कोरोना भाइरस नेपाल: ३६ जना सङ्क्रमित थपिए, कुल सङ्क्रमित सङ्ख्या ५८४ पुग्यो

नेपालमा शनिवार अपराह्ण थप ३६ मा कोरोनाभाइरस सङ्क्रमण पुष्टि भएको छ।

यसअघि शनिवार बिहान मन्त्रालयले थप ३२ जनामा सङ्क्रमण पुष्टि गरेको थियो।

शनिवार थपिएका ६८ जनापछि नेपालमा जम्मा सङ्क्रमितको सङ्ख्या ५८४ पुगेको छ।

स्वास्थ्य तथा जनसङ्ख्या मन्त्रालयले गरेको नियमित पत्रकार सम्मेलनमा प्रवक्ता डा. विकास देवकोटाले शनिवार सङ्क्रमण पुष्टि भएकामा बाँकेका २७ जना, बैतडीका ४ जना, सुर्खेतका ३ जना र झापा तथा बर्दियाका एक-एक जना रहेको बताए।

सङ्क्रमितहरूको नमुना कोशी अस्पताल, राप्ती स्वास्थ्य विज्ञान प्रतिष्ठान, सेती प्रादेशिक अस्पताल र सुर्खेतमा परीक्षण गरिएको थियो।

को हुन् सङ्क्रमित

सेती अस्पतालमा नमुना परीक्षण गरिएका चारजनामध्ये २० वर्षका दुईजना तथा २२ र २७ वर्षका पुरुषहरू छन्।

मन्त्रालयका अनुसार सबै बैतडी शिवनाथ गाउँपालिकाका हुन् र उनीहरू सबैमा आरडीटी परीक्षणमा सङ्क्रमण देखिएपछि आइसोलेशनमा राखिएको थियो।

त्यस्तै कोशी अस्पतालमा परीक्षण गरिएका झापाका ३३ वर्षका पुरुषमा सङ्क्रमण देखिएको हो। उनी झापामै क्वारन्टीनमा बसिरहेका थिए।

राप्ती स्वास्थ्य विज्ञान प्रतिष्ठानमा गरिएको परीक्षणमा नरैनापुर मदरसा बाँकेका १७ देखि ३२ वर्षसम्मका ६ जना पुरुषहरूमा पनि सङ्क्रमण पुष्टि भएको छ।

बाँकेकै नरैनापुर-३ स्थित राष्ट्रिय प्रावीको क्वारन्टीनमा रहेका १५ जनामा पनि सङ्क्रमण देखिएको देवकोटाले बताए।

उनका अनुसार ती सङ्क्रमितहरू १६ देखि ३२ वर्षका रहेका छन्।

नरैनापुर-१ स्थित राष्ट्रिय प्रावीको क्वारेन्टीनमा रहेका ६ जना मा पनि सङ्क्रमण पुष्टि भएको छ।

उनीहरू २२ वर्षदेखि ५० वर्षका पुरुषहरू हुन्।

बर्दियाको बढैया तालका ७ का एकजना १९ वर्षे पुरुषमा पनि सङ्क्रमण पुष्टि भएको छ।

त्यस्तै सुर्खेतमा पनि २ जना पुरुष र १ जना महिलामा सङ्क्रमण देखिएको छ।

पुरुष बढी

सङ्क्रमितहरूमा ५०५ जना पुरुष र ७९ जना महिला रहेका छन्।

नेपालका ४० जिल्लामा सङ्क्रमण फैलिसकेको छ।

प्रदेश नम्बर ५ मा सबैभन्दा बढी सङ्क्रमित देखिएका छन्। त्यहाँ सङ्क्रमितको सङ्ख्या २७१ पुगेको छ।

त्यसपछि प्रदेश नम्बर २ मा धेरै सङ्क्रमित देखिएका छन्। त्यहाँ १७२ जना सङ्क्रमित छन्।

प्रदेश नम्बर १ मा ८६ वाग्मति प्रदेशमा ३२ सुदूरपश्चिम प्रदेशमा १४, गण्डकी प्रदेशमा ५ र कर्णाली प्रदेशमा ४ जना रहेका छन्। हाल देशभरि गरी ३२ हजार ५ सय ८७ जना क्वारेन्टीनमा रहेका छन्।

आइसोलेशनमा ५ सय ८ जना रहेका र ७० जना निको भइसकेको मन्त्रालयले जनाएको छ।