د لویو ښارونو لپاره دغه ډول سافټ ویر ډېر ګټور دی
په امریکا کې ساینس پوهانو یو داسې سافټ وېر جوړ کړی، چې پر مټ یې د کوڅې، بازار او ان د کور د ککړ چاپېریال کچه معلومیږي.
د دغه سافټ وېر په اړه معلومات په چاپېریالی ساینس او ټکنالوژۍ نومي مجله کې چاپ شوي دي.
ماهرین وايي، د دغه سافټ وېر په وسیله به په ډېره اسانۍ معلومه شي، چې له کومه ځايه ډېر کاربن ډای اکسایډ ګاز تولیدیږي.
د اریزونا ایالت د پوهنتون ماهرینو دې سافټ وېر ته د هېسټیا نوم ورکړی دی.
د ماهرینو په خبره د دغه سافټ ویر په مټ به د هغې سیمې موندل ډېر اسان شي، چې چاپېریال يې تر بل هر ځای ډېر ککړ وي.
دوی وايي، چې د دې څېړنې لپاره یې څو ډوله ډیټا کارولې ده.
ماهرین وايي د دغه سافټ وېر په مرسته په هرهېواد کې هغه سیمه معلومول اسانیږي، چې چاپېریال یې ککړ وي او په دې توګه به په هغه سیمه کې د چاپېریال د ککړتیا د مخنیوي اقدامات کول اسان شي.
د ماهرینو په خبره د لویو ښارونو لپاره دغه ډول سافټ ویر ډېر ګټور دی، چې د نړۍ اکثر لوی ښارونه د ککړ چاپېریال له ستونزې سره مخامخ دي او د دې مسالې د حل لپاره په کې اقدامات کیږي.
ویل کیږي چې د دغه سافټ وېر په مرسته به نه یوازې د ککړ چاپېریال نه اغېزمنه سیمه په ګوته شي، بلکې د دې د اثر په اړه به هم ورڅخه معلومات تر لاسه کیږي.
