Imvo n'Imvano ku bukerarugendo bwo gusura ingagi mu Rwanda

Insiguro y'amajwi, Umva ukanze aho hejuru: Imvo n'Imvano ku bukerarugendo bwo gusura ingagi mu Rwanda
Imvo n'Imvano ku bukerarugendo bwo gusura ingagi mu Rwanda

Igitondo cyiza kuri mwe mwese abateze amatwi BBC, none ni ku wa gatandatu tariki 13 z'ukwezi kwa 9 umwaka wa 2025, uyu ni umwanya w'ikiganiro Imvo n'Imvano.

Ikiganiro cyacu uyu munsi turavuga ku bukerarugendo bwo gusura ingagi mu Rwanda. Mu mpera z'icyumweru gishize abana b'ingagi 40 biswe amazina mu gikorwa kiba buri mwaka kikitabirwa n'abantu benshi barimo ibyamamare bitandukanye ku isi.

Leta y'u Rwanda isobanura ko kwita amazina ingagi biri muri gahunda yo kuzibungabunga kugira ngo hamenyekane neza umubare wazo bigafasha mu kwita ku mibereho yazo.

Abagabo babiri bambaye amashati y'umweru n'imikenyero ya Kinyarwanda y'icyatsi kibisi, bashinze hasi ingabo ziriho amabara y'umweru n'umukara. Barareba imbere. Bakikijwe n'abandi bantu, barimo n'abafite za 'cameras'.
Insiguro y'isanamu, Kwita izina abana b'ingagi byitabirwa n'abantu banyuranye barimo n'ibyamamare, uyu mwaka byitabiriwe n'abarimo Bacary Sagna (imbere ibumoso mu ishati y'umweru) wahoze ari myugariro w'ikipe ya Arsenal na Mathieu Flamini wahoze akina hagati muri Arsenal

Ingagi zo mu birunga kuri ubu ngo zirenga 600, gusa igiciro cyo kuzisura cy'amadorali y'Amerika 1500 (arenga miliyoni 2 FRW) ku muntu, kiracyavugisha benshi. Ariko leta igasobanura ko ari bwo buryo bwo kugabanya umubare munini w'abazisura kugira ngo irusheho kuzibungabunga.

Ubukerarugendo bw'ingagi ni bwo bwa mbere bwinjiza amadevize (amafaranga y'amahanga) menshi mu Rwanda. Abashinzwe ibikorwa byo gusura ingagi bavuga ko byinjije akayabo ka miliyoni 33 z'amadolari y'Amerika (arenga miliyari 47 FRW) kandi ko buri mwaka 10% by'ayinjijwe n'ibikorwa by'ubukerarugendo asangizwa abaturage baturiye Parike kugira ngo biteze imbere.

Ikiganiro cy'uyu munsi mwagiteguriwe kandi murakigezwaho na Yves Bucyana.