Kivu ya Ruguru: Impunzi miliyoni ebyiri z'imbere mu gihugu zasubiye mu byazo - ONU

Ishami rya ONU rishinzwe guhuriza hamwe ibikorwa by'ubutabazi, OCHA, ryatangaje ko abantu miliyoni eshatu bari baravuye mu byabo imbere mu gihugu bahunga intambara mu burasirazuba bwa DR Congo batahutse kuva mu ntangiriro z'uyu mwaka.

Raporo nshya ya OCHA ivuga ko mu ntara ya Kivu ya Ruguru abantu miliyoni ebyiri basubiye mu byabo, nubwo bwose abasaga miliyoni imwe bakiri impunzi z'imbere mu gihugu, muri bo harimo hafi 500,000 bavuye mu byabo muri uyu mwaka gusa.

Mu ntara ya Kivu y'Epfo abarenga 600,000 basubiye mu byabo mu gihe abagera kuri miliyoni 1.5 bakiri impunzi z'imbere mu gihugu – harimo abarenga 550,000 bavuye mu byabo kubera imirwano muri uyu mwaka.

OCHA ivuga ko abasubiye mu byabo mu ntara ya Kivu y'Epfo ahanini ari abo mu duce twa Minova, Kalehe no ku kirwa cy'Idjwi cyo mu kiyaga cya Kivu.

Ku rubuga X, asubiza kuri iyi raporo yasohotse mu mpera z'icyumweru gishize, Bertrand Bisimwa uri mu bakuru b'umutwe wa AFC/M23, yavuze ko bacyemuye "icyago ku bantu mu gucyura abantu barenga miliyoni ebyiri".

Nyuma y'uko M23 ifashe umujyi wa Goma mu mpera za Mutarama(1) uyu mwaka, inkambi z'impunzi nyinshi zarafunzwe, zirimo iza Bulengo, Kimashini, Kanyaruchinya na Lushagara zabarirwagamo abantu barenga miliyoni.

Aba ni abari baravuye mu byabo kuva mu 2022 bahunga imirwano hagati ya M23 n'ingabo za leta baturutse mu bice bya teritwari za Rutshuru, Masisi na Lubero.

Imiryango itegamiye kuri leta yafashaga izo mpunzi i Goma no mu nkengero zaho yamaganye uko izo mpunzi zacyuwe, ivuga ko zirukanwe ku ngufu n'abarwanyi ba M23.

Abakuriye M23 bo bashinje iyo miryango gushakira indonke n'akazi kuri izo mpunzi mu nkambi, bavuga ko batifuzaga ko abo bantu basubira mu byabo.

Muri Kivu ya Ruguru na Kivu y'Epfo n'ubu hakomeje kuvugwa intambara za hato na hato hagati y'inyeshyambaza za M23 - ubu zigenzura ibice binini muri izi ntara – n'uruhande rwa leta cyane cyane abarwanyi bo mu mitwe itandukanye izwi nka Wazalendo

Nubwo izi mpande zombi mu kwezi gushize zumvikanye ku mahame yo guhagarika imirwano, izo ntambara zivugwa muri iyi minsi hirya no hino muri izi ntara ziracyatuma abantu ibihumbi bava mu byabo bagahunga.

OCHA ivuga ko muri Kivu ya Ruguru gusa, kuva tariki 13 z'ukwezi gushize kwa Nyakanga abantu bagera ku 44,000 bahunze imirwano mu gace ka Masisi, kandi nibura abasivile umunani biciwe muri iyo mirwano.

Hagati aho mu ntara ya Kivu y'Epfo, mu duce twa Teritwari za Uvira, Walungu na Kalehe imirwano ikomeje gutuma abantu bava mu byabo bagahunga, ndetse muri iyi ntara ni ho OCHA ibarura benshi bahunze kuva uyu mwaka watangira ugereranyije n'izindi ntara.

OCHA ivuga ko tariki ya mbere z'uku kwezi kwa Kanama(8) nibura abagore n'abakobwa 35 bashimuswe kandi bagafatwa ku ngufu n'imitwe yitwaje intwaro mu duce dutatu two muri teritwari ya Uvira, ibi ivuga ko ibikesha abaganga n'abategetsi baho.

Nubwo miliyoni z'abantu basubiye mu ngo zabo, OCHA iburira ko benshi bacyugarijwe n'ibibazo byo kubona ikibatunga ndetse no kutabona imiti.