लाइभ, प्रत्यक्षतर्फको गणना अन्तिम चरणतिर: प्रत्यक्षतर्फ रास्वपाको १ सयभन्दा बढी सीट, समानुपातिकमा पनि आधाभन्दा बढी मत उसैलाई

फागुन २१ गते भएको मतदानको हालसम्म प्राप्त मतपरिणाममा रास्वपा १०२ स्थानमा जितेको छ। दोस्रो स्थानमा रहेको नेपाली कांग्रेसले १४ स्थानमा, तेस्रो स्थानमा एमालेले ७ र चौथो स्थानमा रहेको नेकपाले ४ स्थानमा जित हासिल गरेका छन्।

सारांश

प्रतिनिधिसभा निर्वाचन सम्पन्न भएपछि निर्वाचनका मतगणनाको परिणाम आउने क्रम जारी छ
प्रत्यक्षतर्फ राष्ट्रिय स्वतन्त्र पार्टीले १०२ स्थानमा जितेको छ
दोस्रो स्थानमा रहेको नेपाली कांग्रेसले १४ स्थानमा, तेस्रो स्थानमा एमालेले ७ र चौथो स्थानमा रहेको नेकपाले ४ स्थानमा जित हासिल गरेका छन्
बिहीवार देशैभरि प्रत्यक्ष र समानुपातिक प्रणालीका लागि एकै चरणमा मतदान भएको थियो
प्रत्यक्षतर्फ ३,४०० भन्दा बढी उम्मेदवार प्रतिस्पर्धामा थिए
यो निर्वाचनबाट प्रत्यक्षतर्फ १६५ र समानुपातिकतर्फ ११० सांसद निर्वाचित हुने छन्
समानुपातिकतर्फको पनि मतगणना जारी छ, समानुपातिकमा पनि रास्वपा अग्रस्थानमा छ
गत भदौ महिनामा जेन जी आन्दोलन भएपछि प्रतिनिधिसभा विघटन भएको थियो। त्यसैले निर्धारित समयभन्दा अगाडि नै अहिले निर्वाचन भएको हो

लाइभ कभरेज

२५ मिनेट पहिलेअछाम २ मा एमाले-कांग्रेसबीच कडा टक्कर, प्रकाश पार्की, डडेल्धुरा
अछाम क्षेत्र नं २ मा प्रतिनिधिसभा सदस्यतर्फ मतगणना जारी रहँदा नेकपा (एमाले) र नेपाली कांग्रेसबीच कडा प्रतिस्पर्धा देखिएको छ।
अहिलेसम्म २३ हजार ४५७ मत गणना हुँदा एमालेका उम्मेदवार यज्ञबहादुर बोगटीले ७,५०४ मत प्राप्त गर्दै अग्रता कायम गरेका छन्।
उनका निकटतम प्रतिस्पर्धी नेपाली कांग्रेसका पुष्प शाहले ६,९१८ मत ल्याएका छन्। बोगटीले शाहभन्दा ५८६ मतले अग्रता बनाएका छन्।
राष्ट्रिय स्वतन्त्र पार्टीका भूपदेव शाहले ३,९६६ मत र नेकपाका बलबहादुर कुँवरले २, ९९१ मत प्राप्त गरेका छन्।
अछाम क्षेत्र नं २ मा जम्मा ३२,४०८ मत खसेकोमा हालसम्म २३, ४५७ मत गणना भइसकेको मुख्य निर्वाच अधिकृतको कार्यालयले जनाएको छ।
३९ मिनेट पहिलेबर्दिया १ मा रास्वपाका ठाकुर सिंह थारू विजयी, विमला चौधरी, नेपालगञ्ज
बर्दिया क्षेत्र नम्बर १ मा राष्ट्रिय स्वतन्त्र पार्टी (रास्वपा) का ठाकुर सिंह थारू फराकिलो मतान्तरसहित विजयी भएका छन्।
मुख्य निर्वाचन अधिकृतको कार्यालयका अनुसार थारूले ४९ हजार ६३१ मत प्राप्त गर्दै विजय हासिल गरेका हुन्।
उनका निकटतम प्रतिद्वन्द्वी नेकपा एमालेका उम्मेदवार तथा बाँसगढी नगरपालिकाका पूर्वमेयर शालिकराम अधिकारीले १४ हजार ६४३ मत प्राप्त गरेका छन्। थारू र अधिकारीबीच ३४ हजार ९८८ मतको अन्तर छ।
नेपाली कांग्रेसका सञ्जय गौतम तेस्रो स्थानमा सीमित भएका छन्। यसअघि विसं २०७० सालको संविधानसभा निर्वाचन तथा विसं २०७४ र २०७९ सालको प्रतिनिधिसभा निर्वाचनमा सोही क्षेत्रबाट निर्वाचित भएका गौतमले यस पटक १२ हजार ७२२ मत प्राप्त गरेका छन्।
नेपाली कम्युनिस्ट पार्टीका विष्णु चौधरीले ९ हजार २८५ मत प्राप्त गरेका छन् भने नागरिक उन्मुक्ति पार्टी नेपालका अब्दुल खानले ५ हजार ७२४ मत प्राप्त गरेका छन्।
अहिले विजयी भएका ठाकुर सिंह थारू अघिल्लो प्रतिनिधिसभा निर्वाचनमा नागरिक उन्मुक्ति पार्टीबाट उम्मेदवार थिए।
त्यस बेला उनी नेपाली कांग्रेसका सञ्जय गौतम र नेकपा एमालेका उम्मेद्वार लक्ष्मण ज्ञवालीभन्दा कम मत ल्याएर तेस्रो भएका थिए।
पत्रकारिता क्षेत्रबाट राजनीति यात्रामा प्रवेश गरेका थारू नेपाल पत्रकार महासङ्घ बाँकेका पूर्वअध्यक्ष समेत हुन्।
४९ मिनेट पहिलेयुद्धकालीन सहकर्मीसँग प्रकाण्ड पराजित, प्रकाश पन्त, सुर्खेत
नेकपा माओवादीका खड्गबहादुर विश्वकर्मा प्रकाण्ड युद्धकालीन सहकर्मी महेन्द्रबहादुर शाहीसँग पराजित भएका छन्।
नेत्रविक्रम चन्द विप्लव नेतृत्वको नेकपा माओवादीका प्रकाण्ड नामले चिनिने नेता खड्गबहादुर विश्वकर्मा गुलाब चिह्न लिएर चुनाव लडेका थिए।
शान्ति सम्झौतापछि विसं २०६४ मा भएको संविधानसभा निर्वाचनमा विश्वकर्मा कालिकोटबाट निर्वाचित भएका थिए।
तत्कालीन नेकपा माओवादी संसदीय राजनीतिमा आएयता चाहेजस्तो परिवर्तन नभएको भन्दै विद्रोहको बाटोमा हिँडेका उनी युद्धकालमा भेरी कर्णाली क्षेत्रबाट प्रतिनिधित्व गर्नेमध्ये माओवादीका प्रभावशाली नेता मानिन्थे।
तर १८ वर्षपछि संसदीय राजनीतिमै फर्किएर चुनाव लडेका विश्वकर्मा यसपालि भने आफ्नै युद्धकालीन सहकर्मी महेन्द्रबहादुर शाहीसँग पराजित भएका छन्।
एक पटक पर्यटनमन्त्री समेत भइसकेका र कालिकोटमा सबै दल एकतिर अनि आफू एक्लै अर्कोतिर भए पनि चुनाव जित्ने दावी गर्दै आइरहेका उनी निर्वाचनमा चौथो भएका छन्। उनी नेकपा माओवादीका प्रवक्ता र विप्लवपछि दोस्रो ठूला नेता हुन्।
महेन्द्रबहादुर शाही (नेकपा) : ११,७३४
नगीन्द्र शाही (नेकपा एमाले) : १०,६४७
हर्षबहादुर बम (नेपाली कांग्रेस) : ७,४५०
खड्कबहादुर विश्वकर्मा (नेकपा माओवादी) : ४,९९३
प्रकाश न्यौपाने (रास्वपा) : ३,१०१
१ घण्टा पहिलेकर्णालीमा रास्वपालाई एक सीट मात्र, प्रकाश पन्त, सुर्खेत
देशैभरि राम्रो नतिजा ल्याइरहेको राष्ट्रिय स्वतन्त्र पार्टीले कर्णाली प्रदेशमा भने त्यस्तो देखिएको छैन।
बाह्रवटा निर्वाचन क्षेत्र रहेको कर्णालीको सुर्खेत क्षेत्र नं २ बाहेक अन्यत्र भने रास्वपाका उम्मेदवारले जित्न सकेनन्।
सल्यानमा निकटतम प्रतिद्वन्द्वी, दैलेख र सुर्खेतको क्षेत्र नं १ मा तेस्रो र कर्णालीका अरू जिल्लामा रास्वपाका उम्मेदवारहरू चौथो र पाँचौँ स्थानमा समेटिएका छन्।
तर कर्णालीको राजधानी वीरेन्द्रनगर लगायतका सहरी क्षेत्र रहेको सुर्खेत क्षेत्र नं २ मा भने फराकिलो अन्तरले उसका उम्मेदवारले जितेका छन्।
यो क्षेत्रमा रास्वपाका रमेशकुमार सापकोटाले कांग्रेसका नारायणकुमार कोइरालालाई १४,४५४ मत अन्तरले हराएका छन्। सापकोटाले ३०,८४२ मत र कोइरालाले १६,३७८ मत प्राप्त गरेका छन्।
१ घण्टा पहिलेसुदूरपश्चिममा लेखराज भट्ट, भीम रावल र एनपी साउद पराजित, हिक्मतबहादुर रावल
विसं २०७९ को प्रतिनिधिसभा निर्वाचनमा नेपाली कांग्रेसका वीरबहादुर बलायरसँग हार बेहोरेका लेखराज भट्ट यसपालि पनि पराजित भएका छन्।
कैलाली क्षेत्र नं ४ बाट उम्मेदवार बनेका उनी यस पटक तस्रो स्थानमा रहे। राष्ट्रिय स्वतन्त्र पार्टीका खेमराज कोइराला २८ हजार ५५६ मत ल्याउँदै विजयी हुँदा भट्ट ९ हजार ४४४ मतमा सीमित रहे।
नेपाली कम्युनिस्ट पार्टीका उम्मेदवार भीमबहादुर रावल अछाम क्षेत्र नं १ मा थोरै मतान्तरले कांग्रेसका भरतकुमार स्वाँरसँग पराजित भएका छन्।
स्वाँरले १० हजार ७५९ मत प्राप्त गर्दा रावलले १० हजार २२३ मत प्राप्त गरे। विसं २०७९ को आमनिर्वाचनमा रावल नेकपा एमालेबाट टिकट पाउन सकेनन्। यस पटक पार्टी परिवर्तन गरेका रावलले पराजय भोगे।
कञ्चनपुर क्षेत्र नं २ मा कांग्रेसका नारायणप्रकाश साउदले पनि पराजय भोगेका छन्।
राष्ट्रिय स्वतन्त्र पार्टीका उम्मेदवार दीपकराज बोहरासँग भारी मतान्तरले साउद पराजित भएका हुन्।
रास्वपाका बोहराले ३३ हजार ९५२ मत ल्याए भने साउदले १० हजार ८२७ मत मात्र प्राप्त गरे।
१ घण्टा पहिलेपराजयपछि गगनले के भने?
सर्लाही क्षेत्र नं ४ मा राष्ट्रिय स्वतन्त्र पार्टीका अमरेश सिंहसँग पराजित भएका नेपाली कांग्रेसका सभापति गगन थापाले सिंहलाई बधाई दिएका छन्।
सामाजिक सञ्जालमा थापाले लेखेका छन्, “मलाई माया, विश्वास र मत दिनुहुने यस क्षेत्रका सम्पूर्ण मतदाताप्रति हार्दिक कृतज्ञता व्यक्त गर्दछु।”
“यस क्षेत्रमा मैले देखेका समस्याहरूको सम्बोधन गर्न, मेरो पहल र क्षमताभित्रबाट सम्भव हुने कामहरू निरन्तर रूपमा गरिरहने छु।”
रास्वपाका सिंहले ३५,६८८ मत प्राप्त गर्दै जित हासिल गरेका छन् भने थापाले २२,८३८ मत प्राप्त गरेका छन्।
१ घण्टा पहिलेहुम्लामा कांग्रेसका जयपति रोकाया विजयी, कृष्णमाया उपाध्याय, जुम्ला
हुम्लामा नेपाली कांग्रेसका जयपति रोकाया ८,७९७ मत ल्याएर विजयी भएका छन्।
एउटा मात्र निर्वाचन क्षेत्र रहेको हुम्लामा नेकपाका दीपेन्द्र रोकायालाई १,५५४ मतले पछाडि पार्दै कांग्रेसका रोकाया विजयी भएका मुख्य निर्वाचन अधिकृतको कार्यालयले जनाएको छ।
नेकपाका दीपेन्द्र रोकायाले ७,२४३ मत प्राप्त गरेका छन् भने एमालेका दल फडेराले ४,३३१ मत प्राप्त गरेका छन्। रास्वपाका टासी ल्हान्जोमले १,०६४ मत प्राप्त गरेका छन्।
१ घण्टा पहिलेडोल्पामा भाइसँग सहोदर दाइ पराजित, प्रकाश पन्त, सुर्खेत
डोल्पामा सहोदर दाजुभाइबीचको प्रतिस्पर्धामा भाइ धनबहादुर बूढाले बाजी मारेका छन्।
दाइ कर्णबहादुर बूढा नेपाली कांग्रेस र भाइ धनबहादुर बूढाले नेपाली कम्युनिस्ट पार्टीबाट चुनावी प्रतिस्पर्धा गरेका थिए।
कांग्रेस विशेष महाधिवेसनबाट सहमहामन्त्री बनेका कर्णबहादुर पहिलो पटक र भाइ धनबहादुर चौथो पटक चुनाव लडेका हुन्।
यो चुनाव डोल्पालीका लागि दलीय प्रतिस्पर्धाभन्दा पनि दाजुभाइको प्रतिष्ठाको लडाइँ बन्न पुगेको बताइन्छ।
तर विसं २०७०, २०७४ र २०७९ सालमा भएका तीनवटै चुनावमा लगातार जित हासिल गरेका धनबहादुर यसपालि आफ्नै दाइलाई हराउँदै लगातार चौथो पटक चुनाव जित्न सफल भएका छन्।
धनबहादुरले कर्णबहादुरलाई ३,८५३ अन्तरले जितेका छन्। दाइ कर्णबहादुर तेस्रो स्थानमा आएका छन्।
धनबहादुर बूढा (नेकपा) : ६,८०२
लङ्कबहादुर रोकाय (नेकपा एमाले) : ५,३९६
कर्णबहादुर बूढा (नेपाली काँग्रेस) : २,९४९
१ घण्टा पहिलेओखलढुङ्गामा रास्वपासँग कांग्रेस झिनो मतले पराजित
ओखलढुङ्गामा राष्ट्रिय स्वतन्त्र पार्टीका विश्वराज पोखरेल विजयी भएका छन्।
उनको नेपाली कांग्रेसका कुमार लुइँटेलसँग चर्को प्रतिस्पर्धा भएको थियो।
मतगणना हुँदा कहिले लुइँटेल अगाडि देखिएका थिए भने कहिले पोखरेल।
पोखरेल नेपाल प्रहरीबाट सेवानिवृत्त वरिष्ठ अधिकारी हुन्।
- विश्‍वराज पोखरेल, राष्ट्रिय स्वतन्त्र पार्टी - १३,९५३
- कुमार लुइँटेल, नेपाली कांग्रेस - १३,९४८
- अम्बिरबाबु गुरुङ, नेपाली कम्युनिस्ट पार्टी - ११,२९६
१ घण्टा पहिलेकञ्चनपुरका तीनवटै क्षेत्रमा रास्वपा विजयी, हिक्मतबहादुर रावल, धनगढी
कञ्चनपुर क्षेत्र नं १ मा राष्ट्रिय स्वतन्त्र पार्टीका उम्मेदवार जनकसिंह धामी विजयी भएका छन्।
कुल २४ हजार ३३२ मत ल्याएका उनले दुई पूर्वमन्त्री नेपाली कम्युनिस्ट पार्टीकी बीना मगर र नेकपा एमालेका तारालामा तामाङलाई हराएका हुन्।
मगरले ११ हजार ११० मत प्राप्त गरेकी छन् भने तामाङले आठ हजार ८८ मत ल्याएका छन्।
कञ्चनपुर क्षेत्र नं २ मा रास्वपाकै दीपकराज बोहरा फराकिलो मतान्तरले विजयी भएका छन्।
बोहराले कांग्रेस नेता एवं पूर्वमन्त्री एनपी साउदलाई २३ हजार १२५ मतान्तरले पराजित गरेका हुन्। बोहराले ३३ हजार ९५२ र साउदले १० हजार ८२७ मत प्राप्त गरेका छन्।
कञ्चनपुर क्षेत्र नं ३ मा रास्वपाका ज्ञानेन्द्रसिंह महता २७ हजार ११८ मत ल्याएर निर्वाचित भएका छन्।
महता १७ हजार ६७५ मतान्तरले कांग्रेसका हरिप्रसाद बोहरालाई पछि पार्दै विजयी भएका हुन्।
२ घण्टा पहिलेसुर्खेत १ मा भाइले जोगाए दाइको विरासत, प्रकाश पन्त, सुर्खेत
सहोदर भाइ विष्णुबहादुर खड्काले चुनाव जितेर नेपाली कांग्रेसका नेता पूर्णबहादुर खड्काको सुर्खेत क्षेत्र नं १ मा विरासत जोगाएका छन्।
पार्टीको आधिकारिकता विवादमा अदालतमा मुद्दा लड्ने पक्ष भएको भन्दै विसं २०४८ सालदेखि जित्दै आएका पूर्णबहादुर यस पटक भने चुनाव लडेनन्।
विष्णुले नेकपा एमालेका ध्रुवकुमार शाहीलाई ८,००७ मतान्तरले पराजित गरेका हुन्। उनले २६,८९७ मत र शाहीले १८,८९० मत ल्याएका छन् ।
राष्ट्रिय स्वतन्त्र पार्टीका टेकबहादुर सिंहले १४,७२९ मत, नेपाली कम्युनिस्ट पार्टीका जितबहादुर रानाले २,८२८ मत र जेन जी आन्दोलनमा सहभागी राष्ट्रिय प्रजातन्त्र पार्टीका रविकिरण हमालले १,०४९ मत ल्याएका निर्वाचन अधिकृतको कार्यालयले जनाएको छ।
२ घण्टा पहिलेकांग्रेस छाडेर रास्वपामा पुगेका भण्डारी बैतडीबाट विजयी, प्रकाश पार्की, डडेल्धुरा
प्रतिनिधिसभा सदस्य निर्वाचनमा बैतडीबाट राष्ट्रिय स्वतन्त्र पार्टी (रास्वपा) का उम्मेदवार हरिमोहन भण्डारी विजयी भएका छन्। कुल २२,१३४ मत प्राप्त गर्दै उनी निर्वाचित भएका हुन्।
उनका निकटतम प्रतिद्वन्द्वी नेपाली कांग्रेसका चतुरबहादुर चन्दले १८ हजार १९४ मत प्राप्त गरेका छन्।
बैतडीबाट तीन पटक लगातार जितेर चार पटक मन्त्री भएका नेकपा (एमाले) का दामोदर भण्डारीले १७,०९१ मत ल्याएका छन्।
नेकपाका परमानन्द भट्टले ६,९६५ मत ल्याउँदा राप्रपका भुपेनबहादुर चन्दले २,६८१ मत पाए। हरिमोहनले प्रारम्भिक राजनीतिक सक्रियता राष्ट्रिय प्रजातन्त्र पार्टीबाट सुरु गरे पनि पछि नेपाली कांग्रेसमा आबद्ध भएका थिए।
विसं २०७४ सालको प्रदेशसभा निर्वाचनमा नेपाली कांग्रेसबाट उम्मेदवार बनेका उनी तत्कालीन नेकपा (माओवादी केन्द्र) का प्रेमप्रकाश भट्टसँग पराजित भएका थिए।
विसं २०७९ सालको निर्वाचनमा भने नेपाली कांग्रेसबाट टिकट नपाएपछि उनले स्वतन्त्र उम्मेदवारका रूपमा प्रतिस्पर्धा गरेका थिए।
सो निर्वाचनमा उनले कांग्रेसका आधिकारिक उम्मेदवार वीरबहादुर विष्टभन्दा बढी मत प्राप्त गरे पनि नेकपा एमालेका सुरेन्द्र पालसँग पराजित भएका थिए।
कांग्रेसको निर्णयविरुद्ध स्वतन्त्र उम्मेदवारी दिएका कारण विसं २०७९ सालमा उनलाई पार्टीले कारबाही गरेको थियो।
निर्वाचन नजिकिँदै गर्दा उनको कारबाही फुकुवा गरिएको भए पनि उनी त्यसअघि नै रास्वपामा प्रवेश गरिसकेका थिए।
रास्वपामा प्रवेश गरेसँगै भण्डारीले यस पटक प्रतिनिधिसभा निर्वाचन जित्दै संसदीय यात्राको सुरुवात गरेका छन्।
२ घण्टा पहिलेसुदूरपश्चिमका आठवटा क्षेत्रमा रास्वपा विजयी, हिक्मत रावल
सुदूरपश्चिमका १६ प्रतिनिधिसभा निर्वाचन क्षेत्रमध्ये आठवटा क्षेत्रमा राष्ट्रिय स्वतन्त्र पार्टीले जित हासिल गरेको छ।
त्यहाँका तीनवटा क्षेत्रमा नेपाली कांग्रेस र दुईवटा क्षेत्रमा नेकपा एमालेका उम्मेदवार विजयी भएका निर्वाचन अधिकृतको कार्यालयले जनाएको छ।
कञ्चनपुरका तीन, कैलालीका पाँचमध्ये चार र डडेल्धुरामा राष्ट्रिय स्वतन्त्र पार्टीका उम्मेदवार विजयी भएका हुन्।
कैलाली क्षेत्र नं २ को मतगणना जारी रहँदा राष्ट्रिय स्वतन्त्र पार्टीका केपी खनालले अग्रता कायमै राखेका छन्।
नेपाली कांग्रेसले डोटी र अछाम क्षेत्र नं १ मा विजय हासिल गरेको छ। डोटीमा कांग्रेसका भरतबहादुर खड्का र अछाम क्षेत्र नं १ मा नेपाली कम्युनिस्ट पार्टीका भीमबहादुर रावललाई हराउँदै कांग्रेसका भरतकुमार स्वाँर विजयी भएका हुन्।
बाजुरामा नेपाली कांग्रेसकै जनकराज गिरीको अग्रता छ। दार्चुला र बझाङ्गमा नेकपा एमालेका उम्मेदवार विजयी भएका छन्।
दार्चुलाबाट गणेश सिंह ठगुन्ना र बझाङ्गबाट ऐनबहादुर महर विजयी भइसकेका छन्।
दुई निर्वाचन क्षेत्र रहेको अछाममा क्षेत्र नं १ को मतगणना जारी छ। सो क्षेत्रमा नेपाली कांग्रेसका उम्मेदवारलाई उछिन्दै एमालेका यज्ञबहादुर बोगटीले अग्रता कायम राखेका छन्।
एउटा निर्वाचन क्षेत्र रहेको बैतडीमा रास्वापाका उम्मेदवार हरिमोहन भण्डारीको अग्रता छ।
२ घण्टा पहिलेकर्णालीमा एमालेलाई एक सीट, प्रकाश पन्त, सुर्खेत
नेकपा एमालेले कर्णाली प्रदेशमा पहिलो जित हासिल गरेको छ। अघिल्लो चुनावमा शून्यमा रहेको एमाले यस पटक त्यहाँ एक सीट जित्न सफल भएको हो।
कर्णालीका अरू क्षेत्रमा नराम्रो पराजय बेहोरे पनि दैलेख क्षेत्र नं २ मा एमालेका उम्मेदवार लक्ष्मीप्रसाद पोखरेलले १३, ८८९ मत ल्याएर विजयी भएका हुन्।
उनका निकटतम प्रतिस्पर्धी नेपाली कांग्रेसका दिक्पालकुमार शाहीले ९,५५२ मत पाएका छन्।
बखतबहादुर शाही (राष्ट्रिय स्वतन्त्र पार्टी) : ६,७९७
योगेन्द्रबहादुर शाही (नेपाली कम्युनिस्ट पार्टी) : ३,८५१
बखतबहादुर थापा (नेपाल मजदुर किसान पार्टी) : १,५१२
२ घण्टा पहिलेरास्वपाले कटायो १०० सीट, समानुपातिकमा हालसम्म आधाभन्दा बढी मत उसैलाई
राष्ट्रिय स्वतन्त्र पार्टीले मतगणना भइरहेका १६४ सीटमध्ये १०२ स्थानमा जित हासिल गरेको निर्वाचन आयोगले जनाएको छ।
उक्त दलले अझै २२ स्थानमा अग्रता लिइरहेको छ।
समानुपातिकतर्फ करिब २६ लाख मतगणना हुँदा रास्वपाको मत १३ लाखभन्दा केही बढ्ता छ।
२ घण्टा पहिलेरुकुम पश्चिममा जनार्दन शर्मा युद्धकालका आफ्नै प्रशिक्षार्थीद्वारा पराजित, प्रकाश पन्त, सुर्खेत
रुकुम पश्चिममा माओवादी द्वन्द्वकालमा जनार्दन शर्माले प्रशिक्षण दिएका गोपाल शर्माले उनलाई हराएका छन्।
विसं २०६४ सालयता लगातार चुनाव जित्दै आएका जनार्दनको जितयात्रामा यसपालि चुनावमा गोपालले ब्रेक लगाइदिएका छन् ।
नेपाली कम्युनिस्ट पार्टीका गोपालले प्रगतिशील लोकतान्त्रिक पार्टीबाट चुनाव लडेका जनार्दनलाई ७,२६३ मतले हराएका हुन्।
निकटतम प्रतिद्वन्द्वी कांग्रेसका राजु केसी भएपछि जनार्दन तेस्रो स्थानमा सीमित भएका छन्।
जनार्दनले १४,३४६ र गोपालले २१, ६०९ मत ल्याएका छन् भने कांग्रेसका राजु केसीले १६,६६१ र रास्वपाका मानबहादुर शाहीले ४,०७६ मत ल्याएका निर्वाचन अधिकृतको कार्यालयले जनाएको छ।
नयाँ दल खोलेर चुनावमा होमिएका जनार्दनले नेकपा एमालेले आफ्नो उम्मेदवारी फिर्ता गरेर समेत समर्थन गरे पनि जित्न सकेनन्।
जनार्दनले यसअघि विसं २०६४ र २०७० सालको संविधानसभा र विसं २०७४ र २०७९ सालको प्रतिनिधिसभा सदस्यको चुनाव जितेका थिए।
२ घण्टा पहिलेमुगुमा कांग्रेसका खड्कबहादुर शाही अगाडि, कृष्णमाया उपाध्याय
मुगुका तीनवटा पालिकाको १४,२३५ मतगणना गरिँदा नेपाली कांग्रेसका खड्ग शाही अगाडि देखिएका छन्।
शाहीले ५,६१७ मत प्राप्त गरेका छन् भने उनका निकटतम प्रतिस्पर्धी नेकपा एमालेका पूर्णबहादुर रोकायाले ५,००१ मत प्राप्त गरेका निर्वाचन अधिकृतको कार्यालय मुगुले जनाएको छ।
नेकपाका चन्द्रबहादुर शाहीले २,४४० मत प्रप्त गरेका छन् भने रास्वपाका भुवन टमटाले ३७१ मत प्राप्त गरेका छन्।
३ घण्टा पहिलेखोटाङमा श्रम संस्कृति पार्टीको पहिलो जित
हर्क साम्पाङले नेतृत्व गरेको दल श्रम संस्कृतिका पार्टीले पहिलो जित हासिल गरेको छ।
खोटाङमा उक्त दलका आरेन राईले नेकपा एमालेका देवबिक्रम राईलाई पछि पार्दै चुनाव जितेका हुन्।
पार्टी अध्यक्ष साम्पाङसँगै श्रम संस्कृति पार्टीले अझै दुई स्थानमा अग्रता लिइरहेको छ।
३ घण्टा पहिलेबैतडीमा रास्वपाका भण्डारीको फराकिलो अग्रता, दोस्रो हुन एमाले–कांग्रेसबीच कडा प्रतिस्पर्धा, प्रकाश पार्की
प्रतिनिधिसभा सदस्य निर्वाचनमा बैतडीमा राष्ट्रिय स्वतन्त्र पार्टी (रास्वपा)का उम्मेदवार हरिमोहन भण्डारीले स्पष्ट अग्रता कायम गरेका छन्।
आइतवार बिहान ७:३० बजेसम्मको मतगणना परिणामअनुसार भण्डारीले २० हजार ७८ मत प्राप्त गर्दै अग्रस्थानमा रहेका निर्वाचन अधिकृतको कार्यालयले जनाएको छ।
उनका निकटतम प्रतिस्पर्धी नेकपा एमालेका दामोदर भण्डारीले १५ हजार ८९० मत पाएका छन् भने नेपाली कांग्रेसका चतुरबहादुर चन्द १५ हजार ४९४ मतसहित तेस्रो स्थानमा छन्।
३ घण्टा पहिलेपर्सा ३ र ४ मा पनि रास्वपा उम्मेदवार विजयी, माधुरी महतो, वीरगन्ज
प्रतिनिधिसभा सदस्य निर्वाचनअन्तर्गत पर्सा क्षेत्र नम्बर ३ मा राष्ट्रिय स्वतन्त्र पार्टी (रास्वपा) का रामाकान्तप्रसाद चौरसिया विजयी भएका छन्।
चौरसियाले २९ हजार ६७९ मत प्राप्त गर्दै विजय हासिल गरेका हुन्। उनका निकटतम प्रतिद्वन्द्वी नेपाली कांग्रेसका सुरेन्द्रप्रसाद चौधरीले १६ हजार ३६६ मत प्राप्त गरेका छन्।
पर्सा क्षेत्र नम्बर ४ मा राष्ट्रिय स्वतन्त्र पार्टी (रास्वपा) का उम्मेदवार टेकबहादुर शाक्य विजयी भएका छन्।
अन्तिम मतपरिणामअनुसार शाक्यले २८ हजार ६ मत प्राप्त गर्दै विजय हासिल गरेका हुन्।
उनका निकटतम प्रतिद्वन्द्वी नेपाली कांग्रेसका रमेश रिजालले १२ हजार ५३४ मत प्राप्त गरेका छन्।
पर्सा, बारा, रौतहट र सर्लाहीका चारैवटा निर्वाचन क्षेत्रमा रास्वपाका उम्मेदवारहरूले विजय हासिल गरेका छन्।

सारांश

लाइभ कभरेज

२५ मिनेट पहिलेअछाम २ मा एमाले-कांग्रेसबीच कडा टक्कर, प्रकाश पार्की, डडेल्धुरा

३९ मिनेट पहिलेबर्दिया १ मा रास्वपाका ठाकुर सिंह थारू विजयी, विमला चौधरी, नेपालगञ्ज

४९ मिनेट पहिलेयुद्धकालीन सहकर्मीसँग प्रकाण्ड पराजित, प्रकाश पन्त, सुर्खेत

१ घण्टा पहिलेकर्णालीमा रास्वपालाई एक सीट मात्र, प्रकाश पन्त, सुर्खेत

१ घण्टा पहिलेसुदूरपश्चिममा लेखराज भट्ट, भीम रावल र एनपी साउद पराजित, हिक्मतबहादुर रावल

१ घण्टा पहिलेपराजयपछि गगनले के भने?

१ घण्टा पहिलेहुम्लामा कांग्रेसका जयपति रोकाया विजयी, कृष्णमाया उपाध्याय, जुम्ला

१ घण्टा पहिलेडोल्पामा भाइसँग सहोदर दाइ पराजित, प्रकाश पन्त, सुर्खेत

१ घण्टा पहिलेओखलढुङ्गामा रास्वपासँग कांग्रेस झिनो मतले पराजित

१ घण्टा पहिलेकञ्चनपुरका तीनवटै क्षेत्रमा रास्वपा विजयी, हिक्मतबहादुर रावल, धनगढी

२ घण्टा पहिलेसुर्खेत १ मा भाइले जोगाए दाइको विरासत, प्रकाश पन्त, सुर्खेत

२ घण्टा पहिलेकांग्रेस छाडेर रास्वपामा पुगेका भण्डारी बैतडीबाट विजयी, प्रकाश पार्की, डडेल्धुरा

२ घण्टा पहिलेसुदूरपश्चिमका आठवटा क्षेत्रमा रास्वपा विजयी, हिक्मत रावल

२ घण्टा पहिलेकर्णालीमा एमालेलाई एक सीट, प्रकाश पन्त, सुर्खेत

२ घण्टा पहिलेरास्वपाले कटायो १०० सीट, समानुपातिकमा हालसम्म आधाभन्दा बढी मत उसैलाई

२ घण्टा पहिलेरुकुम पश्चिममा जनार्दन शर्मा युद्धकालका आफ्नै प्रशिक्षार्थीद्वारा पराजित, प्रकाश पन्त, सुर्खेत

२ घण्टा पहिलेमुगुमा कांग्रेसका खड्कबहादुर शाही अगाडि, कृष्णमाया उपाध्याय

३ घण्टा पहिलेखोटाङमा श्रम संस्कृति पार्टीको पहिलो जित

३ घण्टा पहिलेपर्सा ३ र ४ मा पनि रास्वपा उम्मेदवार विजयी, माधुरी महतो, वीरगन्ज