Guinea: Agatsiko ka gisirikare kari ku butegetsi kasheshe guverinoma

Inyandiko gusa
Umukuru w'agatsiko ka gisirikare muri Guinea ari kumwe n'abandi basirikare

Ahavuye isanamu, AFP

Insiguro y'isanamu, Guinea, kuri ubu itegetswe na Perezida w'inzibacyuho Mamady Doumbouya (uri hagati), yitezwe gukora amatora mu mezi 10 ari imbere, yo gusubizaho ubutegetsi bunyuze muri demokarasi
    • Umwanditsi, Gloria Aradi
    • Igikorwa, BBC News

Agatsiko ka gisirikare muri Guinea (Conakry), kafashe ubutegetsi binyuze muri Coup d'État muri Nzeri (9) mu 2021, kasheshe guverinoma.

Brigadiye Jenerali Amara Camara, umunyamabanga mukuru w'ibiro bya perezida, yabitangaje ku wa mbere mu itegeko-teka rya perezida yasomye kuri televiziyo y'igihugu.

Camara ntiyahishuye impamvu y'uko gusesa guverinoma cyangwa igihe guverinoma nshya izagiraho.

Abari abaminisitiri muri guverinoma yasheshwe bategetswe gutanga inzandiko z'inzira (pasiporo) zabo n'imodoka za leta.

Konti zabo za banki na zo zafatiriwe.

Agatsiko ka gisirikare kanategetse inzego zishinzwe umutekano "gufunga" imipaka yose y'igihugu kugeza ubwo minisiteri zizaba zimaze gusubizwa byuzuye ako gatsiko.

Camara yavuze ko abategetsi bo ku nzego zo hasi muri izo minisiteri ari bo bazaba baziyobora by'agateganyo, kugeza hagiyeho guverinoma nshya.

Guverinoma yasheshwe yari iyobowe na Bernard Goumou, wari waragizwe minisitiri w'intebe n'uwayoboye ihirikwa ry'ubutegetsi, Mamady Doumbouya.

Skip Ibisomwa cane and continue reading
Ibisomwa cane

End of Ibisomwa cane

Muri Nzeri mu 2021, Koloneli Doumbouya yayoboye abasirikare ba Guinea mu guhirika Perezida watowe Alpha Condé, nyuma y'urukurikirane rw'imyigaragambyo yo kwamagana Condé ku kwiyamamariza manda ya gatatu itaravuzweho rumwe.

Mu myaka ya vuba aha ishize, Guinea n'ibindi bihugu byinshi byo muri Afurika y'uburengerazuba no muri Afurika yo hagati byibasiwe n'amahirikwa y'ubutegetsi. Ibindi bihugu yabayemo ni Mali, Burkina Faso, Niger na Gabon.

Ayo mahirikwa y'ubutegetsi yamaganwe bikomeye n'umuryango w'ubukungu w'ibihugu byo muri Afurika y'uburengerazuba (CEDEAO), umuryango w'Ubumwe bw'Afurika n'Umuryango w'Abibumbye.

Mu mezi 10 ari imbere, Guinea yitezwe gukora amatora yo gusubizaho ubutegetsi mu nzira ya demokarasi, ubwo inzibacyuho y'amezi 24 yashyizweho n'ako gatsiko na CEDEAO izaba irangiye.