Abubuwan da ke faruwa a duniyar wasanni

Rahoto kai-tsaye

Umar Mikail

1. 20 Yuni 2025Lewis-Skelly ya amince da tsawaita zamansa a Arsenal

   

   Asalin hoton, Getty Images

   Ɗan wasan bayan Ingila, Myles Lewis-Skelly ya amince da tsawaita zamansa a Arsenal.

   Matashin mai shekara 18 ya amince da tsawaita zamansa a Gunners na zuwa nan da wasu shekaru masu zuwa.

   Tsawaita kwantiragin na zuwa ne bayan ɗan wasan ya haska a kakar wasa da ta gabata, bayan da ya buga wasa 39 a duka karawa.

   Ya fara taka wa Arsenal wasa ne a karawar da ƙungiyar ta yi da Manchester City a watan Satumba, daga nan an riƙa amfani da shi a a matsayin ɗanwasan baya daga hagu.

   Ƙoƙarin Lewis-Skelly ya sa ya samu shiga tawagar Ingila a karon farko a watan Maris, bayan da a baya ta taɓa bugawa tawagogin ƴanƙasa da shekara 16 da 19.

   Ya samu asarar zura ƙwallo a wasan da Ingila ta doke Albania da ci 2-0, lamarin da ya sa ya zama ɗan wasa mafi ƙarancin shekaru da ya zura ƙwallo a wasansa na farko a Ingila.

   Ƙoƙarin ɗan wasan ya sanya shiga jerin ƴantakarar gwarzon matashin ɗan wasan Premier na 2025, inda yake takarar tare da Morgan Rogers da Liam Delap da Dean Huijsen da Milos Kerkez da kuma Ethan Nwaneri.

2. 20 Yuni 2025Da alama Liverpool ta kammala ɗaukar Wirtz kan fam miliyan 116

   

   Asalin hoton, Getty Images

   Sayen Florian Wirtz da Liverpool ke son ke yi kan fam miliyan 116 na matakin ƙarshe.

   Nan da sa'o'i masu zuwa ake sa ran ɗan wasan tsakiyar na Bayer Leverkusen zai je Ingila domin a gwada lafiyarsa gabanin ayyana kammala ɗaukarsa.

   Ana sa ran kammala cika duka ƙa'idojin nan da sa'o'i 24.

   Idan cinikin ya kammala, ɗan wasan zai kasance mafi tsada da aka taɓa saya a gasar Premier.

   Kawo wannan ne ciniki mafi tsada da aka yi a kakar cinikin ƴan wasa ta bana.

3. 20 Yuni 2025Liverpool ta amince da ɗaukar Kerkez kan fam miliyan 40

   

   Asalin hoton, Getty Images

   Liverpool ta amince da ɗaukar ɗan wasan bayan Bournemouth, Milos Kerkez kan kuɗi fam miliyan 40.

   Ɗan hungary, mai shekara 21 zai koma Anfield ne bayan kaka biyu tare da Bournemouth.

   Tuni ƙungiyarsa ta ɗauki Adrien Truffert daga Rennes domin maye gurbinsa.

   Ɗaukar Kerkez da Liverpool ta yi na zuwa ne yayin da take dab da kammala ɗaukar ɗan wasan da ya fi kowa tsada a tarihin ƙungiyar, Florian Wirtz daga Bayer Leverkusen kan fam miliyan 116.

   Tuni dai Liverpool ta ɗauki ɗan wasan baya, Jeremie Frimpong daga ƙungiyar ta Jamus.

4. 19 Yuni 2025Nico Wiliams ya amince zai koma Barcelona

   

   Asalin hoton, EPA

   Barcelona ta cim ma yarjejeniya ta baki tare da ɗanwasan gaba na Athletic Bilbao Nico Williams, amma har yanzu akwai sauran aiki kafin ya zama ɗanwasanta.

   Ɗan ƙasar Sifaniyan da ya ci wa Bilbao ƙwallo 31 a wasa 67, ya ja hankalin ƙungiyoyi kamar Arsenal da Bayern Munich a wannan bazarar.

   Williams mai shekara 22 ya nuna amincewarsa da yarjejeniyar shekara shida, wadda za ta ba shi damar haɗewa da abokin wasansa a Sifaniya Lamine Yamal a filin wasa na Nou Camp.

   A farkon makon nan ne shugaban sashen wasanni na Barca, Deco, ya gana da Williams a Ibiza, inda a nan ne suka cim ma yarjejeniyar da baki.

   Tun da farko Barcelona ta nemi ɗaukar Luis Diaz daga Liverpool amma sai farashinsa na fan miliyan 80 da aka nema ya sa ta ja da baya.

   Sai dai farashin da ke cikin kwantaragin Williams bai wuce yuro miliyan 62 ba a Bilbao, wanda Barca take ganin za ta lalewa domin sayensa.

   Duk da yunƙurin nata, Barca na cikin halin matsi sosai a fannin kashe kuɗi.

5. 19 Yuni 2025An kwantar da Mbappe a asibiti

   

   Asalin hoton, Reuters

   An kwantar da ɗanwasan gaba na Real Madrid Kylian Mbappe a asibiti sakamakon rashin lafiyar da ta hana shi buga wasan farko a gasar kofin duniya ta Club World Cup da Al Hilal ranar Laraba.

   Mbappe mai shekara 26 bai yi atasaye ba a ranar Talata saboda zazzaɓi.

   Real Madrid ta bayyana a yau Alhamis cewa ana yi wa ɗanwasan na Faransa gwaje-gwaje da dama bayan ya yi ƙorafin fama da ciwon ciki.

   Wasan na Real da Al Hilal a Rukunin H ya tashi canjaras 1-1 kuma sai a ranar Lahadi za ta kara da Pachuca ta ƙasar Mexico a wasa na biyu na zagayen cikin rukuni.

6. 19 Yuni 2025Thomas Partey na shirin barin Arsenal

   

   Asalin hoton, PA Media

   Rahotonni daga birnin Landan na cewa ɗanwasan tsakiyar Arsenal da Ghana, Thomas Partey, na shirin barin ƙungiyar yayin da suka kasa cim ma matsaya a tattaunawarsa da kulob ɗin game da sabon kwantaragi.

   Kafar yaɗa labarai ta ESPN ta ce majiyoyi sun shaida mata cewa ba a tsammanin ɗanwasan mai shekara 32 zai sake ƙulla yarjejeniya da kulob ɗin na arewacin Landan.

   A ƙarshen watan nan na Yuni kwantaragin Partey zai ƙare, wanda ya koma Arsenal daga Atletico Madrid kan fan miliyan 45 shekara biyar da suka gabata.

   Tsohuwar Atletco da Barcelona da kuma wasu daga Turkiyya sun nuna sha'awar ɗaukar ɗanwasan.

7. 19 Yuni 2025Rawar da ƙungiyoyin Afirka suka taka zuwa yanzu a Club World Cup

   

   Asalin hoton, Reuters

   Yayin da aka kammala wasannin farko a zagayen cikin rukuni na gasar kofin duniya ta Club World Cup, rawar da ƙungiyoyi daga nahiyar Afirka suka taka ba ta yi kyau ba zuwa yanzu.

   Memolodi Sundowns ta Afirka ta Kudu, da Al Ahly ta Masar, da Wydad Casablanca ta Moroko, da Esperance ta Tunisia ne ke wakiltar nahiyar a gasar da aka faɗaɗa zuwa tawagogi 32.

   Al Ahly ce ta buɗe gasar da wasa tsakaninta da Inter Miami ta su Lionel Messi, inda suka tashi 0-0. Ana iya cewa ba yabo ba fallasa a wasan nasu.

   Sai kuma Esperance da ta sha kashi 2-0 a hannun Flamengo ta Brazil a Rukunin E ranar Talata, yayin da ita ma Wydad Casablanca ta sha kashin 2-0 a hannun Manchester City ta Ingila ranar Laraba.

   Memolodi Sundowns ce kaɗai ta samu nasara 1-0 a kan Ulsan HD ta Koriya ta Kudu ranar Laraba a wasansu na Rukunin F.

   Ko za mu ga sauyi nan gaba? Lokaci ne kawai zai bayyana hakan.

8. 19 Yuni 2025Club World Cup: Alonso ya fara da canjaras a Real Madrid

   

   Asalin hoton, Reuters

   Sabon mai horarwa Xabi Alonso ya fara da canjaras a wasansa na farko da ya ja ragamar Real Madrid a karawar da suka tashi 1-1 da Alhilal ta Saudiyya.

   Shi ne wasan farko a zagayen rukuni da suka fafata a birnin Miami na Amurka, inda Francisco Garcia ya fara ci wa Madrid ɗin ƙwallo tun a minti na 34.

   Ana dab da tafiya hutun rabin lokaci ne kuma Ruben Neves ya farke wa Al Hilal daga bugun finareti.

   Madrid da Al Hilal na cikin Rukunin H tare da Salzburg ta Austria da Pachuca ta Mexico, yayin da Salzburg ta ɗare saman teburin bayan doke Pachuca 1-0 tun da farko.

9. 19 Yuni 2025Barka

   Maraba da sake shigowa shafin labarai kai-tsaye na duniyar wasanni a ranar Alhamis tare da ni Umar Mikail.

   Ku biyo domin sanin yadda take kayawa a gasar kofin duniya ta kulbo-kullob da kuma kofin Gold Cup ta ƙasashen nahiyar Amurka.

10. 18 Yuni 2025Filippo Inzaghi ya karɓi aikin horar da Palermo

    

    Asalin hoton, Getty Images

    Ƙungiyar Palermo mai buga ƙaramar gasar firimiya ta Italiya ta naɗa tsohon tauraron wasa Filippo Inzaghi a matsayin kocinta.

    Inzaghi - wanda yayan tsohon kocin Inter Milan ne Simone Inzaghi - ya bar ƙungiyar Pisa bisa fahimtar juna duk da samun damar buga Serie A a bana da suka yi ƙarƙashin jagorancinsa.

    A jiya Talata ne Palermo ta sanar da naɗa tsohon ɗanwasan gaban na Italiya kan kwantaragin "shekaru da dama".

    Inzaghi mai shekara 51 ya shafe akasarin shekarun ƙwallonsa a Juvntus da AC Milan, inda ya ci kofin Serie A biyu da Champions League biyu a Milan ɗin, kuma yana cikin tawagar Italiya da ta ci Kofin Duniya a 2006.

    Yanzu babban aikin da ke gabansa shi ne dawo da Palermo babbar gasar Serie A bayan faɗuwa daga gasar tun 2017.

11. 18 Yuni 2025Barcelona ta ɗauki golan Espanyol Joan Garcia

    

    Asalin hoton, Getty Images

    Barcelona ta ɗauki mai tsaron raga Joan Garcia daga Espanyol bayan ta biya kuɗin da ke cikin yarjejeniyarsa da kulob ɗin na yuro miliyan 25.

    Matashin mai shekara 24 zai koma Barca ranar Juma'a a hukumance, inda zai saka hannu kan kwantaragin shekara shida.

    An sha alaƙanta Garcia da ƙungiyoyin Arsenal da Manchester United amma sai ya zaɓi ya ci gaba da zama a ƙasarsa Sifaniya.

    Ya buga wa Espanyol wasa 67 tun bayan shiga tawagarta a 2021. Sai dai bai fara buga wa Sifaniya wasa ba tukunna.

    Barca na son ta sama wa golanta Marc-Andre ter Stegen magaji, wanda ya shafe akasarin kakar da aka kammala a benci bayan ya ji rauni a watan Satumba.

12. 18 Yuni 2025Wolves na dab da kammala cinikin Lopez daga Celta Vigo

    

    Asalin hoton, EPA

    Ɗanwasan gaba na Chelta Vigo Fer Lopez na dab da kammala gwajin lafiya a yau Laraba domin komawa ƙungiyar Wolves ta Ingila kan fan miliyan 19.

    Ɗan shekara 21 ɗin zai zama ɗanwasan farko da mai horarwa Vitor Pereira ya saya a wannan bazarar.

    Wolves ta kwana biyu tana neman ɗanwasan tsakiya mai kai hari da zai iya buga lambobi da dama a gaban ƙungiyar.

    Ya fara buga wa Celta wasa a hukumance a watan Oktoban 2024 kuma zuwa yanzu ya buga 20 a dukkan gasanni tare da ci mata ƙwallo huɗu.

    Tuni Wolves ta sayar wa Manchester United Matheus Cunha da kuma Rayan Ait-Nouri ga Manchester City domin samun fan miliyan 100 a wannan bazarar.

13. 18 Yuni 2025Ramos ya ci wa Monterrey ƙwallo a wasa da Inter Milan

    

    Asalin hoton, Reuters

    Ƙwararren ɗanwasan baya Sergio Ramos ya ci wa kulob ɗinsa na Monterrey ƙwallo domin ba ta damar yin canjaeas 1-1 da Inter Milan a wasan farko na gasar kofin duniya ta Club World Cup.

    Ƙungiyar ta Mexico ce ta fara cin ƙwallo lokacin da Ramos mai shekara 39 ya murza ƙwallon da kansa zuwa cikin raga. Ya lahe kofin sau huɗu lokacin da yake taka wa Real Madrid leda.

    Wannan ne wasa na farko da Inter ta buga bayan kashin da ta sha 5-0 a hannun PSG a wasan ƙarshe na gasar Champions League, kuma shi ne wasan farko da sabon mai horarwa Christian Chivu ya jagorance ta.

    Inter ta farke ƙwallon ne kafin tafiya hutun rabin lokaci ta ƙafar tauraro kuma kyaftin ɗinta Lautaro Martinez.

    Inter da Monterry na Rukunin E tare da River Plate da Urawa Red Diamonds, inda Plate ɗin take mataki na ɗaya.

14. 18 Yuni 2025Jadawalin makon farko na sabuwar kakar Premier League

    Zakarun gasar Premier League ta Ingila Liverpool za su fara sabuwar kakar wasa ta 2025-26 da wasa tsakanisu da Bournemouth, inda Manchester United za ta fara karawa da Arsenal a filin wasa na Old Trafford.

    Liverpool da ta lashe gasar a kakar farko da mai horarwa Arne Slot ya kama aiki za ta fara ne a filin wasanta Anfield ranar Juma'a, 15 ga watan Agusta.

    Chelsea da Crystal Palace a ranar Lahadi, da kuma wasa mai zafi tsakanin Man Uinted da Arsenal.

    Ga jadawalin wasannin makon farko:

    Juma'a, 15 ga Agusta

    Liverpool v Bournemouth (20:00)

    Asabar, 16 ga Agusta

    Aston Villa v Newcastle (12:30)

    Brighton v Fulham (15:00)

    Nottingham Forest v Brentford (15:00)

    Sunderland v West Ham (15:00)

    Tottenham v Burnley (15:00)

    Wolverhampton Wanderers v Manchester City (17:30)

    Lahadi, 17 ga Agusta

    Chelsea v Crystal Palace (14:00)

    Manchester United v Arsenal (16:30)

    Litinin, 18 ga Agusta

    Leeds v Everton (20:00)

15. 18 Yuni 2025An fitar da jadawalin sabuwar kakar Premier League

    

    Asalin hoton, Getty Images

    Hukumar da ke kulka da gasar Premeir ta fitar da jadawalin gasar ta bana da za a fara ranar Juma'a 15 ga watan Agusta.

    Zakarun gasar, Liverpoool za ta fara kare kambin a gida da karawa da Bournemouth a ranar farko ta gasar a kakar wasa ta 2025/26, yayin da Manchester United za ta fara gasar da karawa da babbar abokiyar hamayyatarta Arsenal a filin wasa na Old Trafford.

    A bara Liverpool ce ta lashe gasar a kakar farko ta sabon kocin ƙungiyar, Arne Slot da maki 84, yayin da Arsenal ta ƙare a mataki na biyu da maki 74.

    Sabuwar ƙungiyar da ta hauro gasar a bana, Sunderland za ta fara gwada ƙarfinta a gasar a gida da karawa da West Ham.

    Zakarun gasar Championship, Leeds United za ta fara da karɓar baƙuncin Everton a ranar Litinin ta makon farko, yayin da Burnley da ita ma ta sake dawo gasar a bana za ta ziyarci zakarun gasar Europa Tottenham.

    Mancheste City kuwa - wadda ta ƙare kakar bara ba tare da kowane kofi ba - za ta fara ziyartar Wolverhampton Wanderers a filin wasa na Molineux.

    Za a buga wasa 380 a kakar gasar ta bana cikin mako 38, yayain da za a kammala gasar ranar 24 ga watan Mayun 2026.

16. 17 Yuni 2025Hukumar FA ta tuhumi alƙalin wasan da ya ci mutuncin Jurgen Klopp a kotu

    

    Asalin hoton, PA Media

    Hukumar ƙwallon ƙafa ta Ingila ta tuhumi tsohon alƙalin wasa na Premier League David Coote saboda kalaman da ya yi kan tsohon kociyan Liverpool Jurgen Klopp cikin wani bidiyo da aka yaɗa a shafukan sada zumunta.

    An dakatar da alƙalin wasan mai shekara 42 ne a watan Nuwamban 2024 bayan an gan shi a bidiyon yana yin kalaman ɓatanci kan kociyan ɗan ƙasar Jamus, kuma aka kore shi daga aikin gaba ɗaya wata ɗaya bayan gudanar da bincike.

    Yanzu hukumar Football Association ta tuhumi Coote game da karya tanadin doka na E3.1, wadda ta ce ya nuna ɗabi'ar da ba ta dace ba ko kuma ya yi amfani da kalaman da ba su dace ba.

    Sai dai kotun ta wanke shi daga laifukan yin caca ba bisa ƙa'ida ba bayan an zarge shi cewa ya yi magana kan bai wa wani ɗanwasa katin gargaɗi tun kafin lokacin wasan.

    Coote ya musanta zargin cacar yana mai cewa "ba su da tushe kuma na ɓata suna ne".

17. 17 Yuni 2025Arsenal na fatan kammala ɗaukar Zubimendi nan gaba kaɗan

    

    Asalin hoton, Getty Images

    Arsenal na fatan kammala cinikin mutumin da ta fi nema domin ƙarfafa tsakiyarta wato Martin Zubimendi.

    Ana kallon Zubimendi a matsayin 'yanwasan bayar da kariya a tsakiyar fili mafiya ƙwarewa a duniya yanzu haka, kuma ana sa ran zai koma Landan ne kan kuɗi fan miliyan 51 daga Real Socieded.

    Tun watan Janairu ake sa ran Arsenal za ta ƙulla yarjejeniyar.

    Ɗan ƙasar Sifaniyan mai shekara 26 ya ƙi amincewa da komawa Liverpool a kakar da ta gabata.

    Ana tunanin zai maye gurbin Thomas Partey ta yadda zai dinga buga wasa a tsakiyar filin wasa na Emirates tare da Decaln Rice da kuma Martin Odegaard.

18. 17 Yuni 2025Brighton ta ɗauki Diego Coppola daga Verona

    

    Asalin hoton, Getty Images

    Brighton ta kammala ɗaukar ɗanwasan Italiya da ƙungiyar Verona, Diego Coppola kan kuɗin da ba a bayyana ba.

    Ɗanƙwallon mai shekara 21 wanda ya buga wa Italiya wasa biyu, ya saka hannu kan kwantaragin shekara biyar.

    Ɗanwasn bayan ya fara taka wa Verona leda a 2021, bayan ya taso daga kwalejin horar da tamaula ta kulob ɗin.

    Ya buga mata wasa 81 tare da cin ƙwallo huɗu ciki har da biyu a kakar da ta gabata.

19. 17 Yuni 2025Antonio ya koma taka leda bayan jinyar hatsarin mota

    

    Asalin hoton, Reuters

    Ɗanwasan West Ham Michail Antonio ya koma taka leda tun bayan hatsarin mota a watan Disamba, inda ya shiga wasan da ƙasarsa Jamaica ta sha kashi 0-1 a hannun Guatemala a gasar Gold Cup da ake yi a Amurka.

    Ɗanwasan gaban mai shekara 35 ya kauce daga kan titi ne a motarsa ƙirar Ferrari kuma ya yi karo bishiya a Ingila.

    Ya karya ƙafa da kuma "karaya a sauran ƙasusuwa huɗu a jikinsa", wanda ya jawo yi masa tiyata d kuma jinya ta mako uku.

    A ranar 30 ga watan Yuni kwantaragin Antonio zai ƙare da West Ham amma har yanzu kulbo ɗin bai yanke shawara ba kan makomarsa.

    Ya koma West Ham ne daga Nottingham Forest a 2015 kuma shi ne mafi cin ƙwallaye a tarihin ƙungiyar a Premier da ƙwallo 68 cikin wasa 268.

20. 17 Yuni 2025Gobe za a fitar da jadawalin gasar Premier League

    

    Asalin hoton, Reuters

    A gobe Laraba za a fitar da jadawalin gasar Premier League ta Ingila.

    Wata ɗaya kenan tun daga lokacin da Liverpool ta jinjina kofin gasar ta 2024-25, kuma fitar da jadawalin na nufin fara shirye-shiryen shiga sabuwar kaka.

    Ƙungiyar Sunderland ta dawo gasar karon farko bayan kakar 2016-17 sakamakon nasarar cin wasan cike gurbi da ta yi.

    Ita kuwa gwarzuwar gasar Championship Leeds United ta dawo gasar ce bayan shekara biyu.

    Kulob ɗin Burnley ne cikon na ukun da ya hauro Premier bayan kaka ɗaya babu shi a cikinta, kuma wannan ne karo na tara da yake buga babbar gasar ta Ingila.