ښاغلی یانکوبیش وايي، چې نړیواله ټولنه د راتلونکو ولسمشریزو تاکنو مالي ملاتړ کوي، خو ټینګار کوي چې ټاکنې باید په شفاف او عادلانه ډول ترسره شي.
داسې اندېښنې شته چې راتلونکې ولسمشریزې ټاکنې به د امنیت او نورو برخو کې له ډېرو ننګونو سره مخامخ وي. د افغانستان د ټاکنو خپلواک کمیسیون هم د تابعیت د نویو تذکرو نه وېشل کېدل، د رایه ورکوونکو د نوملړ نشتوالی او امنیتي ستونزې د راتلونکو ولسمشریزو ټاکنو په وړاندې ستر خنډونه بولي.
خو په افغانستان کې د ملګرو ملتونو د عمومي منشي استازی او د سلواکیا پخوانی دپلومات یان کوبېش وايي د ټاکنو په اړه د افغان ولسمشر حامد کرزي وروستیو څرګندونو او د دولتي ارګانونو وروستيو ګامونو دوی هیله مند کړي چې ولسمشریزې ټاکنې به په خپل وخت ترسره شي.
" د ټاکنو په اړه یو لړ پوښتنې شته خو زه ویلی شم چې د بیلابېلو وزارتونو او ملی شورا په ګډون د افغان دولت د اړونده ارګانونو ، مدني ټولنې او د سیاسي ډلو له خوا د پام وړ پاملرنې هڅولي یو"
یان کوبیش
د ده په وینا د افغان ولسمشر حامد کرزي وروستۍ څرګندونې چې ویلي و، ټاکنې به په خپل وخت سل په سلو کې ترسره کیږي د افغان دولت مشرتابه له خوا تر ټولو ستره سیاسي ژمنه ده.
د نوموړي په خبره" د ټاکنو په اړه یو لړ پوښتنې شته خو زه ویلی شم چې د بیلابېلو وزارتونو او ملی شورا په ګډون د افغان دولت د اړونده ارګانونو ، مدني ټولنې او د سیاسي ډلو له خوا د پام وړ پاملرنې هڅولي یو. د دغو هڅو پایلې هم وینو، د ټاکنو په اړه له نژدې دوه کلونو وړاندې ګورو چې د ولسمشریزو ټاکنو د ترسره کولو لپاره کوټلي ګامونو پورته کیږي."
ښاغلی یان کوبیش وايي، چې نړیواله ټولنه د راتلونکو ولسمشریزو تاکنو مالي ملاتړ کوي، خو ټینګار کوي چې ټاکنې باید په شفاف او عادلانه ډول ترسره شي. د نوموړي په وینا ملګري ملتونه له افغان حکومت سره د مشورې له لارې په ټاکنو کې د خپل مرستندویه رول د څرنګوالي په اړه خبرې کوي.
محدوده مرسته
د نوموړي په خبره " زه ویلی شم چې نړیواله ټولنه د مالي مرستې په ګډون د ټاکنو ملاتړ ته چمتو ده. دا مرسته نا محدوده نه ده ، خو د پام وړ به وي، او هدف به یې په ښه توګه د ټاکنو ترسره کیدل وي. زه فکر کوم چې نړیواله ټولنه به په دې برخه کې د افغانستان ښه ملاتړې وي."
افغان ځواکونو ته د امنیتي مسوولیتونو لېږد او راتلونکې ولسمشریزې ټاکنې په ۱۳۹۳ لمریز کال کې ترسره کیږي او یو شمېر سیاسي کړۍ اندېښنه ښیی چې افغان ځواکونه په یواځې نه شي کولی د ټاکنو امنیت وساتي.
خو افغان امنیتي ارګانونه ډاډ ښیي چې د ټاکنو پرمهال د امنیت ساتلو توان لري او د ټولټاکنو لپاره به زمینه برابره کړي، خو دې ژمنې ته د شک په سترګه کتل کیږي.
