Nigeria yegukanye umwanya wa gatatu ku nshuro ya munani mu gikombe cya Afurika
Ahavuye isanamu, Reuters
Odion Ighalo ku munota wa gatatu gusa, yinjije igitego kimwe Nigeria yatsinze Tunisia, ikegukana umwanya wa gatatu mu gikombe cya Afurika kigana ku musozo mu Misiri.
Ighalo yahise agira ibitego bitanu, bizasaba Riyad Mahrez na Adam Ounas ba Algeria cyangwa Sadio Mané wa Senegal gutsinda hejuru y'ibitego bibiri ku mukino wa nyuma ngo bamuceho, kuko bo bafite bitatu.
Mu mukino utari ushamaje cyane hagati y'aya makipe yatsinzwe muri kimwe cya kabiri, Tunisia yabonye uburyo bunyuranye bwo gutsinda ariko ntiyabubyaza umusaruro.
Nigeria ifite iki gikombe inshuro eshatu, ubu ni inshuro ya munani ibaye iya gatatu muri iri rushanwa.
Ahavuye isanamu, Getty Images
Tunisia yari itsinzwe ikindi gitego mu minota ya nyuma ariko umunyezamu agarura mu buryo butangaje 'coup franc' yari itewe neza na Samuel Kalu.
Tunisia iheruka iki gikombe mu 2004 gikinirwa iwayo, ubwo n'Amavubi y'u Rwanda yari yitabiriye iri rushanwa.
Umukino wa nyuma w'iri rushanwa utegerejwe cyane ejo ku wa gatanu hagati ya Senegal ishaka iki gikombe ku nshuro ya mbere, na Algeria igishaka cyane kuko igiheruka mu 1990.
