Igikombe cy'isi 2018: Kera kabaye abagore bo muri Iran bemerewe kujya ku kibuga kureba imikino

Inyandiko gusa
Umwe mu bagore bo muri Iran bari bageze ku kibuga cy'umupira bwa mbere mu buzima bwabo
Insiguro y'isanamu, Umwe mu bagore bo muri Iran bari bageze ku kibuga cy'umupira bwa mbere mu buzima bwabo

Bavuza amahoni, baririmba ndetse baseka, abagore bo muri Iran ku wa gatatu barashyize bemererwa kwinjira mu bibuga by'umupira w'amaguru kureba umukino. Zari inzozi z'ubuzima bwabo zibaye impamo.

Mu mwaka wa 1979, nibwo abagore bo muri Iran baherukaga gukandagira ku kibuga cy'umupira w'amaguru bagiye kureba umukino.

Ariko ku wa gatatu ubwo ikipe y'igihugu cyabo cya Iran yakinaga n'ikipe ya Espanye mu mukino w'igikombe cy'isi cya 2018 kiri kubera mu Burusiya, abafana b'abagore muri Iran bagiye ku kibuga cya Azadi mu murwa mukuru Tehran kureba uwo mukino barebera ku byapa binini bigaragaza amashusho y'umukino uri kuba.

Nyuma y'uwo mukino, abayobozi b'ikibuga cy'umupira w'amaguru cya Azadi bavuze ko "nta kibazo gihari" ku bagore bazifuza no kureba umukino Iran izakina na Portugal ku wa mbere mu gikombe cy'isi.

Amafoto abo bagore bifashe bakoresheje telefoni zabo zigendanwa yakwiragiye ku mbuga nkoranyambaga.

Ndetse ku rubuga rwayo rwa Twitter, ikipe y'igihugu ya Iran yashyizeho ifoto igaragaza umugore uri mu myanya abafana bicaramo ku kibuga afite ibendera ry'igihugu cya Iran.

Mu kwezi kwa gatanu abagore batanu bo muri Iran bashoboye kwinjira mu kibuga cy'umupira w'amaguru cya Azadi biyoberanyije nk'abagabo
Insiguro y'isanamu, Mu kwezi kwa gatanu abagore batanu bo muri Iran bashoboye kwinjira mu kibuga cy'umupira w'amaguru cya Azadi biyoberanyije nk'abagabo

Mu kwezi kwa gatanu, abagore batanu bo muri Iran bashoboye kwinjira mu kibuga cy'umupira w'amaguru cya Azadi. Ariko icyo gihe bari biyoberanyije nk'abagabo, bishyizeho ubwanwa n'imisatsi nk'iby'abagabo.

Nubwo nta tegeko ririho ribuza abagore kugera ku bibuga by'imikino muri iki gihugu cya Iran gitsimbaraye ku migenzo ya kera, abakuru b'idini banze koroshya amabwiriza ndetse akenshi abapolisi babuza abagore kugera ku bibuga by'imikino.

Skip Ibisomwa cane and continue reading
Ibisomwa cane

End of Ibisomwa cane

Mu bihe byashize, abagore bahaniwe kujya kureba imikino. Nko mu kwezi kwa gatatu k'uyu mwaka wa 2018, abagore 35 barafunzwe bazira kugerageza kureba umukino w'umupira w'amaguru.

Mu Burusiya, abagore bo muri Iran bagiye kureba imikino y'igikombe cy'isi imbona nkubone na bo bishimiye kubasha kureba umukino w'umupira w'amaguru ku nshuro ya mbere.

Byitezwe ko abagore bazashobora kwitabira indi mikino y'igikombe cy'isi izerekanwa muri Iran.

Ariko hari benshi bemeza ko bishoboka ko uru ruhushya rwo kureba imikino y'umupira w'amaguru rutazakomeza ku mikino ya shampiyona y'umupira w'amaguru muri Iran yimirije gutangira.