ब्रिटेनका राजकुमार एन्ड्रूको उपाधि खोसियो, उनका दुई छोरीको उपाधि यथावत्

ब्रिटेनका राजकुमार एन्ड्रूले आफ्नो 'राजकुमार' उपाधि गुमाउने भएका छन्।

एक नाबालिगलाई यौन व्यवसायमा लगाउन खोजेको आरोपमा दोषी ठहर भएका जेफ्री एप्स्टीनसँग घनिष्ठता भएको देखिएपछि छानबिनमा परेका उनले राजकीय आवास 'रोयल लज' पनि छाड्नुपर्ने भएको छ।

बकिङ्गम प्यालेसले बिहीवार बेलुका एक विज्ञप्ति जारी गर्दै राजा चार्ल्सका भाइ अब एन्ड्रू माउन्टब्याटन विन्ड्जर नामले मात्रै चिनिने जनाएको छ।

उनको निजी जीवनबारे अनेकौँ प्रश्न उठेपछि एन्ड्रूले 'ड्यूक अफ योर्क'सहितका अन्य राजकीय उपाधिहरू यसअघि नै परित्याग गरेका थिए।

यही महिनाको आरम्भमा प्रकाशित संस्मरणमूलक पुस्तकमा भर्जिनिया जूफ्रेले आफूले किशोरावस्थामा राजकुमार एन्ड्रूसँग तीन पटक यौन सम्बन्ध राखेको दाबी दोहोर्‍याएकी छन्। उक्त पुस्तक मरणोपरान्त प्रकाशित भएको हो। एन्ड्रूले उक्त आरोप सधैँ खण्डन गर्दै आएका छन्।

अहिले विकसित घटनाक्रमबारे प्रतिक्रिया व्यक्त गर्दै जूफ्रेको परिवारले उनले "आफ्नो सत्य र असाधारण आँटका कारण ब्रिटिश राजकुमारलाई उपाधिविहीन बनाएको" बताएको छ। जूफ्रेले यसै वर्षको आरम्भमा आत्महत्या गरेकी थिइन्।

बकिङ्गम प्यालेसले के भन्यो

आफ्नो विज्ञप्तिमा राजदरबारले राजाबाट "राजकुमार एन्ड्रूका राजकीय पद, उपाधि र सम्मानहरू हटाउने औपचारिक प्रक्रिया" सुरु भएको जनाएको छ।

उनको राजकीय उपाधिसँगै राजकीय आवास "छोड्नका लागि औपचारिक सूचना पनि दिइएको" दरबारले जनाएको छ।

उनी राजा चार्ल्सले किनिदिएको ठानिएको सान्ड्रिङ्गम इस्टेटस्थित निजी आवासमा सर्ने छन्।

एन्ड्रूले आफूमाथि लागेका आरोप अस्वीकार गर्दै आएका भए पनि यस्ता कारबाही आवश्यक भएको राजदरबारले जनाएको छ।

राजदरबारले "सबै प्रकारका दुर्व्यवहारका" पीडितमाथि आफ्नो साथ रहने जनाएको छ।

एन्ड्रूका दुई छोरी यूजनी र बीट्रिसको राजकुमारी उपाधि यथावत् रहने छ। एन्ड्रू अझै पनि राजसिंहासनको उत्तराधिकारीका लागि आठौँ स्थानमा हुने छन्।

उनकी पूर्व पत्नी सेअरा फर्गसन पनि राजकीय आवासबाट बाहिर सर्ने र उनले आफ्ना लागि बस्ने व्यवस्था आफैँ गर्ने बुझिएको छ।

यही महिनाको सुरुसम्म सेअराले आफ्नो 'डचेस अफ योर्क'को उपाधि प्रयोग गरिरहेकी थिइन्। तर एन्ड्रूले स्वेच्छाले 'ड्यूक अफ योर्क'को उपाधि प्रयोग गर्न छाडेपछि उनले पनि राजकीय उपाधि हटाएर आफ्नो पुरानै नाम फर्गसन प्रयोग गर्न थालेकी हुन्।

एन्ड्रूको राजकुमार उपाधि खोस्ने निर्णयमा सरकारसँग पनि परामर्श गरिएको र सरकारले यो निर्णयलाई स्पष्ट समर्थन गरेको बुझिएको छ।

यो समाचारबारे प्रतिक्रिया व्यक्त गर्दै संस्कृतिमन्त्री लीसा नन्दीले यो "ग्रूमिङ र यौन दुर्व्यवहारका पीडितहरूका लागि निकै शक्तिशाली सन्देश" भएको बताइन्।

"यो राजाले चालेको ठूलो कदम हो। प्रारम्भिक प्रतिक्रियामा म यति मात्रै भन्न सक्छु कि उनले चालेको कदमप्रति मेरो समर्थन छ।"

केही सातादेखि राजपरिवारमाथि एन्ड्रूका सन्दर्भमा ठूलो दबाव परेपछि अन्ततः उनले बाँकी राजकीय उपाधिहरू पनि गुमाएका हुन्।

जूफ्रेको संस्मरणमा यौन दुर्व्यवहारको आरोप प्रकाशित भएपछि राजकुमारको जेफ्री एप्स्टीनसँगको सम्बन्धको विषय पुनः बहसको विषय बनेको थियो।

एन्ड्रूले जूफ्रेसँग दुर्व्यवहार गरेको आरोप अस्वीकार गर्न निकै मेहनत गर्दै आएका छन्। एन्ड्रूले एप्स्टीनसँग आफ्नो सम्बन्ध पहिल्यै अन्त्य भएको दाबी गरेका थिए। तर फेरि बाहिरिएका सन् २०११ का इमेलहरूले उनी एप्स्टीनसँग सम्पर्कमा रहेको देखाए।

एन्ड्रूको जीवनशैलीको विषय पनि पछिल्लो समय चर्चाको विषय बनेको थियो। राजपरिवारमा कुनै कामको जिम्मेवारीमा नभए पनि उनले कसरी आफ्नो जीवनशैली व्यवस्थापन गरिरहेका छन् भन्नेबारे मानिसहरूले प्रश्न गरेका थिए।

एन्ड्रू सन् २००४ देखि रोयल लजमा बस्दै आएका थिए। यसको स्वामित्व 'क्राउन इस्टेट'सँग छ। उक्त स्वायत्त सम्पत्ति व्यवस्थापन कम्पनीसँग ७५ वर्षका लागि करार सम्झौता गरेर उनी त्यहाँ बस्न थालेका थिए।

विन्ड्जर स्टेटमा रहेको 'रोयल लज' दोस्रो श्रेणीको सूचीमा रहेको राजकीय आवास हो। गत साता मात्रै यसको भाडा सम्झौता बाहिरिएपछि उनले कसरी यस्तो महलमा बस्ने जीवनशैली धानिरहेका छन् भनेर प्रश्न उठेको थियो।

बीबीसीले हेरेको सम्झौतामा क्राउन इस्टेटसँग भएको करारअनुसार उनले अत्यन्त थोरै भाडा तिरे वा त्यो पनि नदिए हुने उल्लेख छ।

उक्त सहमतिको अर्थ वार्षिक भाडा तिर्नुको सट्टा राजकुमार एन्ड्रूले मर्मतसम्भार लगायतका कामका लागि एकमुस्ट ठूलो रकम तिर्दा पुग्थ्यो।

जेफ्री एप्स्टीन रोयल लजमा एन्ड्रूका पाहुना बनेर आएको विवरण पनि यसै साता सार्वजनिक भएको थियो।

राजकुमारी बीट्रिसको जन्मदिन मनाउन सन् २००६ मा एप्स्टीन त्यहाँ आएका थिए। त्यसको दुई महिनाअघि मात्रै उनलाई अमेरिकाले पक्राउपुर्जी जारी गरेको थियो। यसबारे सोधिएको प्रश्नमा एन्ड्रूले कुनै जबाफ दिएका छैनन्।

बीबीसी न्यूज नेपाली यूट्यूबमा पनि छ। हाम्रो च्यानल सब्स्क्राइब गर्न तथा प्रकाशित भिडिओहरू हेर्न यहाँ क्लिक गर्नुहोस्। तपाईँ फेसबुक, इन्स्टाग्राम र ट्विटरमा पनि हाम्रा सामग्री हेर्न सक्नुहुन्छ। अनि बीबीसी नेपाली सेवाको कार्यक्रम बेलुकी पौने नौ बजे रेडिओमा सोमवारदेखि शुक्रवारसम्म सुन्न सक्नुहुन्छ।