Portugal yatwaye igikombe cy’irushanwa rishya i Burayi 'Nations League'

Ikipe y'igihugu ya Portugal yakiriye iri rushanwa rikinwe bwa mbere niyo yatwaye iki gikombe itsinze Ubuholandi igitego kimwe ku busa.

UEFA Nations League ni irushanwa ryaje gusimbura imikino ya gicuti y'amakipe y'ibihugu by'iburayi iba ku ngengabihe ya FIFA.

Iki gikombe kibaye icya kabiri Portugal itwaye mu myaka itatu ishize nyuma y'aho itwaye igikombe cya Euro 2016.

Igitego cya Goncalo Guedes, umukinnyi wa Valencia, nicyo cyahesheje intsinzi ikipe ya Portugal iyoborwa mu kibuga na Christiano Ronaldo.

Ubuholandi bwagerageje kwishyura ariko biranga kuko amahirwe akomeye yo gutsinda yabonwe na Memphis Depay yasanze umunyezamu wa Portugal Rui Patricio ahagaze neza.

Uyu mukino wari wavuzwe cyane kubera ba kapiteni babiri bakomeye b'aya makipe bari busakirane - Ronaldo rutahizamu wa Portugal na Virgil van Dijk myugariro w'Ubuholandi.

Aba bakinnyi bombi bitwaye neza mu mwaka ushize w'imikino mu makipe bakinamo, Ronaldo atwara igikombe cya Serie A, naho Virgil van Dijk atwara Champions League na Liverpool.

Ronaldo ubu ufite imyaka 34 y'amavuko, yatsinze ibitego bitatu muri kimwe cya kabiri cy'iri rushanwa batsinda Ubusuwisi, ariko kuri uyu mukino Van Dijk yamubujije uburyo ntiyareba mu izamu.

Portugal kugeza ubu ntabwo iratsindwa mu mikino 10 iheruka gukina.

Muri iri rushanwa Ubwongereza bwarirangije buri ku mwanya wa gatatu nyuma yo gutsinda Ubusuwisi kuri za penaliti.