديد چې تر ولسمشر کرزي وروسته يې په ټاکنو کې تر ټولو ډيرې رايې گټلې وې زياته کړې چې دى د يوۀ پراخ او ملي گوند په جوړولو له دولته دباندې فعاليت غواړي .

په ١٠ ورځو کې به نوى گوند جوړ کړم چې ښايي د نوي افغانستان گوند ونوميږي . يونس قانوني

ښاغلي قانوني په کابل کې خبريالانو ته وويل دى به په راتلونکو ١٠ ورځو کې د يوۀ نوي گوند د فعاليتونو د پيل خبر ورکړي .

دۀ وويل د دغۀ نوي گوند پر نوم يې لا پريکړه نه ده کړې خو ښايي د نوي افغانستان گوند به يې ونوموي .

پر نوې کابينې باندې د ښاغلي قانوني نيوکه دا وه چې د ځينو ولايتونو دوه کسان پکې ځاى شوي حال دا چې د نورو بيا يو کس هم نشته .

د طالبانو د حکومت تر نسکوريدو وروسته د ولسمشر کرزي په حکومت يوه نيوکه دا وه چې د يوې ولسوالۍ چې وروسته ولايت شو گڼ کسان په کابينه کې ځاى شوي دي . دغه ولايت د پنجشير دى چې د ښاغلي قانوني پلارنى ټاټوبى دى .