You’re viewing a text-only version of this website that uses less data. View the main version of the website including all images and videos.
મહારાષ્ટ્ર અને હરિયાણાની સાથે 16 રાજ્યોની 51 બેઠકોની પેટાચૂંટણીનાં પરિણામો જાહેર
રાતના 10.30 વાગ્યા સુધી મળેલી માહિતી અનુસાર મહારાષ્ટ્રમાં ભાજપ અને તેમના સહયોગીઓને 163 બેઠકો મળી રહી છે.
જ્યારે કૉંગ્રેસ અને તેમના સહયોગીઓને 98 બેઠકો તેમજ અન્યને 27 બેઠકો મળી રહી છે.
તેમજ હરિયાણા વિધાનસભામાં ભાજપને 40 બેઠકો મળી રહી છે, કૉંગ્રેસને 31 બેઠકો જ્યારે અન્યને 19 બેઠકો મળી રહી છે.
મોદીએ ચૂંટણી પરિણામો પર બોલતા કહ્યું કે દિવાળીની શરૂઆત થતાં પહેલાં જ મહારાષ્ટ્ર અને હરિયાણાની જનતાએ ભાજપ અને અમારા સાથીઓ અંગે જે વિશ્વાસ બતાવ્યો છે તે માટે તેમને અભિનંદન.
મહારાષ્ટ્ર અને હરિયાણા ભાજપના પદાધિકારીઓ અને કાર્યકર્તાઓએ પણ અથાગ પ્રયત્ન કર્યો. તેમને પણ અભિનંદન.
મહારાષ્ટ્ર અને હરિયાણામાં મુખ્ય મંત્રી તરીકે દેવેન્દ્રજી અને મનોહરલાલનો પણ પ્રથમ અનુભવ. આ બંને લોકો ક્યારેય મંત્રી પણ રહ્યા નથી.
મહારાષ્ટ્રમાં ગત ચૂંટણીમાં પૂર્ણ બહુમત નહોતો મળ્યો, હરિયાણામાં બે બેઠકોની બહુમતી હતી. તેમ છતાં બંનેએ બધાને સાથે લઈને રાજ્યોની સેવા કરી.
જે રાજકીય પંડિતો આજે ચૂંટણીનું વિશ્લેષણ કરી રહ્યા છે, હરિયાણામાં એક અભૂતપૂર્વ વિજય થયો છે. એટલા માટે કેમ કે એક સરકાર પાંચ વર્ષનો કાર્યકાળ જીતીને ફરી આવે તેવું ઓછું બને છે.
આવા સમયે સૌથી મોટા પક્ષ તરીકે ફરીથી ચૂંટાવું તે મોટી વાત છે.
જે લોકો હરિયાણાની રાજનીતિ જાણે છે તેમને ખબર છે, મેં ત્યાં વર્ષો સુધી કામ કર્યું છે. કોઈ પણ પક્ષ સાથે અમારે સમજૂતી કરવાની હોત તો તેમની શરતો પર ક્યારેક 5 કે 10 બેઠકો લડવી પડતી હતી.
ત્યાં 10થી વધારે બેઠકો મળે તો અમારું સૌભાગ્ય હતું, 2014 સુધી અમારી ત્યાં આ સ્થિતિ હતી.
હરિયાણાની ભાજપને જેટલાં અભિનંદન આપીએ એટલાં ઓછાં છે.
2014 પહેલાં ભાજપ મહારાષ્ટ્રમાં જુનિયર પાર્ટનર રહી. શિવસેનાના નેતૃત્વમાં જ સરકાર બની. છેલ્લાં 50 વર્ષોમાં એક પણ મુખ્ય મંત્રી પૂરાં 5 વર્ષ મહારાષ્ટ્રની સેવા નથી કરી શક્યા.
50 વર્ષ બાદ પ્રથમ વખત દેવેન્દ્ર ફડણવીસ પાંચ વર્ષ પૂરા કરી શક્યા.
આજે બંને રાજ્યનાં જે પરિણામો આવ્યાં છે તેમાં ભાજપ તેના સંગઠન સાથે સંપૂર્ણ બહુમત મળ્યો છે.
હરિયાણામાં ગત વિધાનસભા ચૂંટણીઓ કરતાં મતોમાં 3 ટકાનો વધારો કરતા ભાજપ સૌથી મોટા પક્ષ તરીકે ઊભર્યો છે.
દેશના કરોડો કાર્યકર્તાઓને અભિનંદન આપું છું કે મોદી.02માં પ્રથમ બંને રાજ્યની ચૂંટણીઓ ભાજપે જીતી છે.
આ બંને રાજ્ય ભાજપનાં પરંપરાગત રાજ્ય નથી. આ પહેલાં ત્યાં ભાજપના મુખ્ય મંત્રીઓ ન હતા.
દેશમાં પણ 2019માં જનતાએ પહેલાં કરતાં વધારે મતો આપીને મોદીને વડા પ્રધાન બનાવવાનો ચુકાદો આપ્યો.
વડા પ્રધાન નરેન્દ્ર મોદી હાલ ભાજપના કાર્યાલયે પહોંચ્યા છે. આ પહેલાં ભાજપના અધ્યક્ષ અમિત શાહ ત્યાં પહોંચ્યા હતા.
વડા પ્રધાન નરેન્દ્ર મોદીએ હરિયાણા અને મહારાષ્ટ્રના લોકોનો આભાર માન્યો છે અને બંને રાજ્યમાં ઉત્સાહ અને સમર્પણ સાથે આગળ પણ કામ કરવાનો નિર્ધાર વ્યક્ત કર્યો છે.
ભાજપના અધ્યક્ષ અને કેન્દ્રીય ગૃહમંત્રી અમિત શાહ દિલ્હી ખાતેના ભાજપના કાર્યાલયે પહોંચી ગયા છે.
એવું માનવામાં આવે છે કે મહારાષ્ટ્ર અને હરિયાણાના પરિણામોને લઈને અહીં ચર્ચા થશે.
આ પહેલાં અમિત શાહે જીત માટે મહારાષ્ટ્ર અને હરિયાણાના કાર્યકર્તાઓને અભિનંદન પાઠવ્યાં હતાં.
મહારાષ્ટ્રના ચૂંટણી પરિણામ વિશે મુંબઈથી રાજકીય વિશ્લેષકો રમેશ ઓઝા અને યોગેશ કામદાર, નવભારત ટાઇમ્સના ભૂતપૂર્વ તંત્રી વિશ્વનાથ સચદેવ અને કવિ અનિલ જોશી સાથે વાતચીત
મહારાષ્ટ્રમાં ભાજપે નબળું પ્રદર્શન કર્યું છે. ભાજપ અને શિવસેનાના સંગઠનને કુલ 161 બેઠકો હાલ મળતી દેખાઈ રહી છે.
જ્યારે કૉંગ્રેસ અને એનસીપીને 99 બેઠકો મળી રહી છે. મહારાષ્ટ્રમાં ભાજપનો આંકડો 100 બેઠકોની આસપાસ અટકી જાય તેવી શક્યતા છે.
બીજી તરફ કૉંગ્રેસ અને એનસીપીનું ગઠબંધન 100 બેઠકોનો આંકડો પાર કરી જાય તેવી શક્યતા છે.
આ વખતે મહારાષ્ટ્રમાં ભાજપ પક્ષના કેટલાક બળવાખોરોએ પણ જીત મેળવી છે.
ગુજરાત સ્થિત ભાજપ કાર્યાલયથી પક્ષના હોદ્દેદારો અને કાર્યકરો સાથે બીબીસી સંવાદદાતાની વાતચીત.
સમાચાર એજન્સી એએનઆઈ પ્રમાણે વડા પ્રધાન નરેન્દ્ર મોદી અને ગૃહમંત્રી અમિત શાહ ભાજપ મુખ્યાલય ખાતે પક્ષના કાર્યકરોને આજે સંબોધશે.
એનસીપીનાં નેતા સુપ્રિયા સુલેએ કહ્યું, "દેશમાં અર્થતંત્ર, બેરોજગારી, ભાવવધારો, ખેડૂતોના પ્રશ્નો અંગે ચિંતા છે. મૂળ મુદ્દાઓ પાછળ છૂટી રહ્યા છે."
હરિયાણા વિધાનસભા ચૂંટણી પરિણામોના વલણમાં ભાજપના નેતા અને મુખ્ય મંત્રી મનોહર લાલ ખટ્ટર 41,950 મતોથી આગળ છે.
હરિયાણામાં ભાજપ અને કૉંગ્રેસ વચ્ચે ખૂબ રસાકસી જોવા મળી છે અને એક પણ પક્ષ સ્પષ્ટ બહુમતી મેળવી નથી શક્યો.
હરિયાણામાં ભાજપ 38 બેઠકો પર, કૉંગ્રેસ 34 બેઠકો પર અને જેપીપી, આઈએનએલડી સહિત અન્ય પક્ષો 18 બેઠકો પર આગળ છે.
હરિયાણા વિધાનસભા ચૂંટણી પરિણામોના વલણ પછી કૉંગ્રેસ નેતા દીપેન્દ્ર હુડાએ કહ્યું કે ભાજપ અપક્ષ ધારાસભ્યો પર દબાણ ઊભું કરી રહ્યો છે.
એમણે કહ્યું કે દરેક અપક્ષ જેને સમર્થન કરવા માગે તેનો તેમને મોકો મળવો જોઈએ.
એનસીપી નેતા શરદ પવારે મતદારોનો આભાર માન્યો અને કહ્યું કે એનસીપી-કૉંગ્રેસ ગઠબંધને ખૂબ મહેનત કરી. સત્તા તો આવતી જતી રહે છે પરંતુ લોકોની મદદ માટે પ્રતિબદ્ધ રહેવું મહત્ત્વનું છે.
એમણે એમ પણ કહ્યું કે સાથી પક્ષો આગળની રણનીતિ નક્કી કરશે પણ શિવસેના સાથે નહીં જઈએ.
હરિયાણાના પૂર્વ મુખ્ય મંત્રી ભૂપિન્દર હુડાએ જનનાયક જનતા પાર્ટી, આઈએનએલડી અને અપક્ષોને કૉંગ્રેસ સાથે મળીને સરકાર બનાવવાનું આહ્વાન કર્યું છે.
હરિયાણામાં ભાજપ-કૉંગ્રેસ 35-35 બેઠકો પર આગળ છે અને જેપીપી સહિત અન્ય પ7 20 બેઠકો પર આગળ છે.
ઘાટકોપરથી જીતનાર ભાજપના નેતા પરાગ શાહે બીબીસી સાથે ખાસ વાતચીત કરી.
એમણે ચૂંટણીમાં જીત અને પ્રાંતવાદ વિશે શું કહ્યું જાણો.
મહારાષ્ટ્રમાં બપોરે 1.30 વાગ્યા સુધીમાં ભાજપ અને સાથી પક્ષ શિવસેના 166 બેઠકો પર આગળ છે.
કૉંગ્રેસ-એનસીપી ગઠબંધન 93 બેઠકો પર આગળ છે અને અન્ય 29 બેઠક પર આગળ છે.
મહારાષ્ટ્રમાં 288 વિધાનસભા બેઠકો છે અને હાલ શિવસેના-ભાજપની સરકાર છે.
હરિયાણામાં કૉંગ્રેસ-ભાજપ વચ્ચે કટોકટીનો જંગ બરકરાર છે. બેઉ પક્ષો 35-35 બેઠકો પર આગળ ચાલે છે.
આ જંગમાં દુષ્યંત ચૌટાલાની જનનાયક જનતા પાર્ટી સહિત અન્ય 20 બેઠકો પર આગળ છે.
હરિયાણામાં ભાજપ અને કૉંગ્રેસ વચ્ચે કટોકટીનો જંગ ચાલી રહ્યો છે.
અત્યાર સુધીના આંકડા મુજબ ભાજપ 37 બેઠકો પર આગળ છે તો કૉંગ્રેસ 31 પર આગળ છે.
આ જંગમાં દુષ્યંત ચૌટાલાની જનનાયક જનતા પાર્ટી કિંગ-મેકર બનવા જઈ રહી છે જેના ઉમેદવારો 11 બેઠકો પર આગળ છે.
2014માં ભાજપે 90માંથી 47 બેઠકો જીતીને સરકાર બનાવી હતી. એ વખતે કૉંગ્રેસને 15 અને આઈએનએલડીને 19 બેઠકો મળી હતી.
