Mu modoka yavudukaga kuri 220Km/h, urupfu rwa José Antonio Reyes ngo 'ni isomo'

Ku wa gatandatu José Antonio Reyes yaguye mu mpanuka y'imodoka abakunzi b'umupira w'amaguru bamuzi bajya mu gahinda, bamwe ariko batinyutse kumugaya no kuvuga ko urupfu rwe ari isomo.

Reyes yaciye mu makipe akomeye nka Real na Atletico Madrid, Arsenal ndetse n'ikipe ya Séville yo mu gace k'iwabo, yari akunzwe cyane kandi yari agikina kuko yari mu ikipe yo mu cyiciro cya kabiri.

Agipfa, ubutumwa bw'akababaro bwarisukiranyije buva henshi ku isi, ariko nyuma haje n'ubutumwa bwo kunenga uko yari atwaye imodoka ari nabyo byamujyanye ku rupfu.

'Umuvuduko ukabije ukwiye kwamaganwa'

Reyes ni we wari utwaye imodoka ye mu muhanda mugari. Ageze ku muvuduko wa 220Km/h imodoka yaramunaniye, nkuko byatangajwe n'abapolisi bakoze iperereza.

Muri iyo Mercedes Brabus, yari kumwe na mubyara we Jonathan Reyes, na we wapfuye, na Juan Manuel Calderón, na we bafitanye isano, ubu urembeye cyane mu bitaro.

Icyateye impanuka cya nyuma kizatangarizwa mu rukiko i Séville mu byumweru biri imbere, gusa iperereza ry'ibanze rivuga ko kubera umuvuduko ukabije Reyes yananiwe kugenzura imodoka mu muhanda mugari uva Séville ugana mu mujyi w'iwabo wa Utrera.

Imodoka yataye umuhanda yibirindura inshuro nyinshi ndetse ihita igurumana. Bayisanze muri metero 200 uvuye aho yaviriye mu muhanda.

Santiago Cañizares wahoze ari umunyezamu wa Real Madrid yanditse ku rubuga rwa Twitter ati: "Gutwara ku muvuduko ukabije bikwiye kunengwa. Hari abandi byakozeho, Reyes ntiyari akwiye gusezerwaho nk'intwari".

Cañizares ubu usigaye ukora amasiganwa y'imodoka, ibyo yatangaje byahise bitera impaka nyinshi, bamwe bamunenga abandi bamushyigikiye.

Nyuma yongeye gutangaza ko yababajwe n'urupfu rwa Reyes ndetse "anasabira roho ye" ariko icyo yavuze mbere yagira ngo gitume abantu "batekereza ku makosa dukora".

'Iyi mpanuka ikwiye kuba isomo'

Umuryango wo muri Espanye witwa Stop Accidentes uyoborwa na Ana María Campo - wapfushije umuhungu we mu mpanuka yo mu muhanda - na wo wahereye ku rupfu rwa Reyes utanga ubutumwa.

Madamu Campo yagize ati: "Abantu bagomba kubona ko kurenza umuvuduko wagenwe bigira ingaruka ziteye ubwoba, nk'izi".

Campo yibaza ukuntu "umugabo ukiri muto ukunzwe n'abantu benshi ayoberwa ko gutwara ku muvuduko ukabije bitwara ubuzima".

Ikinyamakuru ABC cyo muri Espanye kivuga ko kuri uyu muhanda Reyes yaguyeho, mu 2015 nabwo ngo yari yihanangirijwe n'abategetsi kubera kuwutwaraho imodoka avuduka bikabije.

Reyes ubu yakinaga mu cyiciro cya kabiri mu ikipe yitwa Extramadura. Asize abana batatu barimo babiri yabyaranye n'umupfakazi asize Noelia López.