Bayanan juyin mulkin da suka yi nasara a Afirka cikin sama da shekara 70

Sabon yayi

Afirka ta fuskanci juyin mulki takwas da suka yi nasara cikin shekara uku da suka gabata. Yayin juyin mulki na baya-bayan nan da aka fuskanta na zuwa ne bayan da sojoji suka farfaɗo bayan shafe kusan shekara 20 rabonsu da yayin juyin mulkin, bayan yayinsa da suka yi a shekarun 1970.

Mutu-ka-raba

Wasu jagororin da suka ƙwace iko, sun yi mulki na gomman shekaru, yayin da wasu kuma aka tumɓuke su cikin kwanaki bayan kwace mulkin.

Juyin mulki a Yammacin Afirka da yankin Sahel

Mafi yawan ƙasashen yankin Sahel sun fuskanci juyin mulkin soji. Juyin mulki na baya-bayan nan a yankin shi ne wanda aka yi a Jamhuriyar Nijar da Gabon a 2023

Shugabannin soji sun kuma ƙwace mulki a Mali a 2020 da 2021 da Chadi da Guinea da Sudan a 2021. Burkina Faso ta fuskanci juyin mulki har sau biyu a 2022, Duka waɗannan ƙasashe rainon Faransa ne, in ban da Sudan.

Tun 2000, kashi uku cikin huɗu na juyin mulkin da suka samu nasara a Afirka sun auku ne a ƙasashe rainon Faransa. Hakan ya sa wasu ke aza ayar tambaya cewa ko tasirin Faransa a Afirka ne ke haddasa hakan.

Mafi yawan ƙasashen Yammacin Afirka da na Tsakiya sun fuskanci yawan juyin mulkin da ya yi nasara. Kusan rabin ƙasashen yankin 17 sun fuskanci aƙalla juyin mulki huɗu a Yammacin Afirka

Burkina Faso ce ta fi kowace ƙasa yawan juyin mulki a Afirka inda ta fuskanci takwas, daga nan sai Saliyo da Uganda masu bakwai kowannensu.

Kashi ɗaya cikin uku na ƙasashen Afirka, mafi yawancinsu daga Gabashi da Kudanci Afirka ne ba su taɓa fuskantar juyin mulkin da ya yi nasara ba

Mai shekara 34, a 2024, Ibrahim Traore ya kasance shugaban ƙasa mafi ƙanƙantar shekaru a duniya. Ya zama shugaban riƙon ƙwarya na Burkina Faso bayan da sojoji suka yi juyin mulki ranar 30 ga watan Satumban 2022, inda suka kifar da gwamnatin riƙon ƙwarya ta Paul-Henry Sandaogo Damiba.

Kwace mulki

Kusan kashi 90 na juyin mulkin da suka yi nasara a Afirka, sojoji ne suka yi, daga nan sai sojojin haya masu kashi huɗu. Sauran nau'ikan juyin mulki da ka yi a Afirka sun ha ɗa da boren fararen hula, mulkin mallaka, dakarun tawaye da juyin mulkin masarauta.

Gaba kura baya tsayaki

Mafi yawan shugabannin da suka karɓi mulki da ƙarfi, daga baya wasu ne ke hamɓarar da su, a wasu lokuta ma a kashe su