Uche Ekwunife ekeleela Gọvanọ Soludo na mmeri ya na ntuliaka ọkwa gọvanọ Anambra Steeti

Mkpuchi Na Eme Ozugbo

Uzoamaka Ewuzie, Ikechukwu Kalu, Michael Ngene, Chinonso Ugorji, Michael Ilediagu, Adline Okere, Marvelous Obomanu

1. 10 Nọvemba 2025Soludo, mụ na gị ga-arụkọ ọrụ maka ọdịmma ndị Anambara - Ezenwafor

   Onye ji ọkọlọtọ otu ndọrọndọrọ ọchịchị 'Peoples Democratic Party' (PDP) zọọ ọkwa gọvanọ n’Anambra Steeti ekweela nkwa na ya dị njikere isonye Gọvanọ Chukwuma Soludo rụkọọ ọrụ maka ọdịmma steeti ahụ.

   Ezenwafor, onye kwuru nke ọge ọ gwara ụlọmgbasa ozi Channels TV okwu n'ụbọchị Mọnde 10 Nọvamba, kwuru na ya na Gọvanọ Soludo na-enwe mmekọrịta dị mma mgbe niile.

   O kwuru n'ụtụtụ na-esote ụbọchị a kpọchara Soludo dịka onye meriri na ntuliaka ha mere ụbọchị Satọde 8 Nọvamba 2025 sị, “Enwere m ike inyere ya aka. Anọ m na-enyere ya aka mbụ; ọ bụ enyi m. Akpọtara m ya ọrụ n’Anambara.”

   “Eso m na ndị gwara Soludo ka ọ zọọ ọkwa ahụ n'oge mbụ m bụ onye enyemaka pụrụ iche nke Gọvanọ Willie Obiano.

   "Ọ bịara, o mere nke ọma mana ọ dịghịkwa onye zuru oke.”

   Cheta na nchekwa bụ isi okwu dị mkpa n'etiti ndị na-azọ ọkwa gọvanọ na ndị ọzọ nwere mmasị na ya n'oge ntuliaka ahụ.

   Mana Ezenwafor gara n’ihu kwuo: “Soludo na ndị otu nchekwa ya na-arụ ọrụ. Anyị nwere ndị isi ọrụ nchekwa ruru eru na Anambra.

   Aga m agwa Gọvanọ Soludo: Na ihe ha chọrọ bụ ngwa ọrụ ka mma, enweghị nchekwa ga-akwụsị.

   "Ekwere m na ọ ga-eme ihe karịrị ya."

   Akpọrọ m ya oku iji kelee ya, mana ọ bụrụ na ọ meghị nke ọma, m ga-ekwu okwu."

2. 10 Nọvemba 2025Sinetọ Uche Ekwunife ekeleela Gọvanọ Soludo na mmeri ya na ntuliaka ọkwa gọvanọ Anambra Steeti

   Sinetọ Uche Lilian Ekwunife ekeleela Gọvanọ Charles Soludo maka mmeri ya na ntuliaka ọkwa gọvanọ Anambra Steeti e mere n’ụbọchị Satọde 8 Nọvemba, 2025.

   Sinetọ Ekwunife onye ya na Nicholas Ukachukwu ji ọkọlọtọ pati APC zọọ ọkwa na ntuliaka ahụ, kelere Gọvanọ Soludo ma rịọ ya ka o jiri mmeri ya gbanwee ọnọdụ Anambra steeti ka ọkwanye mma.

   Ọ gara n’ihu kelekwa Nicholas Ukachukwu maka ohere o nyere ka ha zọkọọ ọkwa ahụ na pati APC.

   Sinetọ Ekwunife kelekwara ndị nyere ha nkwado na ntuliaka ahụ, ndị ọrụ achụmnta vootu ya nakwa ndị niile nyere ha nkwado n’ụdị dị iche iche ma rịọ ka onye ọbụla kawdo ọchịchị Gọvanọ Soludo iji hụ na Anambra steeti nwere ezi nchekwa, udo nakwa agamnihu.

3. 10 Nọvemba 2025Lee ihe ọtụtụ ndị zọrọ ọkwa gọvanọ n'Anambra na-ekwu ugbua

   Ndị ji ọkọrọtọ otu ndọrọ ndọrọ ọchịchị dị icheiche zọọ ọkwa gọvanọ n’Anambra steeti ekwuola ihe ha hụrụ banyere ntụliaka ahụ.

   Ọtụtụ n’ime ha katọrọ ihe niile mere, ebe ndị ọzọ kọwara ya dịka ịnapụ ndị mmadụ ikike ha nwere ịhọpụta ndị ga-achị ha.

   John Nwosu ji ọkọrọtọ African Democratic Congress (ADC) kwuru na ya anabataghị ntụliaka ahụ maka na e ji ego azụta vootu.

   Nwosu kwuru na a na-ere vootu bido na puku naịra atọ ruo na pupu naịra iri abụọ.

   O kwuru na ọ bụ ihe ihere dịrị ọchịchị onye kwuo uche ya na ndọrọndọrọ ọchịọchị na Naịjirịa.

   N'okwu ya “nke a bụ mmeri e ji ego zụta”.

   “Ọ bụghị naanị mpụtara ka e ji amara ezigbo ntụliaka, mana ọ bụ usoro e ji mee ya”.

   N’aka nke ọzọ, onye ji otu ndọrọndọrọ ọchịchị Lebọ patị zọọ ọkwa ahụ bụ George Moghalu kwuru na ihe mere ya ji hara imere n’ebe ya tụrụ vootu bụ maka na e nwere ndị na-azụ vootu ndị mmadụ.

   O kwuru na nke a mere na ọtụtụ ndị kwesiri ịtụnyere ya dabara n’ọwụwa ịnara ego maka oke agụụ dị n’obodo.

   Moghalu kwuru na ọ bụ ndị APGA kacha zụọ vootu.

   Onye ọzọ bụ Chioma Ifemeludike ji otu ndọrọndọrọ ọchịchị African Action Congress (AAC) tiri onwe ya aka n’obi ma kwuo na ya bụ “onye mmeri”.

   O kwuru nke a n’akara soshal mịdịa ya dịka e mechere ntụliaka ahụ ma kpọpụta Gọvanọ Chukwuma Soludo dịka onye meriri.

   Mana Ifemeludike kwuru na “mmadụ inwe ugwu na ndụ ya kachasị mma karịa nrụrụaka na awụwọ dị na ndọrọ ndọrọ ọchịchị”.

   Onye ozọ bụ Jude Ezenwafor ji ọkọlọtọ otu ndọrọ ndọrọ ọchịchị Peoples Democratic Party (PDP) zọọ ọkwa ahụ kwere nkwa na ya dị njikere isonye Gọvanọ Chukwuma Soludo rụkọọ ọrụ maka ọdịnma steeti ahụ.

   Ezenwafor, onye gwara ụlọmgbasa ozi mpaghara Channelstv okwu n'ụbọchị Mọnde 10 Nọvamba, kwuru na ya na Gọvanọ Soludo na-enwe mmekọrịta dị mma mgbe niile.

   “Enwere m ike inyere ya aka. A nọ m na-enyere ya aka mbụ, ọ bụ enyi m".

   “E so m na ndị gwara Soludo ka ọ zọọ ọkwa ahụ n'oge mbụ m bụ onye enyemaka pụrụ iche nke Gọvanọ Willie Obiano".

   Cheta na nchekwa bụ isi okwu dị mkpa n'etiti ndị na-azọ ọkwa gọvanọ na ndị ọzọ nwere mmasị na ya n'oge ntuliaka ahụ.

   Mana Jude Ezenwafor gara n’ihu kwuo: “Soludo na ndị otu nchekwa ya na-arụ ọrụ. Anyị nwere ndị isi ọrụ nchekwa ruru eru na Anambra.

   Cheta na ụlọọrụ na-ahụ maka ntụliaka bụ Independent National Electoral Commission (INEC) kwuru na Gọvanọ Chukwuma Soludo ji vootu 422,664 merie, ebe Nicholas Ukachukwu nke All Progressives Congress (APC) gbara onye nke abụọ dịka o wetere vootu 99,445.

4. 10 Nọvemba 2025Okwu nnabata Gọvanọ Soludo

   Nke a bụ mgbasaozi gọvanọ Chukwuma Soludo oge e kwupụtara ya dịka onye nwetara mmeri na ntuliaka gọvanọ Anambra steeti.

5. 10 Nọvemba 2025Ụmụ Igbo anyị ekele unu

   Nnọọ n'ọgbakọ BBC News Igbo taa bụ Mọnde, Nọvemba 10, 2025.

   Ka ụbọchị taa mịtara anyị niile mkpụrụ ọma.

   Biko, gaa n’ihu sonyere anyị dịka anyị na-ewetere gị akụkọ ihe na-eme Naịjirịa nakwa ụwa niile.

   Sonyekwara anyị n'akara soshal midịa anyị dị iche iche nke gụnyere WhatsApp Chanelụ, Facebook na Instagram maka akụkọ ndị ọzọ dị n'ụdị onyonyoo na foto.

   Ya gazie!

6. 9 Nọvemba 2025Ọ bụrụla eziokwu na APGA emeriela n'Anambra, ekele dịrị Gọvanọ Soludo - Bianca Ojukwu

   Bianca Odumegwu-Ojukwu bụ mịnịsta na-ahụ maka mmekọrịta Naịjirịa na mba ofesi ekenela ndị Anambra steeti nakwa Gọvanọ Chukwuma Soludo maka mmeri otu ndọrọ ndọrọ ọchịchị All Progressive Grand Allaince (APGA) meriri n’abalị garaaga.

   Dịka Bianca si kwuo “Ọ bụrụla eziokwu. APGA meriri na gọọmenti okpruruọchịchị iri na otu n’Anambra steeti”.

   “Nke a bụ ezigbo mmeri”.

   “A na m ekele ndị Anambra bụ ndị tụkwasịrị anyị obi nakwa Gọvanọ Chukwuma Soludo”

   “Ọ bụ onye chịrị nke ọma ka a na-asị chịa ọzọ”

   Bianca gara n’ihu kelee Chineke maka mmeri ahụ.

   Cheta na mmeri Gọvanọ Chukwuma Soludo meriri na ntụliaka gọvanọ ahụ e mere n'abalị garaaga nyere ya ohere ịchị steeti ahụ nke abụọ.

7. 9 Nọvemba 2025Onyeisiala Tinubu ekenela Gọvanọ Soludo maka i nweta mmeri ịchị Anambra Steeti nke abụọ

   Onyeisiala Bola Tinubu ekenela Gọvanọ Anambra Steeti bụ Chukwuma Soludo maka i meri ntụliaka gọvanọ nke nyere ya ohere ịchị ugboro abụọ.

   Tinubu n'akwụkwọ ozi ọnụ na-ekwuru ya bụ Bayo Onanuga kesere na soshal midia ka ọ kọwara i nweta mmeri ịchị Anambra nke abụọ Soludo nwetere dịka "erere sitere n'ịbụ ezigbo onye ndu".

   N'okwu ya "a na m ekele Ọkammụta Chukwuma Soludo na mmeri ntụliaka Gọvanọ Anambra Steeti nke abụọ”.

   "Mmeri a mere ya gọvanọ nke atọ n’Anambra steeti nwetere ohere ịchị steeti ahụ ugboro abụọ".

   Ọ gara n’ihu kelee ndị Anambra steeti, Independent National Electoral Commission (INEC) maka na ntuliaka ahụ gara “n’udo ma gaa nke ọma”.

   Ọ gara n’ihu gwa Soludo “ka o mee ka ya na ndị niile so ya zọọ ọkwa gọvanọ rụkọọ ọrụ”.

8. 9 Nọvemba 2025Lee okpuru ọchịchị ndị a kpọpụtagoro mpụtara ha na ntụliaka gọvanọ Anambra

   A kpọpụtala mpụtara ntuliaka ndị na-azọ ọkwa gọvanọ n’okpuru ọchịchị iri na itoolu dị na Anambra steeti.

   Mpụtara ụlọọrụ na-ahazi ntuliaka na steeti ahụ bụ Inec kpọpụtara na-egosi na otu ndọrọndọrọ ọchịchị na-achị steeti ahụ ugbua bụ otu All Progressives Grand Alliance (APGA) eturula ugo mmeri na ya bụ okpuru ọchịchị iri na itoolu ndị a kpọpụtagoro.

   Ụlọọrụ ahụ malitere ịkpọpụta mpụtara ahụ ka ọ kụrụ elekere abụọ nke isi ụtụtụ taata bụ Sọnde 9 Novemba 2025.

   Onye ji ọkwa Returning Officer ma bụrụkwa Vice Chancellor nke mahadum University of Benin bụ Professor Edoba Omoregie kpọpụtara ya bụ mpụtara ndị ahụ.

   Ka ọ dị ugbua ọkammụta Omorogie gwara ndi ntaakụkọ ka ha nwee ndidi ma chere mpụtara nke okpuru ọchichi abuọ bụ Anambra West na Ihiala.

   Okpuru ọchịchị ndị a kpọpụtara gụnyere:

   1. Dunukofia Lga

   2: Njikoka Lga

   3: Awka North

   4 Aguata

   5: Orumba South

   6: Orumba North

   7: Oyi Lga

   8: Anambra East

   9:Anyamelum

   10: Nnewi North

   11: Nnewi South

   12: Ogbaru

   13 Onitsha North

   14: Onitsha South

   15: Aniocha

   16: Idemmili North

   17: Ekwusigo

   19: Awka South

9. 9 Nọvemba 2025Ụtụtụ ọma, Igbo ndị ọma

   Nnọọ n'ọgbakọ BBC News Igbo taa bụ Sọnde 9 Nọvemba 2025.

   Ka ụbọchị taa mịtara anyị niile mkpụrụ ọma.

   Biko, gaa n’ihu sonyere anyị dịka anyị na-ewetere gị akụkọ ihe na-eme n'Anambra Steeti banyere mpụtara ntuliaka ndị na-azọ ọkwa gọvanọ.

   Sonyekwara anyị n'akara soshal midịa anyị dị iche iche nke gụnyere WhatsApp Chanelụ, Facebook na Instagram maka akụkọ ndị ọzọ dị n'ụdị onyonyoo na foto.

   Ya gazie!

10. 8 Nọvemba 2025EFCC anwuchiela mmadụ atọ maka ebubo ịzụ vootu n'Anambra

    Ụlọọrụ na-ebu agha megide mpụ na nrụrụakaego na Naịjirịa bụ Economic and Financial Crimes Commission (EFCC) kwuru na ha anwuchiela ndị a na-enyo enyo na ha ji ego azụkọrọ vootu ndị mmadụ.

    N'ozi ụlọọrụ EFCC bipụtara n'akara ọbaozi Facebook, ha kwuru na ndị ọrụ ha nwuchiri mmadụ atọ ahụ na mpaghara dị iche iche oge a na-ahazi ntuliaka gọvanọ n'Anambra steeti n'ụbọchị Satọde 8 Nọvemba, 2025.

    Dịka EFCC siri kwuo, mmadụ atọ ahụ a na-enyo enyo gụnyere Emeka Ilokasia a nwuchiri na Ward 2 n'okpuru ọchịchị Njikoka.

    Onye nke abụọ bụ Nwachukwu Loretta, a nwuchiri na Ward 2 (008) Awkuzu dị n'okpuru ọchịchị Oyi.

    Ha nwuchikwara onye nke atọ bụ Emeka Chukwudi n'obodo Umunachi dị n'okpuru ọchịchị Dunukọfịa.

    Ozi EFCC wepụtara kwuru na a ga-akpụpụ mmadụ atọ ahụ n'ụlọikpe ngwangwa e mechara nnyocha.

11. 8 Nọvemba 2025Lee ka mpụtara ntuliaka a si kwụrụ ugbua

    Dịka ntuliaka bịara na njedebe n'Anambra Steeti, ụlọọrụ Independent Nationala Electoral Commission (Inec) amalitela ịgbakọ vootu pati dị iche iche nwetere na ntuliaka ahụ.

    Pịa aka ebe ka ị hụ mpụtara a n'uju

12. 8 Nọvemba 2025Etu ọnọdụ dị n'ụfọdụ mpaghara Anambra steeti dịka e mechara ntuliaka

    Dịka ntuliaka bịara na njedebe n'ụfọdụ akụkụ Anambra steeti, ndị mmadụ amalitela ịgagharị.

    Onye ntaakụkọ BBC Igbo hụrụ ụfọdụ ụgbọala ndị na-agbagharị n'okporoụzọ nakwa ụfọdụ ụlọahịa ndị mepere emepe.

    Azụmaahịa ejirila nwayọ maliteghachi n'ahịa Eke Awka.

13. 8 Nọvemba 2025Gọvanọ Soludo ebola ebubo na e ji ego azụ vootu na Nnewi Saụt

    Gọvanọ Charles Soludo na-achị Anambra Steeti ebola ebubo na otu onye ya na ya na-azọ ntuliaka ahụ ji ego azụ vootu n'okpuru ọchịchị Nnewi Saụt nke steeti ahụ.

    Gọvanọ Soludo boro ebubo dịka ọ tụrụ vootu ya n'Ofiyi Square, Isuofia dị n'okpuru ọchịchị Aguata.

    O kwuru ndị ahụ na-enye ndị bịara ịtụ vootu puku naịra iri na ise iji mee ka ha tụọrọ pati ha vootu

    N'agbanyeghị nke a, Gọvanọ Soludo kwuru na o nwere olileanya na ya ga-enweta mmeri na ntuliaka ahụ.

14. 8 Nọvemba 2025A malitela ịgụ vootu n'ebe dị iche iche

    A malitela ịgụ vootu n'ebe dị iche iche ntuliaka bịara na njedebe.

    Ebe ndị a gụnyere polling unit 023 dị na Model Primary Health Care Center nakwa Polling Unit 019 dị n'Ụmụdimakasi dị n'obodo Amatutu Agulu dị n'okpuru ọchịchị Anaocha bụ ebe Peter Obi nọ tụọ vootu ya.

    Ebe ọzọ bụ Chime Hall dị n'Abagana nke okpuru ọchịchị Njkoka

15. 8 Nọvemba 2025Ụfọdụ ebe ntụliaka bịara na njedebe

    A tụchaala vootu n'ogige ntuliaka dị n'ụlọakwụkwọ Community Primary School Amawbia dị n'okpuru ọchịchị Awka-South.

    Ndị mmadụ na-echezi ka a gụkọọ vootu.

    A kwụsịkwala ịtụ vootu n'ogige ntuliaka 019 dị n'Ụmụdimakasi, Amatutu Agulu.

    Ndị ọrụ INEC na-akwado ịmalite ngụkọ vootu.

    A malitela ịchịkọta na ịgụkọ vootu n'ogige ntuliaka PU 023 dị na Model Primary Health Care Center, Amatutu Agulu dị n'okpuru ọchịchị Anaọcha n'Anambra steeti.

16. 8 Nọvemba 2025Gọvanọ Soludo atụọla vootu n'Isuọfịa

    Aka na-achị Anambra steeti bụ Chukwuma Soludo atụọla vootu dịka a na-eme ntuliaka ọkwa gọvanọ na steeti ahụ.

    Soludo tụrụ vootu n'ogige ntuliaka PU 002 dị n'Ofiyi Square, Isuofịa dị n'okpuru ọchịchị Agụata.

17. 8 Nọvemba 2025Ụfọdụ ndị a ma ama atụọla vootu

    Nicholas Ukachukwu ji ọkọlọtọ APC azọ ọkwa gọvanọ Anambra steeti atụọla vootu ya.

    Ukachukwu tụrụ vootu ya n'ogige ntuliaka PU 02 dị n'Umudimala Osumenyi n'okpuru ọchịchị Nnewi South.

    Peter Obi atụọla vootu nke ya n'ogige ntuliaka PU 019 dị n'Ụmụdimakasi, Amatutu Agulu.

    Nwaamadị a jiri aha Labour Party zọọ ọkwa onyeisiala Naịjirịa n'afọ 2023 kwara arịrị megide iji ego azụ vootu.

    Obi kọwara ndọrọndọrọ ọchịchị nke a na-eme ugbua n'Anambra steeti dika egwuregwu bọọlụ ligi nke mbụ.

    O kwuru na a ga-ahazi nnukwu ndọrọndọrọ ọchịchị n'oge na adịghị anya n'ụdị champions ligi.

18. 8 Nọvemba 2025Ihe ndị na-eme n'ụfọdụ ogige ntuliaka n'Anambra

    Mama Elizabeth Onike dị afọ iri itolu akwaala arịrị dịka ọ na-apụghị ịchọta akwụkwọ vootu ya bụ PVC n'ịchafụ Bekee.

    Nke a mere n'ogige ntuliaka PU 019 dị n'Ụmụdimakasi, Amatutu Agulu.

    Oge a jụrụ ya ma o debanyere aha n'ogige ntuliaka ahụ, o gosiri akwụkwọ vootu ya nke ochie ma kwuo na ọ bụ ebe ahụ ka ọ na-atụ vootu na ntuliaka ndị nke gara aga.

    Ọ rịọrọ ndị ọrụ INEC ka ha nyere nye ya ohere ịtụ vootu n'ihi na ya dị njikere ịhọpụta onye bụ ọchịchọ obi ya.

    Ndedibe David bụ nwaokoroọbịa dị afọ iri na itoolu.

    Ihe a bụ oge mbụ David na-atụ vootu. Ogige ntuliaka ya dị n'Umudimala, Osumenyi n'okpuru ọchịchị Nnewi South.

    O kwuru na obi dị ya ụtọ ịtụ vootu, ma gbaa ndị ntoroọbịa niile ume ka ha pụta tụọ vootu ha.

    Ndị nlereanya si mba ọzọ gụnyere Jim Okolo na Alex Nwankwo na-enyocha usoro ntuliaka n'ogige 002 dị n'Ofiyi Square, n'Isuofia dị n'okpuru ọchịchị Agụata.

19. 8 Nọvemba 2025Ụfọdụ ebe ndị a malitere ịtụ vootu n'Anambra steeti

    Nnyocha ndị ga-atụ vootu na ịtụ vootu amalitela n'ogige ntuliaka PU 023 dị na Model Primary Health Care Center, n'obodo Amatutu dị n'Agulu.

    O nweghị ndị uweojii maọbụ ndị nchekwa a hụrụla n'ogige a.

    A malitekwala ịtụ vootu n'ogige ntuliaka dị n'Utuh Central School, n'okpuru ọchịchị Nnewi South.

    Ịtụ vootu malitere mgbe ọ kụrụ ihe dịka elekere itoolu nke ụtụtụ, dịka ndị ọrụ INEC kwuru na ha tụrụ anya na ọ ga-akụrụ ọnụ mgbe ọ ga-eji ọkara gaa elekere abụọ nke ehihie.

    Onye a bụ Mama Ogochukwu dị afọ iri asatọ, onye obodo Utuh dị n'okpuru ọchịchị Nnewi South.

    O kwuru na ya malitere ịtụ vootu kemgbe afọ 1963.

    Ogochukwu pụtara ịtụ vootu mgbe ọ kụrụ ihe dịka elekere asaa nke ụtụtụ.

    E bidola ịtụ vootu n'ogige ntuliaka ndị e nwere Umudimala, Orsumenyi dị n'okpuru ọchịchị Nnewi South.

    Ọ bụ ebe ahụ ka a tụrụ anya na Nicholas Ukachukwu ji aha pati APC azọ ọkwa gọvanọ Anambra steeti ga-anọ tụọ vootu nke ya.

    Ọtụtụ ndị uweojii awụchiela n'ogige ntuliaka dị n'Ofiyi Square dị n'Isuofịa dịka a na-eche ka Gọvanọ Soludo bịa tụọ vootu ya.

20. 8 Nọvemba 2025A malitela ịtụ vootu n'Isuofia

    A malitela ịtụ vootu n'Ofiyi Square dị n'Isuofia.

    Ọ bụ n'ogige a ka a tụrụ anya na Gọvanọ Chukwuma Soludo bụ aka na-achị Anambra steeti ga-anọ tụọ vootu nke ya.