هالنډ کې د افغانستان سفارت: کابل کې د طالبانو د بهرنیو چارو له وزارت سره "تعامل" لرو
د عکس سرچینه، Afghan Embassy Hague
په هالنډ کې د افغانستان سفارت ویلي، چې کابل کې د طالبانو حکومت کې د بهرنیو چارو له وزارت سره تعامله لري او په دې هېواد کې یې له مېشتو افغان وګړو غوښتي چې د اړتیاوو پوره کولو لپاره په عادي ډول دغه سفارت ته مراجعه وکړي.
دا دویم ځل دی چې د اروپايي ټولنې په یوه غړي هېواد کې د افغانستان سفارت په رسمي ډول په کابل کې د طالبانو د بهرنیو چارو له وزارت سره د تعامل اعلان کوي.
د تېر کال په قوس (لیندۍ) میاشت کې، د اروپايي ټولنې غړي هېواد چک جمهوریت کې د افغانستان سفارت اعلان وکړ چې "چک جمهوریت کې د افغان وګړو د خدماتو پخاطر" په کابل کې د طالبانو د بهرنیو چارو له وزارت سره (تعامل) لري.
اوس په هالنډ کې د افغانستان سفارت په خپل X (ټوېټر) کې یو بیان خپور کړی او لیکلي یې دي:
"په هالنډ کې د افغانستان سفارت خپلو ګرانو هېوادوالو ته خبر ورکوي چې دغه سفارت د دوی د ګران هېواد استازیتوب کوي او د ستونزو د حل او کونسلي خدمتونو د برابرولو په موخه خدمات د افغانستان د بهرنیو چارو وزارت (د طالبانو د بهرنیو چارو وزارت) سره اړیکه تعامل کې دی او د کونسلي اسنادو تصدیق لیکونه د معمول په څېر په کابل کې د بهرنیو چارو وزارت ته لېږل کېږي".
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د طالبانو د بهرنیو چارو وزارت مرستیال ویاند ضیاء احمد تکل هم په هالنډ کې د افغانستان سفارت دغه اعلامیه په خپل ایکس (ټوېټر) اکاونټ کې خپره کړې ده.
په کابل کې د طالبانو له واکمنۍ څه باندې دوه کاله تېر شول، خو تر اوسه هېڅ هېواد د طالبانو حکومت په رسمیت نه دی پېژندلی.
خو پاکستان، چین، ایران او روسیې په دغو هېوادونو کې د افغانستان سفارتونه د طالبانو استازو ته سپارلي دي، ځینو هېوادونو لکه ترکیې د طالبانو استازي په ټيټه کچه منلي، خو د نړۍ نور هېوادونه د افغانستان د پخواني حکومت د سفیرانو او دیپلوماتانو کوربانه دي.
په هالنډ کې د افغانستان سفیر اصف رحیمي د افغانستان په تېر حکومت کې د هرات والي او د کرنې وزیر و.
