विश्वभरि कोरोनाभाइरस सङ्क्रमणको स्थिति तथा सम्बन्धित अन्य विषयबारे हामी तपाईँलाई यो पेजमार्फत् जानकारी दिन्छौँ।
नेपालमा मङ्गलवार अहिलेसम्मकै सर्वाधिक सङ्ख्यामा कोभिड-१९ भएका व्यक्ति फेला परे।
देशभरि पुष्टि भएको सङ्क्रमणको कुल सङ्ख्या १९१ पुगेको छ। तीमध्ये ३३ जना निको भइसकेका छन्।
दक्षिण एशियामा भारत र पाकिस्तान सबैभन्दा प्रभावित देश हुन्। भुटानमा सबैभन्दा कम सङ्क्रमण देखिएको छ।
यससँगै हामी यो लाइभ पेज आज यही टुङ्ग्याउँछौँ।
आजलाई तपाईँले हेरिरहनुभएको यो लाइभ पेज अब अद्यावधिक हुने छैन।
तपाईँ ताजा समाचार र अन्य जानकारीका लागि हाम्रो होमपेज अपडेट हुने छ।
धन्यवाद।
रुसमा सङ्क्रमितको सङ्ख्या अमेरिकापछि सर्वाधिक भएको छ।
अमेरिकाको जोन्स हप्किन्स विश्वविद्यालयका अनुसार रुसमा २,३२,००० जनाभन्दा बढीमा कोभिड-१९ पुष्टि भएको छ।
अमेरिकामा झन्डै १३,४८,००० सङ्क्रमित फेला परेका छन्।
तस्बिर स्रोत, Getty Images
भारतमा सीमित सङ्ख्यामा यात्रुवाहक रेल सञ्चालनमा ल्याइने भएको छ।
मङ्गलवार दिल्लीबाट अन्य मुख्य सहरका लागि १५ वटा रेलसेवा सुरु हुँदैछन्। धेरै भिड नहोस् भनेर सीमित टिकट अनलाइनबाट विक्री गरिएको छ।
रेलवे स्टेशनभित्र टिकटवाहकले मात्र पस्न पाउनेछन् तथा यात्रुहरूले अनिवार्य रूपमा मास्क लगाउनुपर्नेछ।
मजदुरहरूलाई गृहराज्य फर्काउन सञ्चालित विशेष रेलबाहेक यात्रु रेलसेवा सञ्चालन गरिएको हो।
दैनिक दुई करोड मानिसले प्रयोग गर्ने भारतीय रेल सञ्जाल गत मार्च महिनादेखि ठप्प थियो।
तस्बिर स्रोत, Getty Images
चीनले वुहानमा बसोबास गर्ने सबैको कोरोनाभाइरस परीक्षण गर्ने योजना बनाएको छ।
चिनियाँ सरकारी सञ्चारमाध्यमका अनुसार वुहानभरि १० दिनभित्र एक करोड १० लाख जनाको परीक्षण गरिनेछ।
त्यहाँ पुन: पाँच जनामा कोभिड-१९ भएको पाइएपछि परीक्षण विस्तार गरिन लागेको हो।
गत वर्ष डिसेम्बरको अन्तिम साता वुहानमा पहिलो चोटि कोरोनाभाइरस सङ्क्रमण भेटिएको पुष्टि भएको थियो।
सङ्क्रमण नियन्त्रणमा आएपछि एक महिनाअघि वुहानमा लकडाउन खुकुलो पारिएको थियो।
स्वास्थ्य तथा मन्त्रालय मङ्गलवार अपराह्णसम्म पीसीआर विधिबाट १८,९६४ वटा परीक्षण भएको बताएको छ।
नियमित पत्रकार सम्मेलनमा बोल्दै मन्त्रालयका प्रवक्ता डा. विकास देवकोटाले देशभरि अहिले क्वारन्टीनमा १२,७८५ जना व्यक्ति र आइसोलेशनमा सङ्क्रमित पुष्टि भएका १५८ जनासहित कुल २२८ जना छन्।
आज सङ्क्रमण पुष्टि भएका ५७ जनासहित नेपालमा सङ्क्रमितमध्ये १५८ जना पुरुष हुन्। बाँकी ३३ जना महिला हुन्।
चीनबाट जनमुक्ति सेनाको विमान कोरोनाभाइरस परीक्षण र उपचारका लागि आवश्यक विभिन्न सामग्री बोकेर बुधवार काठमाण्डू ओर्लिने बताइएको छ।
नेपाली सेनालाई चीनले सहयोग गरेको स्वास्थ्य सामग्रीहरू लिएर एउटा विमान नेपाल आउने भएको हो।
नागरिक उड्डयन प्राधिकरणका प्रवक्ता राजकुमार क्षेत्रीले भने, "नेपाली सेनालाई सहायतास्वरूप दिने स्वास्थ्य सामग्री लिएर चिनियाँ वायुसेनाको ठूलो विमान काठमाण्डू आउँदैछ।"
नेपाली सेनाले त्यसबारे औपचारिक जानकारी भने दिएको छैन।
स्वास्थ्य सेवा विभागका महानिर्देशक महेन्द्रप्रसाद श्रेष्ठका अनुसार सो विमान स्वास्थ्यकर्मीलाई आवश्यक पीपीईजस्ता सुरक्षा सामग्री लिएर काठमाण्डू आउन लागेको हो।
मङ्गलवार थप ५७ जनामा कोभिड-१९ पुष्टि भएपछि नेपालमा कोरोनाभाइरस सङ्क्रमण भएका व्यक्तिको कुल सङ्ख्या १९१ पुगेको छ।
अहिलेसम्म प्रदेश नं २ को पर्सा जिल्लामा सर्वाधिक सङ्क्रमित भेटिएका छन्।
नेपालमा थप ५७ जनामा सङ्क्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ।
अब कोभिड-१९ लागेका व्यक्तिहरूको सङ्ख्या १९१ पुगेको छ।
थप समाचार यहाँ पढ्नुहोस्।
दक्षिण एशियाका सबै देशमा कोरोनाभाइरस सङ्क्रमण फैलिएको छ।
नेपाल र भुटानमा बाहेक सबै देशमा कोभिड-१९ का मानिसहरूको मृत्यु भएको छ।
नेपालमा सङ्क्रमितको कुल सङ्ख्या १९१ पुगेको छ भने भुटानमा सबैभन्दा कम नौ रहेको छ।
रुसको सेन्ट पिटर्सबर्गस्थित एउटा अस्पतालमा आगलागी हुँदा सघन उपचार कक्षमा उपाचाररत पाँच जना कोरोनाभाइरस सङ्क्रमितको मृत्यु भएको छ।
भेन्टिलेटरमा शर्टसर्किट हुँदा आगलागी सुरु भएको रुसी समाचारसंस्थाहरूले जनाएका छन्।
अस्पतालबाट १५० जनाको उद्धार गरिएको र आगलागी नियन्त्रणमा आएको त्यहाँको आपत्कालीन मन्त्रालयले बताएको छ।
तस्बिर स्रोत, Getty Images
इन्डोनेशियाले कामदारको थप कटौती रोक्न ४५ वर्षभन्दा कम उमेरका जागिरेलाई घरबाहिर काममा जान दिने तयारी गरेको कोरोनाभाइरस महामारीसँग रोकथाम र नियन्त्रणका लागि गठित कार्यदलका प्रमुखले बताएका छन्।
“पैँतालीस वर्षभन्दा कम उमेरका मानिसहरू शारीरिक रूपमा स्वस्थ र गतिशील छन्,” डोनी मोनार्डोले भने, “यदि कोरोनाभाइरसको सङ्क्रमण भयो भने पनि लक्षण नदेखिने भएकाले उनीहरू बिरामी नपर्न सक्छन्।”
जकार्ता पोस्टमा प्रकाशित समाचारअनुसार इन्डोनेशियामा २८ लाख मानिसहरूले जागिर गुमाएका छन्।
इन्डोनेशियामा अहिलेसम्म १४,६२५ जनामा सङ्क्रमण पुष्टि भएको र तीमध्ये ९९१ जनाको मृत्यु भएको उक्त पत्रिकाले जनाएको छ।
तस्बिर स्रोत, Getty Images
दक्षिण कोरियाको राजधानी सोलमा थप ९४ जना कोरोनाभाइरस सङ्क्रमण देखिएको छ।
नयाँ सङ्क्रमण सरकारले सामाजिक दूरीसम्बन्धी नियम खुकुलो बनाउन थालेपछि देखिएको हो। यसले जनजीवनमा समान्यतर्फ फर्किँदा सङ्क्रमण नियन्त्रण कति जटिल छ भन्ने देखाएको छ।
अधिकारीहरूले यो साता विद्यालयहरू खुला गर्ने योजना तत्कालका लागि स्थगित गरेका छन्।
दक्षिण कोरियामा लकडाउन नगरेरै व्यापक मात्रामा परीक्षण र सङ्क्रमित व्यक्तिको सम्पर्कमा पुगेका अन्य व्यक्तिको पहिचान गरेर कोभिड-१९ महामारी नियन्त्रण गरिएको थियो।
तर समलिङ्गी समुदायका ग्राहकको आकर्षण बन्ने गरेका केही क्लबहरूका कारण पहिचानको काम थप जटिल बनेको छ।
सरकारले सोलस्थित नाइटक्लबसँग सम्बन्धित १०१ जनामा कोरोनाभाइरस भेटिएको जनाएको छ।
चीनमा १७ जना सङ्क्रमित भेटिएको भोलिपल्ट मङ्गलवार एक जनामा मात्र नयाँ सङ्क्रमण देखिएको छ।
त्यससँगै अब चीनमा सङ्क्रमण पुष्टि भएकाको सङ्ख्या ८२,९१९ पुगेको छ।
देशको राष्ट्रिय स्वास्थ्य आयोग (न्याश्नल हेल्थ कमिशन) ले बताएअनुसार 'इनर मङ्गोलिया' क्षेत्रमा फेला परेका ती नयाँ सङ्क्रमित बाहिरबाट आएका हुन्।
गत वर्ष पहिलो पटक कोरोनाभाइरस देखिएको वुहानमा पाँचजना नयाँ सङ्क्रमित भेटिएका हुन्। त्यसले सङ्क्रमणको दोस्रो लहरको डर उत्पन्न गरिदिएको छ।
यसअघि वुहानमा एक महिनायता नयाँ सङ्क्रमण देखिएको थिएन।
तस्बिर स्रोत, Getty Images
कोरोनाभाइरस र अन्य कीटाणुबाट जोगिन राम्ररी हात धुनुपर्छ। तर के हामीले हात धुने तरिका प्रभावकारी छ त?
हेर्नुहोस् बिरामी हुनबाट जोगिन कसरी हात धुनुपर्छ।
सोमवार एकै दिन सबैभन्दा धेरै सङ्क्रमण पुष्टि भएपछि नेपालमा सङ्क्रमितको कुल सङ्ख्या १३४ पुगेको छ।
सोमवार पुष्टि भएका २४ मध्ये २३ सङ्क्रमित प्रदेश नं ५ मा छन्। त्यहाँ सङ्क्रमितको कुल सङ्ख्या ५३ पुगेको छ।
बीबीसी न्यूज नेपालीले बनाएको प्रदेश अनुसारको अन्तर्क्रियात्मक नक्सा हेर्न यहाँ क्लिक गर्नुहोस्।
तस्बिर स्रोत, Getty Images
भारतमा सोमवार ४,२१३ जनामा कोभिड-१९ पुष्टि भएको छ।
यो सङ्ख्या दैनिक पुष्टि भएको अहिलेसम्मकै सर्वाधिक सङ्ख्या हो।
भारत सरकारका अनुसार देशभरि कोरोनाभाइरसबाट सङ्क्रमित व्यक्तिको सङ्ख्या ७०,००० नाघेको छ।
तीमध्ये झन्डै २१,००० जना निको भएका छन् भने २,२०६ जनाको मृत्यु भएको छ।
नेपाल सरकारले क्षेत्रगत रूपमा कोरोनाभाइरस सङ्क्रमणको जोखिमका आधारमा आन्तरिक रूपमा रेड (रातो), येलो (पहेँलो) र ग्रीन (हरियो) गरी तीन किसिमको क्षेत्रमा वर्गीकरण गरेको छ।
स्वास्थ्य सेवा विभागका महानिर्देशक महेन्द्रप्रसाद श्रेष्ठका अनुसार काठमाण्डू उपत्यका उच्च जोखिम अर्थात् रेड जोनमा छ।
अहिलेसम्म कुल तीन जनामा मात्रै सङ्क्रमण देखिएपनि किन काठमाण्डू उच्च जोखिममा परेको हो?
'मानिसहरूको आवागमन बाक्लो भएको र मानिसहरू लुकीछिपी धेरै भित्रिएकाले' उपत्यकालाई उच्च जोखिममा राखिएको महानिर्देशक श्रेष्ठको भनाइ छ।
रेड जोनमा परेका कारण यहाँ सार्वजनिक सवारी साधन र राष्ट्रिय तथा अन्तर्राष्ट्रिय उडान बन्द नै रहनेछन्।
काठमाण्डू उपत्यकामा बाहिरबाट मानिसहरू नआऊन् भनेर थप कडाइ गरिने र कोरोनाभाइरसको परीक्षण व्यापक बनाइने अधिकारीहरू बताउँछन्।
थप समाचार पढ्न यहाँ क्लिक गर्नुहोस्।
नमस्कार। बीबीसी न्यूज नेपालीमा तपाईँलाई स्वागत छ। विश्वभरि कोरोनाभाइरस सङ्क्रमणको स्थिति तथा सम्बन्धित अन्य विषयबारे हामी तपाईँलाई यो पेजमार्फत् जानकारी दिन्छौँ।
अहिलेसम्म कोरोनाभाइरसबाट विश्वभरि सङ्क्रमितको सङ्ख्या ४१ लाख ७५ भन्दा बढी पुगेको छ।
झन्डै १४ लाख मानिसहरू उपचारपछि निको भएका छन्।
जोन्स हप्किन्स विश्वविद्यालयका अनुसार विश्वभरि अहिलेसम्म झन्डै दुई लाख ८५ हजार जनाको मृत्यु भइसकेको छ।
हेर्नुहोस् यो अन्तर्क्रियात्मक नक्सामा।
