ગુજરાતના કયા કયા જિલ્લામાં ચાર દિવસ વરસાદ પડશે, નવરાત્રિમાં શું આગાહી કરાઈ?

ગુજરાતમાંથી ચોમાસાની વિદાય શરૂ થઈ તેને લગભગ અઠવાડિયું થઈ ગયું છે, છતાં રાજ્યમાં કેટલાય જિલ્લામાં રોજ વરસાદ પડે છે અને હજુ ચાર દિવસ સુધી વરસાદ પડવાની આગાહી છે.

ગુજરાતમાં છેલ્લા 24 કલાકમાં 11 જગ્યાએ હળવો વરસાદ પડ્યો છે જેમાં ડાંગ-આહવામાં 0.39 ઇંચ, ભાવનગરના તળાજામાં 0.39 ઇંચ અને ડાંગના વઘઈમાં 0.35 ઇંચ વરસાદ પડ્યો છે.

આ ઉપરાંત કચ્છના માંડવી, સુરેન્દ્રનગરના ચોટીલા, વલસાડના પારડી, તાપીના સોનગઢ, અમરેલીના લીલિયા, ભાવનગરના જેસરમાં પણ 0.12 ઇંચથી 0.24 ઇંચ સુધી વરસાદ નોંધાયો છે.

ઉત્તર ગુજરાતમાં હવામાન સૂકું છે, પરંતુ કચ્છ અને સૌરાષ્ટ્રમાં ઝાપટાં પડ્યાં છે, જ્યારે દક્ષિણ ગુજરાતમાં વધુ વ્યાપક વરસાદ છે.

કચ્છ પર અપર ઍર સાઈક્લોનિક સર્ક્યુલેશન

અમદાવાદસ્થિત હવામાન વિભાગના આંકડા પ્રમાણે કચ્છ અને આસપાસના વિસ્તારોમાં સમુદ્રની સપાટીથી 3.1 કિમીની ઊંચાઈએ એક અપર ઍર સાઇક્લોનિક સર્ક્યુલેશન રચાયું છે. આ ઉપરાંત બંગાળની ખાડી ઉપર પણ અપર ઍર સાઇક્લોનિક સર્ક્યુલેશન છે, તે ધીમે ધીમે પશ્ચિમ દિશામાં આગળ વધે તેવી શક્યતા છે.

આગામી ચોવીસ કલાકમાં તે ડિપ્રેશનમાં ફેરવાઈ શકે છે જે 27 સપ્ટેમ્બરની સવારી ઉત્તર આંધ્ર પ્રદેશ અને દક્ષિણ ઓડિશાને પાર કરશે.

ગુજરાતના કયા જિલ્લાઓમાં ભારે વરસાદ પડવાનો છે?

અમદાવાદસ્થિત હવામાન વિભાગના બુલેટિન પ્રમાણે 27 સપ્ટેમ્બર, શનિવારે ડાંગ, નવસારી, વલસાડ, તાપી, દમણ, દાદરા અને નગરહવેલીમાં છૂટાંછવાયાં સ્થળે ભારે વરસાદ પડવાની શક્યતા છે.

તેની સાથે સાથે આણંદ, પંચમહાલ, દાહોદ, વડોદરા, છોટા ઉદેપુર, નર્મદા, ભરૂચ, સુરત, ડાંગ, નવસારી, વલસાડ, તાપી, દમણ, દાદરા અને નગરહવેલીમાં કેટલીક જગ્યાએ હળવાથી મધ્યમ વરસાદ પડવાની આગાહી છે.

28 સપ્ટેમ્બર, રવિવારે આણંદ, વડોદરા, નર્મદા, ભરૂચ, સુરત, ડાંગ, નવસારી, વલસાડ, તાપી, દમણ અને દાદરા અને નગરહવેલીમાં કેટલીક જગ્યાએ ભારે વરસાદ થવાની આગાહી છે. ભાવનગર, અમરેલી, ગીર સોમનાથ અને દીવમાં પણ ભારે વરસાદ પડી શકે છે.

રવિવારે બનાસકાંઠા, પાટણ, મહેસાણા, સાબરકાંઠા, ગાંધીનગર, અરવલ્લી, ખેડા, અમદાવાદ, આણંદ, પંચમહાલ, દાહોદ, મહીસાગર, વડોદરા, છોટા ઉદેપુર, નર્મદા, ભરૂચ, સુરત, ડાંગ, નવસારી, વલસાડ, તાપી, દમણ, દાદરા અને નગરહવેલી, રાજકોટ, સુરેન્દ્રનગર, પોરબંદર, જૂનાગઢ, અમરેલી, ભાવનગર, ગીર સોમનાથ, બોટાદ અન દીવમાં છૂટાંછવાયાં સ્થળે હળવો વરસાદ પડવાની આગાહી છે.

દક્ષિણ ગુજરાતના તમામ જિલ્લામાં વરસાદ પડશે

સોમવાર, 29 સપ્ટેમ્બરે પણ ગુજરાતમાં ઘણી જગ્યાએ ભારે વરસાદ પડવાની આગાહી છે. જેમ કે સોમવારે ભરૂચ, સુરત, ડાંગ, નવસારી, વલસાડ, તાપી, દમણ, દાદરા અને નગરહવેલી, જૂનાગઢ, અમરેલી, ભાવનગર, ગીર સોમનાથ અને દીવમાં કેટલીક જગ્યાએ ભારે વરસાદ પડશે.

રાજ્યના બાકીના ભાગોમાં સોમવારે હળવો વરસાદ પડી શકે છે. તેમાં કચ્છ, બોટાદ, જૂનાગઢ, પોરબંદર, અમરેલી, ભાવનગર, મોરબી, દ્વારકા, ગીર સોમનાથ, દાહોદ, મહીસાગર, છોટા ઉદેપુર, વડોદરા, નર્મદા, ભરૂચ, સુરત, ડાંગ, નવસારી, વલસાડ, તાપી, દમણ અને દાદરા અને નગરહવેલીનો સમાવેશ થાય છે.

30 સપ્ટેમ્બર, મંગળવારે નવસારી, વલસાડ, દમણ, દાદરા અને નગરહવેલી, પોરબંદર, જૂનાગઢ, અમરેલી, ભાવનગર, ગીર સોમનાથ અને દીવમાં છૂટાંછવાયાં સ્થળે ભારે વરસાદ પડવાની આગાહી છે.

હવામાન વિભાગના ડેટા પ્રમાણે અમદાવાદ અને આસપાસના વિસ્તારોમાં મોટા ભાગે વાદળછાયું વાતાવરણ રહેશે અને કોઈ કોઈ જગ્યાએ હળવો વરસાદ પડી શકે છે.

કચ્છમાં સૌથી વધુ વરસાદ, સૌરાષ્ટ્રમાં વરસાદની ઘટ

ગુજરાતમાં અત્યાર સુધીમાં કચ્છ જિલ્લામાં સૌથી વધુ 136 ટકા વરસાદ પડ્યો છે, જ્યારે ઉત્તર ગુજરાતમાં 119 ટકા, પૂર્વ મધ્ય ગુજરાતમાં 113 ટકા, સૌરાષ્ટ્રમાં 96 ટકા, અને દક્ષિણ ગુજરાતમાં 117 ટકા પડ્યો છે. એકંદરે રાજ્યમાં 111 ટકા કરતાં વધારે વરસાદ નોંધાયો છે.

બીબીસી માટે કલેક્ટિવ ન્યૂઝરૂમનું પ્રકાશન