Labarin wasanni daga 1 zuwa 7 ga watan Nuwambar 2025

Rahoto kai-tsaye

Mohammed Abdu

1. 6 Nuwamba 2025Zambia ta naɗa tsohon ɗan wasanta, Moses Sichone sabon kociya

   Zambia ta naɗa tsohon mai tsaron bayanta, Moses Sichone a matakin sabon kociya da zai ja ragamar kasar a gasar cin kofin nahiyar Afirka da za a fara a cikin watan karshen shekarar nan

   An sanar da hakan ranar Alhamis, bayan da Avram Grant ya ajiye aikim a lokacin da za a fara wasannin cin kofin Afirka da za a yi a Morocco daga 21 ga watan Disamba.

   Sichone, mai shekara 48, ya buga gasar Bundesliga a FC Cologne da wakiltar Zambia karo uku a gasar kofin Afirka daga 1988 zuwa 2002.

   Tun a baya Sichone ne mataimakin Grant, zai kuma yi aikin tare da tsoffin ƴan ƙwallon Zambia da ya haɗa da Andrew Sinkala da kuma Percy Mutapa.

   Wasan farko da Sichone zai ja ragama, shi ne na sada zumunta da Afirka ta Kudu ranar 15 ga watan Nuwamba da kuma da Burundi kwana uku tsakani.

   Zambia tana rukunin farko a gasar cin kofin Afirka da za a fara daga 21 ga watan Disamba, inda za ta fuskanci tsibirin Comoros da Mali da mai masaukin baƙi, Morocco.

2. 6 Nuwamba 2025Genoa ta ɗauki Daniele De Rossi a matakin sabon kociyanta

   Genoa ta sanar da ɗaukar Daniele De Rossi a matakin sabon kociya, bayan raba gari da Patrick Vieira, kamar yadda ƙungiyar ta sanar ranar Alhamis.

   Genoa ta sallami Viera ɗan kasar Faransa, bayan kasa cin wasa da fara kakar nan daga ciki ya yi canjaras uku da shan kashi a karawa uku da hakan ya kai ƙungiyar kasan teburin Serie A.

   Domenico Criscito ne ya karɓi aikin riƙon kwarya da ta kai Genoa ta ci wasa a karon farko a kakar nan da ta doke Sassuolo 2-1, hakan ya sa ta yi sama a teburi zuwa mataki na 18.

   De Rossi mai shekara 42 ya karɓi aikin horar da Roma a cikin Janairun 2024, bayan da aka sallami Jose Mourinho.

   Ya kai Roma mataki na shida a teburin Serie A da wasan daf da karshe a Europa League daga nan ya saka hannu kan yarjejeniyar da za ta kare a karshen kakar 2027.

   Sai dai kuma an kore shi a cikin watan Satumba a shekarar nan, bayan kasa yin abin kirki da fara kakar nan, wasan karshe da ya yi shi ne 1-1 da Genoa.

   Wasan gaba da Genoa za ta buga shi ne da Fiorentina, wadda itama ke fuskantar kalubalen da ta kai ta sallami Stefano Pioli ranar Talata.

3. 6 Nuwamba 2025

   Real Madrid ta fice daga zawarcin ɗanwasan bayan Crystal Palace Marc Guehi, mai shekara 25, lamarin da ya bar ɗanwasan da zaɓi a tsakanin Liverpool da Bayern Munich. (AS - in Spanish)

   Ƙungiyoyin gasar firimiya da dama na bibiyar ɗanwasan bayan Feyenoord mai shekara 19, Givairo Read amma suna fuskantar ƙalubale daga Bayern Munich. (Teamtalk)

   Tottenham da Liverpool ƙoƙarin ɗauko ɗanwasan bayan Girka da Wolfsburg, Konstantinos Koulieraki, mai shekara 21. (TBR Football)

   Kocin Barcelona Hansi Flick ba shi da aniyar barin ƙungiyar a ƙarshen kakar wasan bana duk da rahotannin da ke cewa ya gaji da ƙungiyar kuma yana shirin sauya sheƙa.(Sky Germany - in German)

4. 6 Nuwamba 2025Crystal Palace ta bukaci a rage mata wasa a cikin watan Disamba

   Kociyan Crystal Palace, Oliver Glasner ya ce ya roki mahukuntan Premier League da su ɗage masu wani wasan a cikin watan Disamba, domin sun yi musu yawa.

   Tuni aka sanar da ɗage wasan Carabao Cup zagayen kwata fainal tsakanin Arsenal da Palace zuwa ranar 23 ga watan Disamba, kuma daya daga fafatawa takwas da aka tsara kungiyar Selhurst Park za ta yi a watan na gobe.

   Daga ciki har da ziyarta filin wasa na Emirates, kwana biyu tsakani bayan ta je ta buga fafatawa a Elland Road a karawa da Leeds United a Premier League.

   Kociyan Arsenal, Mikel Arteta ya ce shima zai bukaci a dage masa wasa da Everton a Premier League da aka tsara yi ranar 21 ga watan Disamba.

5. 6 Nuwamba 2025Faransa ta gayyaci Kante karon farko tun Nuwambar 2024

   Kociyan tawagar Faransa, Didier Deschamps ya gayyaci N'Golo Kante da Ronald Kolo Muani, domin buga wa kasar wasan neman shiga gasar kofin duniya da Ukraine da kuma Azerbaijan a watan nan.

   Sai dai kuma ɗan wasan Paris St Germain, Desire Doue da Ousmane Dembele na jinya.

   Ɗan ƙwallon Real Madrid, Aurelien Tchouameni, wanda bai buga wa kasar wasannin watan jiya ba, sakamakon hukuncin dakatarwa, yanzu yana jinya kamar yadda ƙungiyar Sifaniya ta sanar.

   Hakan ne ya sa Deschamps ya maye gurbinsa da ɗan wasan Al-Itihad, Kante, wanda rabon da ya yi wa Faransa tamaula tun Nuwambar 2024 a wasan Nations League da Israel, wanda ya yi ƙyaftin a ranar.

   Faransa, wadda ke jan ragamar rukuni na huɗu da maki 10 daga karawa huɗu za ta karɓi bakuncin Ukraine ranar 13 ga watan nan, kwana uku tsakani ta je Azerbaijan.

   Haka kuma kasar za ta iya samun tikitin gasar kofin duniya kai tsaye da za a yi a 2026 a Amurka da Canada da Mexico da zarar ta yi nasara a kan Ukraine ranar Alhamis.

6. 6 Nuwamba 2025

   Leeds na fuskantar turjiya a ƙoƙarin ta na ci gaba da riƙe mai tsaron ragar Ingila mai shekara 18 har baya watan Janairu saboda ƙungiyoyi da dama na zawarcin sa.(Caught Offside)

   Barcelona na fatan kammala sayen ɗanwasan Manchester United da Ingila mai shekara 28, Marcus Rashford, wanda ke zaman aro a wajen ta, amma ba za ta iya biyan farashin £25.5 da aka ƙaƙaba wa ɗanwasan gaban ba. (Fichajes - in Spanish)

   Juventus na shirin fara tattaunawa da ɗanwasan da Liverpool da Chelsea da kuma Arsenal ke zawarci, Kenan Yildiz, kuma tana fatan ɗanwasan gaban Turkiyyan mai shekara 20, zai ci gaba da takaleda a Turin. (Teamtalk)

   Roma are Za ta gabatar da tayin ɗaukar aron ɗanwasan gaban Manchester United da Netherlands mai shekara 24, Joshua Zirkzee a watan Janairu. (Fichajes - in Spanish)

7. 6 Nuwamba 2025Jabeur na sahun gaba kan batun a rage yawan wasannin tennis a kaka

   Tsohuwar garzuwar kwallon tennis, Ons Jabeur ta ce ta shige sahun gaba, kan neman sauyi a yawan wasannin da ake buga wa a kowacce kaka.

   An fara neman mafita kan buga wasanni da yawa da ta kai Naomi Osaka da Emma Raducanu da Daria Kasatkina da Elina Svitolina da Paula Badosa suka yanke shawarar yin hutu don kula da lafiyarsu.

   A tsarin kwallon tennis ya zama wajibi manyan yan wasa su shiga duk Grand Slams hudu da gasa 10 a WTA 1000 da shida a WTA 50, da zarar an samu matsalar halartan wasannin zai iya zama koma baya ga yan kwallon tennis a kakar.

8. 6 Nuwamba 2025fifa ta ƙirƙiri sabuwar ƙyautar karramawa da za ta fara a kofin duniya a 2026

   Hukumar kwallon kafa ta duniya, Fifa ta sanar da kirkirar sabuwar kyauta mai suna Fifa Peace Prize da za a fara bayarwa a gasar cin kofin duniya a badi.

   Ana sa ran raba jadawali a cikin watan Disamba a birnin Washington.

   Fifa ta ce ta kirkiro kyautar domin sakawa mutanen da suke yin ayyukan ban mamaki don zaman lafiya ta fannin taka leda.

   Za a buga gasar cin kofin duniya a Amurka da Canada da Mexico daga 11 ga watan Yuni zuwa 19 ga watan Yulin 2026 da za a yi gumurzun wasa 104 a filaye 16.

9. 6 Nuwamba 2025Me ya sa Alonso baya cin manyan wasa a Real Madrid?

   A karshen makon nan za a ci gaba da gasar La Liga, inda Real Madrid da Barcelona za su buga wasanninsu, bayan da karawar Champions League ba su samu sakamakon da suke bukata ba.

   Real Madrid, wadda take da maki 30 bayan wasan mako 11 tana matakin farko a kan teburi da tazarar biyar tsakani da Barcelona ta biyu.

   Sai dai kuma yawan sauya ƴan wasa 11 na farko da koci Xabi Alonso ke yi da rashin doke manyan ƙungiyoyi, har an fara korafi kan mai horarwar, wanda ke sa ran doke Rayo Vallecano a Estadio de Vallecas ranar Lahadi.

   Real ta yi rashin nasara 1-0 a hannun Liverpool a Champions League ranar Talata, inda mai tsaron raga ɗan kasar Belgium, Thibaut Courtois ya hana ƙwallaye da yawa su shiga raga.

   Duk da rashin nasarar da ƙungiyar Sifaniya ta yi a Anfield, tana kokari a babbar gasar tamaula ta Turai, bayan lashe wasa uku.

   Real Madrid ta yi nasara a kan Barcelona 2-1 a El Clasico a La Liga a Santiago Bernabeu.

   Alonso, wanda ya karɓi aiki dagaCarlo Ancelotti a watan Mayu, ya ci wasa 18 a Real Madrid daga karawa 21 a dukkan fafatawa.

   To sai dai rashin nasara da kociyan ya yi a hannun Paris St Germain da Atletico Madrid da kuma Liverpool da yawan canja ƴan wasa 11 da yake fuskantar wasanni na gaba kalubalen da yake fuskanta daga wasu magoya baya.

10. 5 Nuwamba 2025Wolves ba ta tuntuɓi Rui Vitoria ba kan aikin kociyanta

    An fahimci cewar ba a tuntuɓi tsohon kociyan Benfica, Rui Vitoria ba, kan batun horar da Wolverhampton.

    Wata majiya ce ta yi hasashen cewar mai shekara 55, wanda ya lashe babban kofin gasar Portugal biyu a Lisbon a 2016 da 2017, shi ne zai maye gurbin Vitor Pereira, wanda aka kora.

    Wolves ba ta ci wasa ba daga karawa 10 da fara Premier League a kakar nan ba, hakan ya sa take karshen tuburi - a cikin watan Satumba Pereira ya saka hannu kan yarjejeniyar ci gaba da aiki zuwa kaka uku a Molinuex.

    Ana kuma cewa watakila tsohon kociyan Manchester United, Erik ten Hag ne za a bai wa aiki, wanda Bayern Leverkusen ta kora a cikin Satumba.

    A ranar Litinin Garry O'Neill ya fice daga cikin masu zawarcin aikin, wanda Wolves ta sallama a Disambar bara.

    Maki biyu Wolves take da shi daga wasa 10 da fara Premier League ta kakar nan.

11. 5 Nuwamba 2025Ƴan PSG na yawan samun rauni, saboda yawan wasannin da suka buda a baɗi

    Ƴan ƙwallon Paris St German na yawan zuwa jinya a bana, sakamakon wasanni da yawa da suka buga a kakar da ta wuce.

    A 2024/25 PSG ta buga karawa 65 da lashe kofi huɗu da ya hada da na Champions League da Ligue 1 da French Cup da kuma Trophee des Champions da kai wa wasan karshe a Fifa Club World da Chelsea ta lashe.

    Ƙungiyar Faransa ta kammala fafatawar bara a cikin tsakiyar Yuli, sannan aka fara wasannin bana a farko-farkon Agusta.

    Waɗanda ke jinya a PSG kawo yanzu sun hada da Marquinhos da Joao Neves da Bradley Barcola da Desire Doue da Fabian Ruiz da Ousmane Dembele da kuma Achraf Hakimi da suka ji rauni a wasan da Bayern Munich ta doke PSG 2-1 a Champions League ranar Talata.

12. 5 Nuwamba 2025

    Real Madrid ta yanke shawarar sayar da ɗanwasan gaban Brazil mai shekara 25, Vinicius Jr a ƙarshen kakar wasan bana bayan fushin da ya nuna saboda an cire shi daga karawar ƙungiyar da Barcelona. (Bild - in German)

    Ɗanwasan gaban Brazil, Rodrygo na son barin Real Madrid a watan Janairu, kuma Arsenal da Tottenham na zawarcin ɗanwasan mai shekara 24. (Fichajes - in Spanish)

    Manchester United za ta raba gari da ɗanwasan gefen Ingila mai shekara 25, Jadon Sancho, wwanda ke zaman aro a Aston Villa, kuma a kyauta ɗanwasan zai sauya sheƙa. (Talksport)

    Roma na shirin shiga cinikin ɗanwasan gaban Manchester United da Netherland mai shekara 24, Joshua Zirkzee a watan Janairu. (Calcio Mercato - in Italian)

    Ɗanwasan bayan Inter Milan da Jamus mai shekara 24, Yann Bisseck, na shirin komawa taka leda a Ingila, inda West Ham da Tottenham ke bibiyar shi. (Gazzetta dello Sport - in Italian)

    Crystal Palace da Inter Milan da kuma Juventus za su fafata wajen neman sayen ɗanwasan bayan Manchester City da Netherlands mai shekara 30, Nathan Ake a watan Janairu.

13. 5 Nuwamba 2025An fara shari'ar da ta shafi Marinakis tare da magoya bayan ƙwallon kafa

    A ranar Laraba ne aka fara shari'ar shugaban kungiyar Olympiacos ta Girka, Evangelos Marinakis da dimbin magoya bayan tamaula a kasar Girka.

    Shari'ar da ta fi kowacce girma da ke da alaka da tashe-tashen hankula masu nasaba da wasanni da mahukuntan kasar suka sha alwashin murkushe su.

    Magoya baya 142 na fuskantar tuhuma kan gudanar da ƙungiyar mai aikata laifuka da haifar da abubuwa masu fashewa masu barazana ga rayuwa a fannin wasannin. Tuni dai sun musanta aikata ba daidai ba.

    Marinakis, attajiri wanda kuma ya mallaki Nottingham Forest mai buga gasar Premier ta Ingila, da kuma wasu mambobi, ana tuhumar su da goyon bayan kungiyar da ake zargi da aikata laifuka a cikin 2019 zuwa 2024 da kuma tayar da hankali tare da kalaman ɓatanci kan hukumomi.

    Dukkansu sun yi watsi da tuhume-tuhumen da cewa ba shi da tushe.

    Marinakis bai halarta zaman kotun ba da aka yi a babban gidan yarin Korydallos na Athens a ranar Laraba inda lauyansa ya wakilce shi.

14. 5 Nuwamba 2025

    Ɗanwasan bayan Netherlands, Virgil van Dijk ya yi tunanin komawa Real Madrid a farkon kakar wasan bana, amma daga baya mai shekara 34 ya sanya hannu kan sabuwar kwangila da Liverpool (AS - in Spanish)

    Everton ba za ta sayar da ɗanwasan bayan Ingila da aka yankewa farashin £70m, Jarrad Branthwaite a watan Janairu ba, duk da sha'awar da Manchester United ke yi wa ɗanwasan mai shekara 23. (Teamtalk)

    Tsohon kocin Manchester United, Erik ten Hag na cikin waɗanda ake sa ran su zamo kocin Wolves. (ESPN)

15. 5 Nuwamba 2025Potter ya gayyaci Alexander Isak duk da yana jinya

    Sabon kociyan, Sweden, Graham Potter ya mika goron gayyata da Alexander Isak a wasan neman shiga gasar kofin duniya da za su kara a watan nan, amma ba a kira ɗan wasan Arsenal, Viktor Gyokeres ba.

    Potter, tsohon kociyan West Ham ya karɓi aikin horar da Sweden a watan jiya, wanda aka ɗorawa alhakin kai tawagar gasar kofin duniya da za a yi a 2026 a Amurka da Canada da kuma Mexico.

    Sweden tana ta karshe a teburi na biyu da maki ɗaya, bayan wasa huɗu kenan ba za ta samu gurbi ba kai tsaye, sai dai ta kai karawar cike gurbi idan ta saka ƙwazo a sauran wasannin da suka rage.

    Isak, wanda ya koma Liverpool a cikin watan Satumba, bai buga tamaula ba tun bayan da ƙungiyar Anfield ta caskara Eintracht Frankfurt 5-1 a Champions League, kenan bai yi wasa huɗu ba a dukkan fafatawa sakamakon jinya.

    Ƴan wasan tawagar Sweden da aka gayyata:

    Masu tsare raga: Viktor Johansson, Kristoffer Nordfeldt, Noel Törnqvist, Jacob Widell Zetterstrom

    Masu tsare baya: Gabriel Gudmundsson, Isak Hien, Emil Holm, Gustaf Lagerbielke, Victor Lindelof, Ken Sema, Carl Starfelt, Daniel Svensson

    Masu buga tsakiya da gurbin cin ƙwallo: Taha Ali, Yasin Ayari, Roony Bardghji, Lucas Bergvall, Alexander Bernhardsson, Anthony Elanga, Alexander Isak, Jesper Karlstrom, Hugo Larsson, Isac Lidberg, Gustav Lundgren, Benjamin Nygren, Mattias Svanberg, Besfort Zeneli

16. 5 Nuwamba 2025United za ta tara wa Amorim ƴan wasa masu ƙyau da gogewa

    Daraktan wasanni na Manchester United, Jason Wilcox ya ce za su ci gaba da tara wa Ruben Amorim ƴan ƙwallo masu ƙyau da gogewa, domin ƙungiyar ta koma kan ganiya.

    United ta kare a mataki na 15 a Premier League a bara, mataki mafi muni tun bayan 1974, sannan ta kasa lashe Europa League, bayan da Tottenham ta doke ta 1-0.

    Tun daga lokacin ƙungiyar Old Trafford take ta faɗi tashi wajen mayar da ita kan ganiya - hakan ya sa Alejandro Garnacho da Marcus Rashford suka bar United, yayin da ta sayo Matheus Cunha da Bryan Mbeumo da Benjamin Sesko da kuma mai tsaron raga, Senne Lammens.

    Yanzu haka United tana ta takwas a kan teburin babbar gasar tamaula ta Ingila da tazarar maki biyu tsakanin da Manchester City, wadda take ta biyun teburin.

    Ranar Asabar United za ta je Tottenham, domin buga wasan mako na 11 a Premier League.

17. 5 Nuwamba 2025Arsenal na kishirwar yin bajinta a kakar nan - Arteta

    Mikel Arteta ya ce ƴan wasan Arsenal na kishirwar yin abin kirki a gasar bana, bayan da ƙungiyar ta je ta doke Slavia Prague 3-0 a Champions League ranar Talata.

    Arsenal ta yi nasara ta 10 a jere a dukkan fafatawa, kuma wasa na huɗu a jere da ta lashe a Champions League, kenan ta zama ta farko a Ingila da ta yi nasara huɗu a jere da fara gasar ta zakarun Turai kamar yadda ta taɓa yi a 1969/70.

    Haka kuma karo na takwas da Gunners ta yi wasa ba tare da ƙwallo ya shiga ragarta ba a dukkan fafatawa, irin bajintar da ta yi a 1903.

    Arsenal ta saka ɗan wasa Max Dowman a karawar ta Champions, ya kafa tarihin matashin da ya buga fafatawar mai shekara 15 da kwana 308.

    Mai tarihin a baya shi ne Youssoufa Moukoko lokacin da Borussia Dortmund ta saka shi a wasa da Zenit mai shekara 16 da kwana 18.

    Arsenal tana matakin farko a kan teburin Premier League da maki 25, ranar Asabar Gunners za ta ziyarci Sunderland a wasan mako na 11 a babbar gasar tamaula ta Ingila.

18. 4 Nuwamba 2025Ronaldo zai yi ritaya kwanan nan, kuma ana sa ran zai sharɓi kuka a ranar

    Cristiano Ronaldona na shirin yin ritaya kwanan nan, an kuma yi hasasahen zai sharɓi kuka a ranar idan ta zo.

    Mai shekara 40 ɗan ƙwallon tawagar Portugal mai taka leda a Al Nassr ta Saudiyya, wanda ya ci ƙwallo 952 ya tattauna da Piers Morgan.

    Da aka tambaye shi kan ko yaushe zai yi ritaya sai ya ce ''Kwanan nan, amma dole sai na shiryawa ranar, domin zan sha kuka ni na san kaina''.

    Ronaldo, wanda ya bar Manchester United karo na biyu a 2022, har yanzu ƙungiyar Old Trafford na fama da kalubale karkashin ɗan kasar Portugal Ruben Amorim.

    Tsohon ɗan wasan Real Madrid da Juventus mai ballon d'Or biyar, wanda ya ci ƙwallo 102 a wasa 115 a babbar gasar tamaula ta Saudiyya ya ce Amorim yana iya kokarinsa, amma magoya baya kada su yi tsammanin za a koma kan ganiya nan take.

    Haka kuma Ronaldo ya ce har yanzu yana ƙaunar United a zuciyarsa.

19. 4 Nuwamba 2025

    Chelsea da Manchester United na sha'awar sayen ɗan wasan gaban Brazil Vitor Roque, mai shekara 20, daga Palmeiras. (Mundo Deportivo)

    Tsohon kocin Manchester United Erik ten Hag yana cikin ƴan takarar da Wolves ke zawarci domin maye maye gurbin Vitor Pereira a matsayin kocinta. (Athletic)

    Ɗan wasan tsakiya na ƙasar Sifaniya Oriol Romeu, mai shekara 34, zai koma tsohuwar ƙungiyarsa Southampton bayan ya soke kwantiraginsa da Barcelona. (Sport)

    Ɗan wasan Canada Jonathan David, mai shekara 25, zai iya komawa Tottenham ko Bayern Munich a watan Janairu bayan ya yi fama da rashin tagomashi a Juventus tun lokacin da ya koma kulob ɗin na Serie A a bazarar da ta gabata. (Sky Sports)

    A yanzu dai tsohon kocin Roma Daniele de Rossi ne ke kan gaba a jerin sunayen waɗanda za su iya karɓar ragamar horas da Genoa, bayan sallamar Patrick Vieira da aka yi a ƙarshen makon da ya gabata. (Football Italia)

20. 4 Nuwamba 2025Ɗan wasan da ya fi muhimmanci a kowace ƙungiya a Gasar Premier

    "Ba za mu samu wanda zai maye gurbinsa ba," kamar yadda Pep Guardiola ya faɗa kwana ɗaya gabanin Sergio Aguero ya buga wasansa na ƙarshe a ƙungiyar Manchester City.

    Bayan shekara huɗu, ko za a iya cewa City ta samu wani dodon raga mai ƙwazo da karsashi da ƙoshin lafiya?

    "Idan babu shi, gaskiya za mu sha wahala," kamar yadda Guardiola ya fada bayan Haaland ya zura ƙwallo biyu da suka taimaka wa City ta doke Bournemouth 3-1 ranar Lahadi.

    Ba kowace ƙungiya ce za ta iya bugun gaba ta ce tana da dodon raga kamar Haaland ba, sai dai kowace ƙungiya na da ɗan wasa ɗaya wanda ba za ta taɓa so a zo wasa babu shi ba - ko dai saboda iya jagorancinsa ko iya tsarawa ko kuma sauya yadda wasa ke gudana.

    Latsa nan domin ci gaba da karanta labarin