ملگرو ملتونو د اولمپيک د تېرو لوبو پنځه تنه افغان لوبغاړي د سولې د استازو او سفيرانو په توگه غوره کړل.
په افغانستان کې د ملگرو ملتونو د سرمنشي ځانگړي استازي يان کوبيش، په خپل استول شوي غږيز او انځوريز پيغام کې ويلي دي چې افغان لوبغاړو په يوه اوونۍ کې د جنگ او ناندريو چاپيريال د لوبو په چاپيريال سره بدل کړ.
د نوموړي په وينا افغان لوبغاړو جوته کړه چې لاس ته راوړنې او پرمختگ د جگړې کرغېړڼه خوا بربنډولى شي.
ښاغلي کوبيش د خپل پيغام په وروستۍ برخه کې د تېر اولمپيک لوبغاړي سټيج ته وبلل او د ملگرو ملتونو له خوا ورته د سولې سپين بندونه پر لاسونو وتړل شول.
په افغانستان کې د سولې په ورځې پسې د سولې د اوونۍ په ترڅ کې ملگرو ملتونو د تېر اولمپيک پنځه تنه لوبغاړي د سولې د استازو او سفيرانو په توگه غوره کړل.
د ملگرو ملتونو د سرمنشي ځانگړي استازي يان کوبيش په يوۀ غږيز او انځوريز پيغام کې په دې اړه جوړې شوې غونډې ته وويل، دوى وکتل چې څنگه د يوې اوونۍ په ترڅ کې د جگړې فضا او چاپيريال د لوبو په چاپيريال بدل شو.
نوموړي وويل هغه مهال په افغانستان او ټوله نړۍ کې د هغو وياړنونو په اړه خبرې کېدې چې افغان لوبغاړو په اولمپيک او پارالمپيک کې خپل کړي وو.
د ښاغلي کوبيش په وينا په لوبو کې لاس ته راوړنې او پرمختگ د جگړې کرغېړڼه خوا بربنډولى شي.
هغه وويل د افغان لوبغاړو لاس ته راوړنو ټول افغان ملت ته دا احساس ورکړ چې بايد يو موټى و اوسي او د خپل هېواد، د نارينه وو او ښځينه لوبغاړو په زړورتوب او وړتياوو ووياړي.
"افغان لوبغاړو په يوه اوونۍ کې د جنگ او ناندريو چاپيريال د لوبو په چاپيريال سره بدل کړ."
د ملگرو ملتونو د سرمنشي ځانگړي استازي يان کوبيش وويل چې له همدې کبله ملگرو ملتونو دغه پنځه تنه لوبغاړي د سولې د سفيرانو او ساتازو په توگه وټاکل:
"موږ دلته په يونما کې هغوى ته په افغانستان کې او د افغانستان لپاره د سولې د رښتينو پيغام را وړونکو او سفيرانو په سترگه گورو او هغوى مو دلته رابللي چې زموږ د سولې سپين لاسبندونه او تسمې ومني. موږ له دوى او له هغه چا چې د سولې ملاتړ کوي هيله لرو چې دغه سپين لاس بندونه د سولې لپاره د ملي غږ په توگه وکاروي".
ښاغلي کوبيش د خپل پيغام په پاى کې د دغو پنځو تنو افغان لوبغاړو روح الله نيکپا، نثار احمد بهاوي، تهمينې کوهستانۍ، فهيم رحيمي او اجمل فيضي نومونه واخیستل او د لاس بندونو د تړلو لپاره يې د غونډې دریځ ته وبلل.
ښاغلي کوبيش په خپل غږيز او انځوريز پيغام کې وويل ملگري ملتونه هڅه کوي چې په افغانستان کې سوله په يوه رښتينولۍ بدله کړي.
نوموړي د خپلې خبرې د پخلي په موخه د ملگرو ملتونو د امنيت شورا هغه خبره بيا له سره کړه چې د تېرې ميلادي مياشتې پر ۱۸ يې ويلي وو، "هيڅ راز ترهگريزې کړنې په افغانستان کې د سولې، ولسواکۍ او ټيکاو بهير نه شي په شا کولاى".
هغه بهيرونه چې په وينا يې د افغانانو او نړيوالې ټولنې له خوا يې ملاتړ کيږي.
ښاغلي کوبيش افغانانو ته يو ځل بيا ډاډ ورکړ چې ملگري ملتونه به د دغو ټولو بهيرونو په ترڅ کې ورسره تر څنگ ولاړ وي.
