डाइनसोरः जीवावशेषबाट नयाँ प्रजातिको पहिचान, 'अस्ट्रेलियाको सबैभन्दा ठूलो'
तस्बिर स्रोत, QUEENSLAND MUSEUM
अस्ट्रेलियामा वैज्ञानिकहरूले सन् २००७ मा फेला परेको एउटा डाइनसोरलाई नयाँ प्रजातिका रूपमा वर्गीकरण गर्दै त्यो उक्त महादेशमा फेला परेको अहिलेसम्मकै सबैभन्दा ठूलो डाइनसोर भएको बताएका छन्।
अस्ट्रेलोटाइटन कूपरेन्सिस वैज्ञानिक नाम दिइएको ‘द सदर्न टाइटन’ पनि भनिने उक्त जीव विश्वमा फेला परेका १५ ठूला डाइनसोरमध्ये एउटा हो।
विज्ञहरूले उक्त डाइनसोर ६.५ मिटर अग्लो र ३० मिटरसम्म लामो भएको बताएका छन्। त्यसलाई बास्केटबल कोर्टसँग तुलना गरिएको छ।
त्यसका हड्डीहरू सबैभन्दा पहिले दक्षिणपश्चिमी क्वीन्सल्यान्डका खेतमा फेला परेका थिए।
तुलना
गत दशकमा जीवाश्म वैज्ञानिकहरूले उक्त डाइसोर पहिचान गर्न अनुसन्धान गरेका थिए।
त्यसका लागि उनीहरूले सोरपड र उक्त डाइनसोरका हड्डीको तुलना गरेका थिए।
भीमकाय शरीरका लागि चिनिने सोरपड शाकाहारी डाइनसोर हो।
तस्बिर स्रोत, QUEENSLAND MUSEUM
ती डाइनसोरको टाउको सानो, घाँटी लामो, पुच्छर लामो अनि खुट्टा मोटा खम्बाजस्ता हुन्थे।
झन्डै ९.२ देखि ९.६ करोड वर्षबीचको क्रिटेशस कालमा ती जीव महादेशभरि डुल्ने गर्थे।
पहिचानको लामो प्रक्रिया
कूपरक्रिक भन्ने ठाउँमा भेटिएका कारण अध्ययनकर्ताहरूले उक्त डाइनसोरलाई 'कूपर' नाम दिएका छन्।
हड्डीहरू दुर्गम ठाउँमा हुनु, तिनको आकार ठूलो र अवस्था कमलो भएकाले प्रजाति पहिचान गर्ने प्रक्रिया निकै लामो भएको थियो।
तर अधिकांश जीवावशेष राम्रो स्वरूपमा भएको क्वीन्सल्याण्ड सङ्ग्रहालय र इरोमान्गा सङ्ग्रहालयका अनुसन्धानकर्ताहरूले बताएका छन्।
क्वीन्सल्यान्डको राज्य सरकारले मङ्गलवार उक्त वर्गीकरणको स्वागत गरेको छ।
