Ubushinwa buri guha ubwenegihugu abanyamahanga ngo buzagere mu gikombe cy’isi
Ahavuye isanamu, Getty Images
Ubushinwa buheruka gutsinda Maldives 5 - 0 mu gushaka tike y'igikombe cy'isi, amaso yose yari ku bakinnyi Nico Yennaris wavukiye mu Bwongereza na Elkeson wari umaze amezi macye ahawe ubwenegihugu.
Nibwo bwa mbere mu mateka Ubushinwa bwari buhamagaye abakinnyi bwahaye ubwenegihugu mu marushanwa mpuzamahanga.
Elkeson wo muri Brazil yatangiye neza, atsinda ibitego bibiri muri uyu mukino.
Ni ikintu gishya mu gihugu cy'abaturage miliyari 1,4 ubu gikeneye ab'ahandi ngo bagifashe gutera umupira kikagera mu gikombe cy'isi giherukamo mu 2002.
Guha ubwenegihugu abakinnyi b'abanyamahanga byibukwa cyane mu Rwanda mu myaka ishize, ikipe y'u Rwanda yageze mu marushanwa ya CAN 2004 yarimo ababuhawe barenga batanu.
Nubwo Yennaris na Elkeson aribo bahamagawe mu ikipe y'igihugu y'Ubushinwa ubu, sibo bonyine baheruka guhabwa ubwenegihugu mu mezi ashize.
Ubushinwa bugira ibyo busaba;
1.Kugira umubyeyi umwe w'umushinwa
Nico Yennaris na John Hou Saeter mu kwezi kwa mbere berekanywe nk'abakinnyi bashya ba Beijing Sinobo Guoan FC ikipe yo mu kiciro cya mbere, bazakina nk'Abashinwa.
Aba bakinnyi bombi mbere ntibabaga kandi ntibavukiye mu Bushinwa, ariko bahawe ubwenegihugu kuko ba nyina ari abashinwakazi.
Ahavuye isanamu, Getty Images
Yennaris we ubu yahamawe no mu ikipe y'igihugu, nubwo ku mukino wa Maldives yari ku ntebe y'abasimbura.
2. Gukina mu ikipe izwi Iburayi
Intego y'abategetsi ni ukugera mu gikombe cy'isi, uwo baha ubwenegihugu ni uwo babona ko yabibafashamo, uwo ni uvuye mu ikipe izwi ufite icyo abazaniye.
Yennaris yarerewe mu ishuri ry'umupira rya Arsenal naho Hou Saeter yakoze amateka yo kuba umukinnyi wakiniye ikipe ya Rosenberg yo muri Norvege akiri muto cyane.
Ikipe ya Guangzhou Evergrande nayo yazanye umukinnyi Tyias Browning ufite sekuru ukomoka mu Bushinwa wimukiye mu Bwongereza mu myaka ya 1960.
Browning wahoze muri Everton, ibinyamakuru mu Bushinwa bivuga ko yahawe ubwenegihugu ariko FIFA ikireba niba yakwemererwa gukinira ikipe y'igihugu.
3 - Kuba ukina neza cyane mu ikipe mu Bushinwa
Elkeson yahawe ubwenegihugu nubwo bwose nta sano yindi afitanye n'Ubushinwa uretse kuba ahamaze imyaka itandatu akinayo.
Impamvu uyu mukinnyi yahawe ubwenegihugu ni uko kugeza ubu ariwe mukinnyi umaze gutsinda ibitego byinshi mu mateka ya shampiyona yaho, 103, kandi arakomeje.
Ahavuye isanamu, Getty Images
Undi mukinnyi witwa Ricardo Goulart ukinira ikipe ya Evergrande biravugwa ko ubu nawe yaretse ubwenegihugu bw'igihugu cye Brazil kugira ngo abone 'passport' y'Ubushinwa.
4. Kureka ubwenegihugu bwawe
Mu gihe Kagere Meddie ashobora kugira 'passport' ya Uganda ariko agakinira u Rwanda, ibyo siko bigenda mu Bushinwa.
Amategeko y'Ubushinwa ntabwo yemera ubwenegihugu bubiri.
Bivuze ngo iyo uhawe ubwenegihugu bwabo ureka ubundi bwose wari ufite.
5. Kugira izina ry'igishinwa
Mu Rwanda uwitwaga Bokota Labama Bovich bamwongereyeho akazina ka Kamana, Joao Rafael Elias bamwongereraho ka 'Manamana'.
Mu Bushinwa ho basaba ko umukinnyi aba azi kuvuga neza igishinwa cyangwa se akaba afite izina rimwe ry'igishinwa abafana bazajya bavuga.
Ahavuye isanamu, Getty Images
Mu myaka ya 1990 bamwe baba bibuka amazina y'abakinnyi b'abanyamahanga bahawe ubwenegihugu bw'Ubuyapani amazina yabo yasomwaga mu buryo bw'ikiyapani.
Ruy Ramos basomaga " Rui Ramosu ", na Wagner Lopez akitwa " Waguna Ropesu " naho Alex dos Santos akitwa " Aresandoro Santosu ".
Mu bushinwa naho gahunda ni nk'iyi, Nico Yennaris ubu azwi cyane nka Li Ke, igisobanuro kigenekereje cy'izina rye Nico. Naho Elkeson, baramwita Ai Kesen.
Ahavuye isanamu, Getty Images
Undi mukinnyi utavugwa cyane wahawe ubwenegihugu mu kwezi kwa karindwi ni Aloisio dos Santos Goncalves ubu wahawe izina rya Luo Guo.
6. Ni kumenya kuririmba indirimbo y'igihugu
Abanyamahanga ba 2004 bahawe ubwenegihugu bw'u Rwanda na nyuma yabwo, abenshi 'Rwanda nziza' ntayo bari bazi, icyo bakoraga ni ugufata ku mutima nka bagenzi babo mu gihe cyayo.
Ahavuye isanamu, Getty Images
Amategeko y'ishyirahamwe ry'umupira w'amaguru mu Bushinwa yo avuga ko umukinnyi uhawe ubwenegihugu agomba kuba azi indirimbo y'igihugu cye gishya neza.
Hamwe n'ibi rero bizeye ko aba bakinnyi b'abanyamahanga bazabafasha kugera muri Qatar mu 2022 bakaririmba indirimbo yubahiriza Ubushinwa yitwa "Urugendo rw'abakoranabushake".
