قطر وايي له موږ سره خیانت شوی

ژوندی پوښښ

1. ۲۰ وږی ۱۴۰۴ - ۱۱ سپتمبر ۲۰۲۵قطر وايي له موږ سره خیانت شوی

   

   د عکس سرچینه، Getty Images

   قطر د پنجشنبې په سهار وختي په سخته ژبه یوه بیان کې د نتنیاهو څرګندونې وغندلې چې هغه پکې د حماس د دفتر د شتون په اړه خبرې کړې وې او دغه څرګندونې یې "بې‌پروا" بللې.

   د قطر لومړي وزیر محمد بن عبدالرحمن آل ثاني وویل: "زه داسې خبرې نه شم موندلی چې زموږ د غوسې کچه وښيي. دا د دولت ترهګري ده. موږ سره خیانت شوی."

   قطر څرګنده کړه چې "نتنیاهو هڅه کوي د ثبات او سولې هره موکه له منځه یوسي"، دا وروسته له هغه چې هغه په دوحه کې د حماس پر مشرانو "ښکاره برید" وکړ.

   قطر زیاته کړه "ټولو ته ښکاره خبره ده" چې د قطر چارواکي د حماس له مشرانو سره لیده کاته کوي، د هغه رول په چوکاټ کې چې قطر یې د منځني ختیځ د روانې شخړې د منځګړي په توګه لوبوي.

   دوحې روښانه کړه چې "د دې غونډې په اړه هر څه د اسرائیلیانو او امریکایانو لپاره ښه معلوم دي، دا داسې څه نه دي چې موږ یې پټ کړو.. هېڅ دلیل نشته چې دا د ترهګرۍ ته پنا ورکول وګڼل شي."

2. ۲۰ وږی ۱۴۰۴ - ۱۱ سپتمبر ۲۰۲۵پر دوحې تر برید وروسته له قطر سره د اسرائيل اړیکې په ناڅرګند وضعیت کې دي او اسرائيلو په یمن کې پر حوثیانو هم بریدونه کړي

   

   د عکس سرچینه، Getty Images

   په داسې حال کې چې پر قطر د اسرائيلو برید باندې تر ۲۴ ساعتونو ډېر وخت اوړي، دې پېښې ته غبرګونونه لا هم روان دي او تر دې دمه د ځینو مهمو خبرونو لنډیز په دې ډول دی:

   د اسرائيل ولسمشر اسحاق هرزوګپر دوحې د اسرائيل برید په دفاع کې حماس ته په اشاره ویلي چې څوک هوکړه نه کوي، "باید ایسته کړل شي". اسرائيل ویلي چې په دغه برید کې یې د حماس لوړپوړه چارواکي‌ په نښه کړي خو حماس وايي چې مشرانو ته یې زیان نه دی اوښتی.

   د ملګرو ملتونو امنیت شورا خپله غونډه ځنډولې چې د قطر لومړی وزیر هم ګډون پکې وکړای شي. اسحاق هرزوګ په لندن کې د بریتانیا له لومړي وزیر کېیر سټارمر سره د فسلطین رسمیت پېژندنې په هکله هم غږېدلی دی. ښاغلی هرزوګ ویلي، "موږ په دې باور لرو چې د فلسطیني دولت په اړه یو اړخیزه پرېکړه به پر هر راز راتلونکي بهیر منفي اغېز ولري ځکه چې دا به خطرناکه وي." کېیر سټارمر دا برید غندلی او مخکې یې په رسیمت د فلسطین د پېژندلو احتمال هم یاد کړی.

   اسرائيل تر قطر وروسته دا ځل تازه په یمن کې پر حوثیانو برید کړی دی. رویټرز او فرانس پرېس خبري اژانسونو په یمن کې د حوثیانو تر کنټرول لاندې روغتیا وزارت له قوله ویلي چې هلته د اسرائيل په برید کې د وژل شوو شمېر ۳۵ ته رسېدلی دی. په وینا یې، په دغه برید کې ۱۳۱ کسان ژوبل شوي دي. حوثیانو ویلي چې په وژل شوو کې خبریالان هم شامل دي.

   قطر ویلي چې په دوحه کې د اسرائیل د هوايي برید پر وړاندې خپل د غبرګون حق خوندي ساتي او روښانه کړې یې ده چې له نړیوال قانونه د اسرائیلي لومړي وزیر بنیامین نتنیاهو پر وړاندې د قضايي تعقیب چارې یې پیل کړې دي.

   د امریکا ولسمشر ډونلډ ټرمپ پر دوحه د اسرائيلو د بريد په ځواب کې ويلي، قطر د امريکا يو ډېر پياوړی متحد او ملګری دی او د دې پېښې له امله یې خواشیني ښودلې ده.

   د طالبانو حکومت په يوه اعلاميه کې پر قطر د اسرائیلو بريد تېری بللی او د حماس د سياسي دفتر په نښه کول يې غندلي دي.

3. ۲۰ وږی ۱۴۰۴ - ۱۱ سپتمبر ۲۰۲۵, اسرائيلو پر یمن د برید پخلی کړی

   Play video, "Israel confirms strikes on Yemen", موده 0,32

   00:32

   

4. ۲۰ وږی ۱۴۰۴ - ۱۱ سپتمبر ۲۰۲۵اسرائيل په یمن کې پر حوثیانو برید کړی چې "۳۵ تنه پکې وژل شوي دي"

   

   د عکس سرچینه، Reuters

   اسرائيل تر قطر وروسته دا ځل تازه په یمن کې پر حوثیانو برید کړی دی. رویټرز او فرانس پرېس خبري اژانسونو په یمن کې د حوثیانو تر کنټرول لاندې روغتیا وزارت له قوله ویلي چې هلته د اسرائيل په برید کې د وژل شوو شمېر ۳۵ ته رسېدلی دی.

   په وینا یې، په دغه برید کې ۱۳۱ کسان ژوبل شوي دي.

   اسرائيل وايي چې په دغه برید کې یې پوځي کمپونه، د حوثیانو رسنیز مرکزونه او د تېلو زېرمې په نښه کړې دي خو حوثیان بیا وايي چې د دوو ورځپاڼو شرکتونو په ګډون ملکي ځایونه پکې په نښه شوي دي.

   اسرائيلو ویلي چې دغه بریدونه یې د حوثیانو له لوري پر دوی د توغندیزو او ډرون بریدونو په غبرګون کې کړي دي.

   "په وژل شوو کې خبریالان هم شته"

   په همدې حال کې د حوثیانو د پوځ ویاند ویلي چې په وژل شوو کې د دې ډلې لپاره کارکوونکي خبریالان هم شته.

   تېره میاشت هم اسرائيلو په یوه برید کې د حوثیانو څو لوړپوړه غړي وژلي وو چې د دوی د ځان‌بولي دولت لومړی وزیر هم پکې شامل و.

   د روان میلادي کال په پیل کې د غزې اوربند پر مهال د دواړو لورو تر منځ په جګړه کې یو څه وقفه راغلې وه خو چې اوربند مات شو نو تر منځ یې بېرته تاوتریخوالی پيل شو.

   اسرائيل پر یمن دا تازه برید داسې مهال کوي چې تېره ورځ یې د قطر په دوحه کې هم پر یوې ودانۍ برید وکړ او ویې ویل چې د حماس مشران یې په نښه کړي دي. خو حماس ویلي چې په دغه برید کې یې مشرانو ته زیان نه دی اوښتی.

5. ۱۹ وږی ۱۴۰۴ - ۱۰ سپتمبر ۲۰۲۵وروستی, د اسرائيل ولسمشر پر قطر د برید دفاع کې ویلي، څوک چې هوکړه نه کوي باید "ایسته کړل شي"

   

   د عکس سرچینه، PA Media

   د اسرائيل ولسمشر اسحاق هرزوګ پر قطر د اسرائيلو د برید دفاع کړې ده او ویلي یې دي چې ځينې وختونه د دې اړتیا وي چې هغه کسان "ایسته کړل شي" چې هوکړه نه کوي.

   هغه نن چهارشنبه په لندن کې د بریتانیا له لومړي وزیر کېیر سټارمر سره هم لیدلي دي.

   ښاغلي هرزوګ ویلي چې که څه هم دا د دوو متحدانو تر منځ ناسته وه خو ویلي یې دي چې تر منځ‌ یې خبرې "سپینې" او "سختې" وې.

   د اسرائيل ولسمشر ویلي چې له کېیر سټارمر سره د فسلطین رسمیت پېژندنې په هکله د هغه پر دریځ هم غږېدلی دی. ښاغلی هرزوګ ویلي، "موږ په دې باور لرو چې د فلسطیني دولت په اړه یو اړخیزه پرېکړه به پر هر راز راتلونکي بهیر منفي اغېز ولري ځکه چې دا به خطرناکه وي."

   د یادولو ده چې د بریتانیا لومړي وزیر پر قطر د اسرائيل برید غندلی. مخکې کېیر سټارمر ویلي وو چې که اسرائیل د غزې د ناوریني وضعیت د پای ته رسولو لپاره مهم ګامونه پورته نه کړي نو هېواد به یې په سپتمبر میاشت کې فلسطین په رسمیت وپېژني.

   تر اوسه د کېیر سټارمر له دفتره په دې اړه کوم بیان یا غبرګون نه دی خپور شوی.

   د بریتانیا لومړي وزیر همدا راز ویلي وو چې اسرائیل باید نور شرایط هم ومني، لکه د اوربند موافقه او دا چې ملګرو ملتونو ته اجازه ورکړيچې بشري مرستې بېرته غزې ته ور پرېږدي.

   بریتانیا ویلي، که اسرائیل دا اقدامات ونه کړي نو دوی به د ملګرو ملتونو د عمومي اسامبلې په راتلونکې غونډه کې چې ټاکل شوې په روانه سپتمبر میاشت کې په نیویارک کې ترسره شي، د فلسطین د رسمیت پېژندنې لپاره ګام پورته کړي.

6. ۱۹ وږی ۱۴۰۴ - ۱۰ سپتمبر ۲۰۲۵وروستی, قطر کوم او د چا تر منځ د سولې تړونونه کړي دي؟

   

   قطر د هغه ډلې مهم غړی و چې مصر او امریکا یې هم برخه وو او دوی د ۲۰۲۵ کال په جنورۍ کې د اسرائیلو او حماس ترمنځ د اوربند منځګړیتوب وکړ.

   په ۲۰۲۰ کال کې قطر د طالبانو او امریکا ترمنځ د سولې تړون ته لار هواره کړه چې له مخې يې په افغانستان کې جګړه پای ته ورسېده، امریکايي ځواکونه له دغه هېواده ووتل او طالبان د ۲۰۲۱ کال د اګست پر ۱۵ بیا پرې واکمن شول.

   په ۲۰۱۰ کال کې قطر د یمن حکومت او حوثي یاغیانو ترمنځ د اوربند په رامنځ‌ته کولو باندې وتوانېد. خو وروسته دا تړون ناکام شو.

   قطر همداراز د افریقا په بېلابېلو شخړو کې د سولې منځګړی پاتې شوی دی. یوه بېلګه یې په ۲۰۲۲ کې د چاډ حکومت او لسګونو اپوزیسیون ډلو تر منځ د اوربند رامنځ‌ته کول وو.

   بله بېلګه یې د ۲۰۱۰ کال د سوډان حکومت او د دارفور د یاغي ډلو ترمنځ د سولې تړون دی.

   په ۲۰۰۸ کال کې قطر د لبنان د سیاسي ډلو ترمنځ د یوې هوکړې منځګړیتوب وکړ.

7. ۱۹ وږی ۱۴۰۴ - ۱۰ سپتمبر ۲۰۲۵قطر د نتنیاهو پرضد قضايي اقدام غواړي، اسرائیل وايي راتلونکی ځل به د حماس مشران ووژني

   

   د عکس سرچینه، EPA-EFE/REX/Shutterstock

   قطر ویلي دوحه کې د اسرائیل د هوايي برید پر وړاندې خپل د غبرګون حق خوندي ساتي او روښانه کړې یې ده چې له نړیوال قانون د اسرائیلي لومړي وزیر بنیامین نتنیاهو پر وړاندې د قضايي تعقیب چارې یې پیل کړې دي.

   قطري چارواکو وویل حکومت یوه قانوني ډله ګومارلې چې په دوحه کې د حماس د غړو د وژلو په هڅه کې چې اسرائیلي هوايي ځواکونو کړی، د نتنياهو پر وړاندې د قضایي تعقیب امکان وڅېړي.

   تېره ورځ په یوه خبري کنفرانس کې، د قطر لومړي وزیر دغه برید د "ترهګریز عمل" وباله چې د اسرائیلي لومړي وزیر په مشرتابه کې شوی او دا یې د قطر د ځمکنۍ بشپړتیا پر وړاندې یې سرغړونه وبلله.

   هغه ټینګار وکړ چې "قطر خپل د غبرګون حق خوندي ساتي او د هر ډول هغه بې‌پروا سرغړونې یا تېری پر وړاندې به ټینګ ګامونه پورته کړي‌ چې د هېواد امنیت او د سیمې ثبات ته ګواښ پېښوي."

   له کنفرانس وروسته خپور شوی بیان کې ویل شوي چې "د دې تېري په ځواب کې به ټول اړین ګامونه اوچت کړل شي" او قطر به د داسې کړنو د مخنیوي او د بیا پېښېدو د مخنیوي لپاره پر خپلو سیاستونو او کړنو بشپړه بیاکتنه وکړي.

8. ۱۹ وږی ۱۴۰۴ - ۱۰ سپتمبر ۲۰۲۵مسکو او بېجینګ قطر کې د اسرائیلو برید غندلی

   روسیې د چهارشنبې په ورځ په قطر کې د اسرائیلو بریدونه غندلي او دا یې یوه داسې"سرغړونه" وبلله چې د سولې هڅې زیانمنوي.

   د چین د بهرنیو چارو وزارت هم د چهارشنبې په ورځ په دوحه کې د اسرائیل بریدونه غندلي او د قطر د ځمکنۍ بشپړتیا پر وړاندې یې سرغړونه بللې ده.

   چین دا بریدونه او د منځني ختیځ په اړه د ځینو بهرنیو ځواکونو "نامتوازن دریځ" سره تړلي وبلل، چې څرګنده اشاره یې متحده ایالاتو ته وه.

   د چین د بهرنیو چارو وزارت وویل، بېجینګ له دې بریدونو د زیږنده احتمالي تاوتریخوالي په اړه ژوره اندېښنه لري.

   

   د عکس سرچینه، Getty Images

9. ۱۹ وږی ۱۴۰۴ - ۱۰ سپتمبر ۲۰۲۵جنیوا کې د قطر استازې: "نړیوال دې د اسرائیل د وحشیانه کړنو مخه ونیسي"

   

   د عکس سرچینه، mofa.gov.qa

   جنیوا کې د قطر دایمي استازې ډاکټرې هند عبد الرحمن المفتاح د بشر حقونو عالي کمېشنر د بحث پرمهال پر دوحه د اسرائيیل برید یو جنایت او له نړیوالو قوانینو او دودونو ښکاره سرغړونه او د قطر او د قطریانو د خوندیتوب او امن پر وړاندې یو خطرناک ګواښ بللی دی.

   اغلې المفتاح وویل، د بشر حقونو دغې ۶۰مې ناستې ته وویل، "اسرائیل په غزه کې پر وحشيانه بمباریو،‌ د بنسټیزو جوړښتونو او کورونو پر ‌پراخې ویجاړۍ، د خلکو په سختو وږي کولو، د ملکیانو، خبریالانو او بشري کارمنانو په قصدي وژنې، په جبري ډول د خلکو کډه کولو او د ټولې سیمې د نیولو پر پلانونو عملي کولو بسنه نه ده کړې،‌ بلکې له نړیوالو قوانینو یې پښې اړولې دي او د نړیوالې محکمې د حکمونو ښکاره سرغړونه یې کړې ده."

   نوموړې وویل، "تاریخ هر څه ثبتوي او ټول هېوادونه باید له ځانه وپوښتي چې څنګه به خپل دریځ او د دې نسل‌وژنې د ودې د ناتوانۍ دلیل راتلونکو نسلونو ته تشریح کړي."

   ډاکټر المفتاح له نړیوالې ټولنې وغوښتل چې ژر تر ژره لاس په کار شي او اسرائیل اړ کړي چې "اشغال پای ته ورسوي، خپلې جنایتي او جدي سرغړونې ودروي، ټول مسؤلین یې محاکمه شي او د ۱۹۶۷مې د حدودو پر بنسټ د فلسطین خپلواک نړیوال دولت د جوړېدو ملاتړ وکړي، چې ختیځ بیت‌المقدس به یې پلازمېنه وي".

   دې X پوسټ نه تېرشئ

   ایا له X نه د منځپانګې اجازه شته؟

   دې لیکنه کې له social media راخیستل شوي مواد شته.‌ له ښودلو وړاندې یې ستاسې اجازه پکار ده، ځکه ښایي‌کوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ

   Accept and continue

   خبرداری: بي بي سي د بهرنیو وېبپاڼو د منځپانګې مسؤله نه ده

   د ‍پوسټ X پای

10. ۱۹ وږی ۱۴۰۴ - ۱۰ سپتمبر ۲۰۲۵

    

    اسرائیل وړاندې په لبنان، سوریه او ایران کې د حماس مشران په نښه کړي دي.

11. ۱۹ وږی ۱۴۰۴ - ۱۰ سپتمبر ۲۰۲۵ملګرو ملتونو کې د اسرائیل استازی: د اسرائیلو برید پر قطر برید نه و

    

    د عکس سرچینه، Spencer Platt/Getty Images

    په ملګرو ملتونو کې د اسرائیل سفیر د چارشنبې په ورځ دوحه کې د حماس د مشرانو پر ضد د برید ننګه وکړه او دا یې "سمه پرېکړه" وبلله. نوموړي دا څرګندونې وروسته له هغه کړې چې د امریکا پر ملګري هېواد دغه برید بېلابېل غبرګونونه راپارولي او ولسمشر ټرمپ هم کمیابه نیوکه کړې ده.

    په ملګرو ملتونو کې د اسرائیل سفیر د چارشنبې په ورځ د برید پرېکړه داسې توجیه کړه: "موږ تل د امریکا د ګټو پر بنسټ عمل نه کوو."

    هغه ۱۰۳ اېف‌اېم راډیو ته وویل: دا برید "پر قطر نه و، بلکې پر حماس و. موږ د قطر یا بل عربي هېواد پرضد نه یو، موږ اوس مهال د یوې ترهګرې ډلې پر وړاندې ولاړ یو."

    داني دانون زیاته کړه: "موږ تل له امریکا سره همغږي کوو، هغوی موږ ته لوی ملاتړ راکوي او موږ یې قدر کوو، خو ځینې وخت موږ پرېکړې کوو او امریکا ته یې خبر ورکوو." هغه همداراز وویل: "تر دې دمه د پایلې په اړه د نظر ورکولو وخت ډیر ژر دی، خو دا سمه پرېکړه ده."

12. ۱۹ وږی ۱۴۰۴ - ۱۰ سپتمبر ۲۰۲۵'وال سټریټ ژورنال' ورځپاڼه: له برید مخکې د حماس مشرانو ته مصر او ترکیې خبرداری ورکړی و

    

    د عکس سرچینه، Security Camera/Anadolu via Getty Images

    'وال سټریټ ژورنال' ورځپاڼې ویلي، دوحه کې د حماس پر مشرانو د اسرائیلو له برید څو اونۍ وړاندې د خپلو امنیتي تدابیرو د ټینګولو په اړه "یو سخت خو مبهم خبرداری" ورکړل شوی و.

    ورځپاڼې لیکلي: "مصري او ترکي چارواکو د حماس مشرانو ته ویلي وو: "د خپلو غونډو شاوخوا امنیتي تدابیر ټینګ کړئ."

13. ۱۹ وږی ۱۴۰۴ - ۱۰ سپتمبر ۲۰۲۵

    Play video, "CCTV captures moment of Israeli attack on Hamas leaders in Doha", موده 0,23

    00:23

    

14. ۱۹ وږی ۱۴۰۴ - ۱۰ سپتمبر ۲۰۲۵د حماس د مذاکراتي پلاوي مشر خلیل الحیة څوک دی؟

    

    د عکس سرچینه، AFP

    اسرائیلي پوځ وايي، د 'شاباک' استخباراتي ادارې د هوايي ځواک په مرسته یې د غزې په تړانګه کې د حماس د مشرانو پر ضد په دوحه کې"دقیق برید" کړی دی.

    د اعلامیې له مخې، هغه مشران چې ویشتل شوي، "له کلونو راهیسې د حماس د فعالیتونو له مهمو مسؤلینو ګڼل کېږي او د اکتوبر پر ۷مه د شوي وژونکي برید او د اسرائیلو پر ضد د پوځي عملیاتو مسؤلیت لري".

    پوځ ټینګار کړی چې "د ملکیانو د مرګ‌ژوبلې د مخنیوي لپاره یې اقدامات کړي، چې پکې دقیقې مهمات او اضافي استخباراتي معلومات د هدف ټاکلو لپاره کارول شوي".

    اسرائیلي چینل ۱۴ د یوه لوړپوړي اسرائیلي چارواکي له قوله ویلي، پوځ د حماس مشرتابه په دوحه کې په نښه کړي، چې پکې مخکښ مشر خلیل الحیة هم شامل دی.

    خلیل الحیة څوک دی؟

15. ۱۹ وږی ۱۴۰۴ - ۱۰ سپتمبر ۲۰۲۵وروستی, د قطر یو امنیتي ساتونکی وژل شوی

    د قطر د کورنیو چارو وزارت ویلي، پرون دوحه کې د حماس د مشرانو پر استوګنځای د اسرائيلو برید کې د قطر د کورنیو امنیتي ځواکونو یو غړی وژل شوی او نور ټپیان شوي دي.

16. ۱۹ وږی ۱۴۰۴ - ۱۰ سپتمبر ۲۰۲۵جاپان پر قطر د اسرائیلو برید غندلی دی

    

    د عکس سرچینه، ge

    جاپان، چې د امریکا متحد دی، د اسرائیلو د برید په غندلو یوه اعلامیه خپره کړې ده.

    د جاپان د وزيرانو شورا مشر يوشيمسا هياشي د چارشنبې په ورځ یوه اعلاميه کې ويلي، "د اسرائیلو لخوا دا برید یو داسې عمل دی چې ډیپلوماټیکو هڅو کې خنډ جوړوي، د قطر حاکمیت، امنیت او د سیمې ثبات ګواښوي. جاپان دا عمل په کلکه غندي،"

17. ۱۹ وږی ۱۴۰۴ - ۱۰ سپتمبر ۲۰۲۵د امنيتي کامرو له خوا ثبت شوې ويډيو کې د برید شېبه ښکاري

    Play video, "CCTV captures moment of Israeli attack on Hamas leaders in Doha", موده 0,23

    00:23

    

    د قطر پلازمېنه دوحه کې امنيتي کامرو هغه شېبه ثبت کړې چې اسرائيل دلته دوحه کې پر يوه ودانۍ بريد کوي.

    د حماس يوه چارواکي بي بي سي ته ويلي چې د دې ډلې د مذاکراتي ټيم غړي د يوې غونډې پر مهال په نښه شوي وو.

    د اسرائيلو دفاعي ځواکونه وايي دوی "کره بريد" ترسره کړی او هغه کسان په نښه شوي چې "د اکټوربر اوومې ظالمانه ګڼ وژنې مسئول" دي.

    قطر چې د اسرائيلو او حماس تر منځ د غير مستقيمو مذاکراتو منځګړيتوب کوي دا بريد له نړيوال قانون "ښکاره سرغړونه" بللې ده.

18. ۱۹ وږی ۱۴۰۴ - ۱۰ سپتمبر ۲۰۲۵ټرمپ وايي پر دوحه د اسرائيلو بريد له امله "خوشحاله نه دی": قطر یې د امریکا ’پياوړی متحد’ بللی

    

    د عکس سرچینه، Reuters

    د امریکا ولسمشر ډونلډ ټرمپ پر دوحه د اسرائيلو د بريد په ځواب کې ويلي، قطر د امريکا يو ډېر پياوړی متحد او ملګری دی او د دې پېښې له امله یې خواشیني ښودلې ده.

    ښاغلي ټرمپ د سې شنبې په ماښام وويل، "زه غواړم چې ټول يرغمل کسان خوشي شي، د مړو جسدونه ورکړل شي او دا جګړه همدا اوس پايته ورسېږي. ما د بريد په اړه له لومړي وزير نتنياهو سره خبرې وکړې، هغه وويل چې غواړي سوله وکړي. زه باور لرم چې دا بوږنوونکې پېښه د سولې لپاره يو فرصت کېدی شي."

    د امریکا ولسمشر زیاته کړه چې له بريدونو يو ساعت وروسته یې د قطر له امير او د هېواد له لومړي وزير سره خبرې وکړې او له امریکا سره د هغوی د "ملاتړ او ملګرتيا" يې ترې مننه وکړه.

    "ما دوی ته ډاډ ورکړ چې د قطر پر خاوره به بیا داسې څه هېڅکله ونشي."

    ښاغلي ټرمپ همدا ډول وويل چې لومړي وزير مارکو روبیو ته يې ويلي چې له قطر سره د "دفاعي همکارۍ تړون" بشپړ کړي.

    سپينې ماڼۍ مخکې ويلي وو چې ټرمپ د منځني ختیځ د چارو لپاره د خپل ځانګړي استازي سټيو وېټکاف له لارې قطر د اسرائيلو د شوني بريد په اړه خبر کړی و خو دا يې ومنله چې "ډېره ناوخته" شوې وه.

19. ۱۹ وږی ۱۴۰۴ - ۱۰ سپتمبر ۲۰۲۵پر دوحه د اسرائيلو بريد ته د طالبانو حکومت غبرګون

    

    د عکس سرچینه، Reuters

    د طالبانو حکومت په يوه اعلاميه کې پر قطر د اسرائیلو بريد تېری بللی او د حماس د سياسي دفتر په نښه کول يې غندلي دي.

    د طالبانو حکومت مرستيال وياند حمدالله فطرت پر اېکس د يوې اعلاميې په خپرولو سره ويلي، "په قطر هېواد تجاوز او بيا د حماس اسلامي غورځنګ سياسي دفتر په نښه کول په کلکو ټکو غندو او دا د ټولو انساني موازينو خلاف وحشيانه عمل بولو."

    په اعلاميه کې زياته شوې، "اسرائيل پرلپسې جنايات ترسره کوي خو پر وړاندې يې اغېزمن هېوادونه چوپ دي چې خورا د تاسف خبره ده".

    د طالبانو حکومت ويلي، "د هېوادونو د حريمونو درناوی دې وشي او په فلسطین کې په مظلومو مسلمانانو روان ناورین، وحشت او ظلم دې پايته ورسېږي."

20. ۱۹ وږی ۱۴۰۴ - ۱۰ سپتمبر ۲۰۲۵اردوغان: ترکیه په خپل ټول ځواک له قطر سره ده

    

    د عکس سرچینه، Getty Images

    د ترکیې ولسمشر رجب طیب اردوغان وايي د اسرائیلو له بريد وروسته انقره له "خپلو ټولو سرچينو" سره د قطر او د هغه د خلکو تر څنګ ودرېږي.

    د ترکیې د ولسمشرۍ دفتر له خوا خپره شوې اعلامیه کې ویل شوي چې ښاغلي اردوغان د قطر امیر شیخ تمیم بن حمد الثاني سره په تلیفوني اړیکه کې برید غندلی او دا یې د "په سیمه کې د شخړې، تاوتریخوالي او بې ثباتۍ د زیاتولو" هڅه بللې ده.

    دواړو مشرانو د برید پر وړاندې د "ګډو اقداماتو" په اړه بحث وکړ او موافقه یې کړې چې "په غزه کې د ټول وژنې د ژر پایته رسولو" لپاره خپلې همکارۍ ته دوام ورکړي.