Nna m nwere nnukwu ihụnanya ebe ndị Naịjirịa nọ - Nana Hadiza Buhari

Mkpuchi Na Eme Ozugbo

Uzoamaka Ewuzie, Ikechukwu Kalu, Michael Ngene, Chinonso Ugorji, Michael Ilediagu, Adline Okere, Marvelous Obomanu

1. 18 Julaị 2025Nna m nwere nnukwu ihụnanya ebe ndị Naịjirịa nọ - Nana Hadiza Buhari

   Nana Hadiza Buhari gwara anyị na nna ya bụ Muhammadu Buhari nwere nnukwu ihunanya ebe ndị Naịjirịa nọ.

   Ọ gwara anyị nke a na mkparịtaụka anyị na ya nwere.

   Cheta na Muhammadu Buhari bụbu onyeisiala Naịjirịa nwụrụ n'ụbọchị Sọnde 13 Julaị, 2025 n'ụlọọgwụ Lọndọn dịka ọ gbara afọ 82.

   Buhari meriri ntuliaka ọkwa onyeisiala Naịjirịa e mere na 2015 na 2019.

   O nyefere ọkwa ọchịchị n'aka Bola Tinubu na Mee 29, 2023.

2. 18 Julaị 2025Ihe Buhari gwara m maka ịchị Naịjirịa - Peter Obi

   Lee ihe Peter Obi kwuru oge ọ gara mgbaru n'ụlọ Muhammadu Buhari dị na Daura Katsina Steeti.

   Cheta na ndị ndọrọndọrọ ọchịchị gunyere osote Onyeisiala Naịjirịa bụ Kashim Shettima, Peter Obi, Atiku Abubakar na Nasir El-Rufai gara njem mgbaru n'ụlọ Buhari iji tie ezinaụlọ ya aka n'obi.

3. 16 Julaị 2025Obi, Atiku, El Rufai na ndị ọzọ agaala zute ezinaụlọ Buhari

   Peter Obi ji aha Labour Pati zọọ okwa Onyeisiala Naịjirịa n'afọ 2023, ogbo ya nke PDP bụ Atiku Abubakar na onye chiburu dịka Gọvanọ Kaduna steeti bụ Nasir El-Rufai so na ndị gara mgbaru n'ụlọ Muhammadu Buhari bụbu onyeisiala Naịjirịa nwụrụ anwụ.

   Ha mere njem ahụ ịga tie ezinaụlọ Buhari aka n'obi maka maka ọnwụ ya dịka e lichara ya n'ụbọchị Tuzde 15 Julaị, 2025.

   Ọtụtụ ndị ọzọ a ma ama na ndọrọ ndọrọ ọchịchị gunyere osote Onyeisiala Naịjirịa bụ Kashim Shettima gakwara njem mgbaru ahụ.

   Ha niile sonyekwere n’ekpere 'Fidau' e mere maka ọnwụ Buhari n'ụlọ ya dị n'obodo Daụra, Kastina steeti.

   Muhammadu Buhari bụbu Onyeisiala Naịjirịa nwụrụ n’ụlọọgwụ dị na Lọndọn n’ụbọchọ Sọnde Julaị 13, 2025 mana e ntinyere ozu ya n’ala n’ụbọchị Tuzde.

4. 15 Julaị 2025E tinyela ozu Muhammadu Buhari bụbu Onyeisiala Naịjirịa n’ala

   Ozu onye bụbu Onyeisiala Naịjirịa bụ Muhammadu Buhari abanyela n’ime ala n’obodo ya bụ Daura, Kastina steeti.

   E tinyere Buhari n’ala ka e kpechere ya ekpere ọnwụ.

   Ndị ezinaụlọ ya, ndị ọnyị, ukwu na ibe nakwa ndị a maama bịara emmume olili ozu ya bịakwara leta ya ma sị ya gaa nke ọma.

   Buhari nwụrụ n’oge ọ dị naanị afọ 82 n’ụlọọgwụ dị na Lọndọn.

   Ọ bụ ndị agha bụ ihe bu akpatị ozu ya site mgbe ozu ya si Lọndọn bata Naịjirịa ma buga ya n’obodo ya bụ ebe e tinyere ozu ya n’ala.

5. 15 Julaị 2025Lee oge e bulatara ozu Muhammadu Buhari na Naịjirịa

   Onyeisiala Bola Tinubu nabatara ozu Muhammadu Buhari n'ọdụ ụgbọelu Umaru Musa Yar'adua dị na Katsina Steeti tupu e buru ya gawa n'obodo ya dị na Daura ebe a ga-eli ya.

6. 15 Julaị 2025E burula ozu Buhari gawa n’obodo ya Daura maka olili ya

   E burula ozu onye ahụ bụbu Onyeisiala NaịjirịaMuhammadu Buhari nwụrụ anwụ gawa obodo ya na Daura nke Kastina steeti ebe olili ya ga-eme.

   Akụkọ ụlọmgbasa ozi BBC nwetere kwuru na a ga-eburu ozu ya gawa n’obi eze Daura onye nke a mara dịka “Emir of Daura” bụ ebe a ga-ekpere ya ekpere tupu e buru ya gawa n’ụlọ ya, ebe a ga-eli ya.

   Cheta na e buru ozu ya ka emechara ya emume akwamozu steeti n’isi obodo Kastina, ebe ndị isi nchekwa Naịjirịa sonyere n’ibupụta ozu ya n’ụgbọelu si Lọndọn bubata ya na mba Naịjirịa wee duruo ya gawa n’ụgbọelu ọzọ ga-ebuga ya na Daura maka olili ya.

7. 15 Julaị 2025Ozu Muhammadu Buhari erutela Katsina Steeti

   Ozu Muhammadu Buhari erutela ọdọ ụgbọelu Umaru Musa Yar'adua Airport dị na Katsina Steeti.

   Osote onyeisiala Kashim Shettima so ụgbọelu ahụ buletara ozu Muhammadu Buhari maka olili ya n'obodo ya dị na Daura, Katsina Steeti.

   Onyeisiala Bola Tinubu nabatara ozu Muhammadu Buhari oge ụgbọelu ahụ bu ozu ya batara.

   Ka ọ dị ugbua, e bu ozy Muhammadu Buhari aga obodo ya dị na Daura ebe a ga-eli ya dịka usoro okpukperechi alakụba si kwu.

8. 15 Julaị 2025Ụfọdụ ndị a ma ama anwụchiela Katsina Steeti maka olili ozu Muhammadu Buhari

   Ọtụtụ ndị a ma ama na gọọmenti anwụchiela Katsina steeti iji kwanyere Muhammadu Buhari ugwu ikpeazụ.

   Ihe onyonyo minista na-ahụ maka mgbasaozi bụ Mohammed Idris wepụtara n'aka X ya, gosiri oge ya na minista ndị ọzọ rutere n'ọdọ ụgbọelu Katsina steeti dịka ha na-eche ozu Muhammadu Buhari.

   A ga-eli ozu Muhammadu Buhari n’obodo ya dị na Daura, Katsina steeti ụbọchị Tuzde Julaị 15, 2025 ma ọ kụọ elekere abụọ nke ehihe.

   Ozu ya hapụrụ Lọndọn n’ụtụtụ Tuzde 15 Julaị bịawa Naịjirịa. Onyeisiala Bola Tinubu ga-anabata ozu ya n’ogige ọdọ ụgbọelu Katsina steeti tupu e buga ya n’obodo ya bụ Daura ebe a ga-eli ya site n’usoro okpukperechi alakụba.

   Cheta na Onyeisiala Bola Tinubu hiwere out kọmiiti ga-ahụ maka nhazi olili ozu Muhammadu Buhari. Ndị out kọmiiti ahụ bụ:

   • Minista na-ahụ maka ego
   • Minista na-ahụ maka ego mmefu na nhazi
   • Minista na-ahụ maka nchekwa
   • Minista na-ahụ maka mgbasaozi
   • Minista na-ahụ maka ọrụ
   • Minista na-ahụ makai he na-eme n’ime obodo
   • Minista na-ahụ maka FCT
   • Minista na-ahụ maka ahụike
   • Minista na-ahụ maka omanaala
   • Onyeisi ndị uweojii nakwa ọtụụ ndị ọzọ.

   Iji kwanyere ugwu ikpeazụ zuruoke, gọọmenti etiti kwupụtara ụbọchị Tuzde 15 Julaị, 2025 dịka ụbọchị ezumike ọrụ maka olili ozu Muhammadu Buhari.

9. 15 Julaị 2025Ihe ndị bi na mpaghara ọwụwa anyanwụ Naịjirịa kwuru maka ọchịchị Muhammadu Buhari

   Ụfọdụ ndị bi na mpaghara ọwụwa anyanwụ Naịjirịa kwuru ihe ha chere maka ọchịchị Muhammadu Buhari bụbu onyeisiala Naịjirịa.

   Muhammadu Buhari nwụrụ ụbọchị Sọnde 13 Julaị, 2025 n'ụlọọgwụ Lọndọn dịka ọ gbara afo 82.

10. 15 Julaị 2025Lee ụbọchị ikpeazụ Muhammadu Buhari n'obi ọchịchị Aso Rock dịka Onyeisiala Naịjirịa

    Ihe onyonyo a Bashir Ahmed bụ onye ndụmọdụ Muhammadu Buhari na mgbasaozi wepụtara n'akara X ya, gosiri oge Muhammadu Buhari na-ahapụ obi ọchịchị Aso Rock, Abuja ụbọchị Sọnde Mee 28, 2023.

    Ọ bụ ụbọchị ahụ ka ọ hapụrụ obi ọchịchị Aso Rock dịka onyeisiala Naịjirịa.

    O nyefere ọkwa ọchịchị n'aka Bola Ahmed Tinubu ụbọchị Mọnde 29, Mee, 2025.

11. 15 Julaị 2025Ndị uweojii na ndị ọrụ nchekwa obodo ezigala puku ndị ọrụ na Kastina steeti maka olili ozu Buhari

    Ndị uweojii nke Kastina steeti kwuru na ha na ndị ọrụ nchekwa ndị ọzọ e jikọọla aka iziga ndị ọrụ nchekwa n’obodo Daura ya n’ebe ndị ọzọ na steeti ahụ maka olili ozu onye bụbu Onyeisiala Naịjirịa bụ Muhammadu Buhari nke e hibere n’ụbọchị taa bụ Tuzde 15 Julaị 2025.

    N’aka nke ọzọ, onyeisi ụlọọrụ na-ahụ maka nchekwa obodo na Naịjirịa, Nigeria Security and Civil Defence Corps (NSCDC) bụ Aminu Datti ekwupụtala na ụlọọrụ ahụ na-eziga ndị ọrụ mmadụ puku abụọ na narị asatọ na asaa n’ebe a na-eme olili ozu onye bụbu Onyeisiala nwụrụ anwụ.

    Dịka ụlọmgbasa ozi Channels tv siri kwuo, Datti kwuru na ụlọọrụ ahụ zigara ndị ọrụ ya na ebe dị iche iche n’obodo Daura nke gụnyere obodo onyeisiala ahụ nwụrụ anwụ, ọdụ ụgbọelu Umar Musa Yar’adua dị na Kastina, obi eze nke Kastina na nke Daura ya n’ebe ndị ọzọ dị oke mkpa.

    Ka ọ dị ugbua, ozu Muhammadu Buhari ahapụla Lọndọn bịawa Naịjirịa maka olili ya n’ehihie taa.

12. 15 Julaị 2025Ihe ụfọdụ gbara ọkpụrụkpụ banyere Muhammadu Buhari bụbu onyeisiala Naịjirịa

    Ụfọdụ maara Muhammadu Buhari dịka onye kwenyere n'eziokwu n'agbanyeghị na a na-ahụ ya dịka onye aka ike.

    Buhari zọrọ ọchịchị ị bụ Onyeisiala Naịjirịa ugboro atọ ma daa tupuu o merie n'afọ 2015 nke mere ya onye mbụ na-anọghị n'ọchịchị meriri gọọmenti nọ n'ọchịchị na Naịjirịa.

    N'afọ 2019 ka ọ zọkwara ọchịchị ma merie.

13. 15 Julaị 2025Ozu Muhammadu Buhari ahapụla Lọndọn bịawa Naịjirịa maka olili ya

    Ozi anyị na-eweta kwuru na ozu Muhammadu Buhari ahapụla Lọndọ bịawa Naịjirịa maka olili ya.

    Bashir Ahmed bụ onye ndụmọdụ Muhammadu Buhari kwuru na ndị so ozu ya eme njem a gụnyere osote onyeisiala bụ Kashim Shettima nakwa ndị ezinaụlọ Buhari.

    A na-atụ anya na Onyeisiala Bola Tinubu ga-anabata ozu Muhammadu Buhari n’ọdọ ụgbọelu Katsina steeti tupu e buru ya gawa n’obodo ya bụ Daura ebe a ga-eli ya dịka usoro okpukperechi alakụba siri kwu.

    Cheta na Muhammadu Buhari nwụrụ n'ụbọchị Sọnde 13 Julaị, 2025 n'ụlọọgwụ dị na Lọndọn dịka ọgbara afọ 82.