KAI TSAYE, Labaran wasannin BBC Hausa daga 26 ga Afirilu zuwa 1 ga watan Mayun 2026

Rahoto kai-tsaye

Mohammed Abdu da Haruna Kakangi

1. 30 Aprilu 2026Ashley Young ya sanar da yin ritaya daga taka leda, Premier League

   Tsohon ɗan wasan tawagar Ingila, Ashley Young ya sanar da yin ritaya daga buga ƙwallon ƙafa yana da shekaru 40.

   Young ya fara takal eda a Watford daga nan ya koma Aston Villa da Manchester United da Inter Milan da kuma Everton.

   Ya rataye takalmansa a Ipswich Town, bayan da ya koma ƙungiyar kan yarjejeniyar kaka ɗaya a watan Yulin 2025, bayan da yarjejeniyarsa ta karkare a Everton.

   Young ya fara buga wa Ingila wasa ne a watan Nuwamban 2007, kuma ya buga mata wasa 39 da cin ƙwallo bakwai.

   Ya fara zama kwararren ɗan wasa a Watford a 2003, sannan ya lashe Premier League da UEFA Europa League da FA Cup da EFL Cup tare da Manchester United, sannan ya ɗauki kofin Serie A a lokacin da yake Inter Milan.

   Ya buga wasa 13 kacal a Ipswich, inda 10 daga cikinsu ya shiga ne a matsayin canji.

2. 30 Aprilu 2026Lampard zai ja ragamar Coventry a Premier League - King, Premier League

   Mamallakin Coventry City, Doug King, har yanzu yana fata Frank Lampard zai jagoranci ƙungiyar zuwa kakar su ta farko a Premier League tun bayan shekara 25, duk da rade-radin da ke danganta shi da komawa Chelsea.

   Tsohon ɗan wasan tawagar Ingila ya jagoranci Coventry zuwa lashe Championship a kakarsa ta farko a matsayin cikaken koci, amma yana cikin sunayen da ake ambata a matsayin masu yiwuwar karɓar aikin a Stamford Bridge.

   Chelsea ta kori Liam Rosenior makon da ya gabata, watanni uku kacal bayan rattaba hannu kan kwantiragin shekara shida da rabi, kuma tana neman koci na biyar tun bayan da masu ƙungiyar BlueCo suka sayi Chelsea shekara huɗu da ta wuce.

   Lampard, wanda ya zura kwallaye 211 a Chelsea — shi ne kan gaba mafi yawan kwallaye a tarihinta — ya riga ya horar da ƙungiyar sau biyu: daga 2019 zuwa 2021, sannan kuma a matsayin rikon ƙwarya a 2023.

   Bayan wani lokaci da ya kasa yin abin azo a gani a Everton, sai ya koma Coventry a watan Nuwamba 2024, kuma a wannan kakar ya tabbatar da dawowar ƙungiyar zuwa matakin Premier League karon farko tun bayan faduwar su a 2001.

   Ba a sa ran yanke hukunci kafin ƙarshen kakar ba, inda Calum McFarlane zai ci gaba da jagorantar zuwa kammala kakar nan. Sai dai kungiyar tana duba yiwuwar tuntuar Xabi Alonso da Andoni Iraola da kuma Marco Silva, waɗanda dukkansu za ta iya samun ɗaya daga ciki, domin jan ragama daga kakar baɗi.

   Tsohon ɗan wasan Liverpool, Alonso, an kore shi daga Real Madrid a watan Janairu, yayin da Iraola ya tabbatar a farkon watan Afrilu cewa zai bar Bournemouth a wata mai zuwa.

   Kocin Fulham, Silva, kwantiraginsa zai ƙare a ƙarshen kakar nan, kuma bai tabbatar da cewa zai ci gaba da zama a Craven Cottage ba.

3. 30 Aprilu 2026, Daga Jaridu

   Mai yuwuwa Manchester United ta karkata ga dan wasan gaba na gefe Rafael Leao, mai shekara 26, dan Portugal a bazara, inda AC Milan take a shirye a yi maganar musaya da ita ta karbi Marcus Rashford, ko dan wasan tsakiya na Uruguay Manuel Ugarte mai shekara 25, ko Joshua Zirkzee, mai shekara 24, dan Netherlands. (La Gazzetta dello Sport)

   Crystal Palace ta fitar da jeri masu horad da 'yan wasa shida da za ta zaba domin maye gurbin Oliver Glasner a karshen kaka, kuma kocin Coventry Frank Lampard da na Ipswich Kieran McKenna na cikin wadanda take nazari. (Independent)

   Benfica ta sanya sunan kociyan Fulham Marco Silva, na Portugal mai shekara 48, a matsayin na gaba da zai maye gurbin Jose Mourinho, wanda shi kuma ake alakanta shi da sake komawa Real Madrid a kaka ta gaba. (Record)

   Manchester United ba ta son ta jefa kanta cikin dambarwar sayen dan wasan Nottingham Forest na tsakiya da Ingila, Elliot Anderson, mai shekara 23, wanda Manchester City, ma na sonshi kuma za ta iya karkata ga wasu 'yan wasan kamar su Carlos Baleba na Brighton da tawagar Kamaru Carlos Baleba. (ESPN)

   Newcastle na shirin yin garambawul a bazara, inda take duba yuwuwar sayen golan Faransa Robin Risser da golan Manchester City da Ingila James Trafford, mai shekara 23. (i paper)

4. 30 Aprilu 2026Watakila Arrascaeta ya buga wa Uruguay gasar kofin duniya, Fifa World Cup

   Ɗan wasan tawagar Uruguay, Giorgian de Arrascaeta, ya samu karaya a ƙashin wuya a wasan da Flamengo suka tashi 1-1 da Estudiantes a Copa Libertadores, lamarin da ya jawo damuwa kan ko zai iya buga FIFA World Cup a bana.

   Ɗan wasan mai shekaru 31, wanda ya koma ƙungiyar Brazil a 2019, ya ji rauni a wasan rukuni ranar Laraba, kuma dole aka maye gurbinsa.

   Flamengo mai rike dakofin, har yanzu suna kan gaba a rukuni da maki bakwai daga wasa uku.

   Uruguay za ta fara kamfen ɗinta a gasar cin kofin duniya ranar 15 ga watan Yuni da Saudi Arabia, wanda ke nufin Arrascaeta yana da mako shida kafin ya murmure ya buga wa kasarsa babbar gasar tamaula ta duniya.

5. 30 Aprilu 2026Parker ya bar Burnley bayan da ta faɗi daga Premier League, Premier League

   Burnley ta sanar cewa ta rabu da kociyanta, Scott Parker, bayan da suka cimma yarjejeniya a tsakaninsu.

   Parker ya dawo da Burnley matakin Premier League a bara, amma ƙungiyar ta lashe wasanni huɗu kacal a gasar lig a kakar nan, sannan ta fadi daga Premier League tun da sauran wasa huɗu-huɗu a kammala gasar bana.

   Parker ya maye gurbin Vincent Kompany a 2024, kuma ya dawo da ƙungiyar Premier League, bayan kakar da suka bayar da mamaki da haɗa maki 100 a EFL Championship.

   Bayan faduwarsu a kakar da ta gabata daga Premier League, an soki Burnley da buɗe wasa fiye da kima, Parker ya kawo salon wasa mai tsauri da tasre gida, wanda ya taimaka musu yin wasa 30 ba tre da ƙwallo ya shiga ragarsu ba.

   Sai dai wannan tsarin bai yi nasara ba a matakin Premier League, kuma Parker mai shekaru 45 ya bar ƙungiyar tana matsayi na 19 a teburi, da tazara maki 16 tsakaninta da mai matsayi na 17.

   Wannan shi ne karo na huɗu da tsohon ɗan wasan tawagar Ingila ke zama koci, bayan da ya jagorantar Fulham da Bournemouth da kuma Club Brugge.

6. 30 Aprilu 2026Pochettino na takaici kan halin da Tottenham ta tsinci kanta, Tottenham

   Mauricio Pochettino ya ce yana jin baƙin ciki sosai ganin tsohuwar ƙungiyarsa Tottenham na fafutukar kaucewa daga fauwa daga Premier League.

   Pochettino ya jagoranci ƙungiyar zuwa matsayi na biyu a lig a kakar 2016-17, sannan ya kai su wasan ƙarshe na UEFA Champions League a 2019, a cikin shekara biyar da ya yi a ƙungiyar Arewacin London.

   Amma yanzu halin ya sauya, inda Tottenham ke matsayi na 18 a kasan teburi da tazarar maki biyu kacal daga tsira, saura wasa huɗu a kammala kakar nan.

   Pochettino ya ambaci Sadio Mane da Georginio Wijnaldum a matsayin ƴan wasan da yake son saya, amma daga baya suka koma Liverpool, kuma suna cikin yan wasan da suka doke Tottenahm 2-0 a wasan ƙarshe a Champions League.

   Watanni biyar bayan wannan wasan ƙarshe, shugaba, Daniel Levy ya sallame shi bayan fara kasa kakar darashin nasara, inda Jose Mourinho ya maye gurbinsa.

   Bayan ɗan lokaci a Paris Saint-Germain, Pochettino ya dawo Premier League a matsayin kocin Chelsea a watan Mayun 2023.

   Amma bayan watanni 12 aka sallame shi, wanda ya kare a matsayi na shida a teburi — wani ɓangare na yawan sauye-sauyen koci da masu Chelsea, BlueCo ke yi, waɗanda suka kori Liam Rosenior bayan wasanni 23 kacal.

   Yanzu haka Pochettino na shirin jagorantar Amurka a gasar FIFA World Cup ta wannan bazara, inda za su karɓi bakuncin wasannin tare da Mexico da Canada. Duk da haka, mai shekaru 54 ya nuna yana son komawa aiki a Premier League a nan gaba.

7. 30 Aprilu 2026, Daga jaridu

   Kyaftin din Manchester United Bruno Fernandes, mai shekara 31, yana da damar a saye shi a kan fam miliyan 57 a kwantiraginsa, amma kuma kungiyar na da kwarin guiwa cewa idan har ta samnu tikitin buga gasar Zakarun Turai (Champions League), hakan zai iya sa ta shawo kan dan wasan na Portugal ya tsaya. (Mirror)

   Barcelona na ci gaba da kokarin ganin ta sayi dan wasan gaba na Atletico Madrid da Argentina Julian Alvarez, mai shekara 26, amma kuma Arsenal da Paris St-Germain sun ki su hakura da neman sayen tsohon dan wasan na Manchester City. (Teamtalk)

   Leeds United ta sake sabunta sha'awar da take yi wa dan wasan tsakiya na Sporting Hidemasa Morita, kuma ana ganin dan wasan na tawagar Japan mai shekara 30 zai iya yarda idan har kungiyar ta yi nasarar komawa gasar Firmiya. (Mail)

   Kila matsalar kudi ta sa Marseille sayar da dan wasanta na gaba na Ingila Mason Greenwood, mai shekara 24, - kuma Juventus a shirye take ta zare dan wasan duk da cewa Marseille na son akalla Yuro miliyan 50ne a kn dan wasan. (La Gazzetta dello Sport)

   Tuni Everton ta mika wa PSV tayin cewa tana son dan wasanta na gaba dan Bosnia da Herzegovina Esmir Bajraktarevic, mai shekara 21, a bazara. (SportSport )

8. 30 Aprilu 2026Mainoo ya tsawaita yarjejeniyarsa a Man United, Manchester United

   Kobbie Mainoo ya rattaba hannu kan sabon kwantiragi da Manchester United har zuwa shekarar 2031, wanda ya kawo ƙarshen watanni na rashin tabbas kan makomarsa.

   Mainoo, ɗan wasan tawagar Ingila mai shekaru 21, ya amince da tsohuwar yarjejeniya ne kafin ya shiga cikin babbar ƙungiya United a 2023, kuma za ta karkare a 2027, tare da zaɓin tsawaita masa kaka ɗaya da zarar ya ci gaba da taka rawar gani.

   Ya ci karo da koma baya a ƙarƙashin tsohon kocin United Ruben Amorim, wanda hakan ya sa ya nemi a bayar da shi aro zuwa Napoli a lokacin kasuwar cinikin ƴan ƙwallo a watan Janairu.

   Sai dai United ta ƙi wannan buƙata, tana mai nuna cewa tana daraja Mainoo kuma tana son ya ci gaba da zama a Old Tarfford.

   Tun bayan da aka kori Amorim a Janairu, Mainoo ya fara kusan dukkan wasa 12 a gasar lig ƙarƙashin kocin rikon ƙwarya Michael Carrick — inda wasa ɗaya ne bai yi ba a karawar da Leeds ta yi nasara 2-1 a Premier League saboda rauni.

9. 29 Aprilu 2026

   Akwai sauran kallo a Emirates.

   Amma dai a yadda aka tashi haka za a iya cewa Arsenal ta fi dama, ganin cewa wasa na gaba za a yi ne a gidanta.

   Haka nan kuma za a ci gaba da muhawara kan matakai biyu da alƙalin wasa ya ɗauka waɗanda ba su yi wa Arsenal daɗi ba.

   Na farko shi ne ana ganin cewa "fenaritin da aka bai wa Atletico bai cancanta ba", in ji Chris Sutton, tsohon ɗan wasan gaba mai yin sharhi kan wasanni a BBC Radio 5.

   Sannan kuma "Hancko ya taka ƙafar Eze, su kansu ba su ja da hakan ba," in ji Sutton.

10. 29 Aprilu 2026AN TASHI WASA!, Atletico Madrid 1-1 Arsenal

11. 29 Aprilu 2026Ƙarin lokaci, Atletico 1-1 Arsenal

    An yi ƙarin minti bakwai bayan cikar lokaci minti 90.

12. 29 Aprilu 2026, Atletico 1-1 Arsenal

    Arsenal ta yunƙuro tana ta kai kora.

13. 29 Aprilu 2026Canjin ɗan wasa, Atletico 1-1 Arsenal

    Atletico ta cire Johnny Cardoso ta saka Nahuel Molina.

14. 29 Aprilu 2026Canjin ɗan wasa, Atletico 1-1 Arsenal

    Arsenal ta cire Ben White ta saka Cristhian Mosquera.

15. 29 Aprilu 2026An soke fenariti, Atletico 1-1 Arsenal

    Wasa ya ci gaba bayan na'ura ta nuna cewa babu fenariti.

16. 29 Aprilu 2026VAR: Lafari zai kalli bidiyo don tantance gaskiyar fenariti, Atletico 1-1 Arsenal

17. 29 Aprilu 2026Fenariti: Arsenal ta samu fenariti, Atletico 1-1 Arsenal

18. 29 Aprilu 2026, Atletico 1-1 Arsenal

    Atletico ce ta fi shafa ƙwallo tun bayan da aka dawo daga hutun rabin lokaci.

    Ya kamata ta yi amfani da wannan dama.

19. 29 Aprilu 2026Arsenal ta sako Saka, Atletico 1-1 Arsenal

    Arsenal ta yi canjin ƴan wasa uku a lokaci ɗaya:

    An cire Gabriel Martinelli, Victor Gyokeres da Noni Madueke.

    An sako Leandro Trossard, Gabriel Jesus da Bukayo Saka.

20. 29 Aprilu 2026Atletico ta samu bugun ƙusurwa uku a lokaci ɗaya, Atletico 1-1 Arsenal

    Da alama Atletico ta matsa wa Arsenal lamba.

    Bayan wani mummunan hari da ta kai har ta bugi ƙarfen raga daga ƙarshe ƙwallon ta tafi waje aka yi bugun ƙusurwa na farko.

    David Raya ya sake tura ƙwallon waje, inda aka yi bugun ƙusurwa na biyu.

    Ƙwallon ta sake fita waje inda Atletico ta samu bugun ƙusurwa na uku, kafin daga nan Arsenal ta fitar da ƙwallon daga gidanta.