Qatar ishinjwa iharabika ry'abo bahanganiraga kwakira igikombe cy'isi cyo mu mwaka wa 2022
Ahavuye isanamu, Getty Images
Ikinyamakuru The Sunday Times cyo mu Bwongereza cyatangaje inkuru-perereza ivuga ko itsinda ry'abari bahagarariye Qatar mu guhatanira kwakira igikombe cy'isi cya 2022, bakoresheje uburyo bwo guharabika abo bahatanaga mu mwaka wa 2010.
Mu buryo iki kinyamakuru kivuga ko Qatar yifashishije, harimo abahoze bakorera ibiro by'ubutasi bwo hanze y'Amerika bya CIA ndetse n'ikigo cyo muri Amerika gikora mu byo kwamamaza ibyiza cyangwa ibibi ku isura y'umuntu cyangwa ikigo muri rubanda.
Iki kinyamakuru kivuga ko byose byari bigamije gusiga icyasha ibihugu byari bihanganye na Qatar muri iryo rushanwa ryo kwakira igikombe cy'isi cyo mu mwaka wa 2022. Kivuga ko ab'ingenzi bari Amerika na Australia.
Iki kinyamakuru kivuga ko iri cengezamatwara riharabika ryari rigamije gutanga ubutumwa ko muri ibyo bihugu, abaturage badashyigikiye ko icyo gikombe cy'isi kihabera.
Qatar ihakana ibi iregwa.
Ibi byatangajwe n'ikinyamakuru The Sunday Times bibaye ari impamo, byaba byaranyuranyije n'amategeko y'ishyirahamwe ry'umupira w'amaguru ku isi Fifa.
Aya mategeko avuga ko ntawemerewe "mu nyandiko cyangwa mu mvugo gukoresha uburyo ubwo ari bwo bwose burwanya uwo bahanganye..."
Muri iryo rushanwa, Qatar yatsinze ibindi bihugu yarihanganye nabyo by'Amerika, Australia, Koreya y'epfo n'Ubuyapani - itsindira ityo kwakira imikino y'igikombe cy'isi cyo muri 2022.
Itsinda ry'abari bahagarariye Qatar ryigeze gushinjwa kurya ruswa mbere, ariko rihanagurwaho icyo kirego n'iperereza rya Fifa ryamaze imyaka ibiri.
