د جاپان فوجي غره ننداره ولې بنده شوه؟

فوجي غر، د جاپان يوه تر ټولو مشهوره نښه ده او تېرو څو کلونو کې یې پر ټولنيزو رسنيو انځورو اخيستو او خپراوي لا نور هم مشهور کړی دی، خو دې کار د فوجيکاوا ګوچيکو اوسېدونکو ته ستونزې جوړې کړې وې.

يو داسې ښارګوټی چې د غره په زړه پورې ننداره ترې کېږي او ميليونونه سيلانيان پرې ورمات وي. د دغه ښارګوټي اوسېدونکو اوس پتېيلې چې نور نو بس ده او د سېلفي انځورونو ګڼه ګوڼه دې بنده شي. دوی يو نادوده ګام ته مخه کړې، يوه لويه پرده یې راځړولې چې د غره نندارې مخه پرې ډب کړي. پر دې سر بېره چې د فوجي غره ننداره پرې بنده کړي، د دې پردې ځړولو موخه دا هم وه، چې لاره کې د خلکو ګرځېدو مخنيوی هم وکړي. د بي بي سي خبريالې شيما خليل پرې دا راپور رالېږلی دی.