Nigeria irashaka guhagarika konti za YouTube z'imitwe itemewe
Ahavuye isanamu, Reuters
Nigeria yasabye kompanyi y'ikoranabuhanga, Google, guhagarika imitwe itemewe mu gihugu ntishobore gutangaza ibiganiro kuri shene (channels) zo kuri YouTube, nkuko Minisitiri w'itumanaho Lai Mohammed yabivuze.
YouTube ni urubuga rwa kompanyi Google.
Minisitiri Mohammed yavuze ko shene za YouTube zirimo gukoreshwa mu gukwirakwiza urwango n'amakuru atari ukuri agamije kuyobya yibasira iki gihugu.
Ku wa kane, nyuma yo kwakira abategetsi bo muri Google mu murwa mukuru Abuja, Minisitiri Mohammed yagize ati:
"Shene na emails zirimo amazina y'imitwe ibujijwe n'amategeko n'amashami yayo ntizikwiye kwemerwa ku mbuga za Google".
Minisitiri Mohammed yavuze ko leta ya Nigeria ihangayikishijwe n'ibikorwa byo ku mbuga za internet bikorwa n'umutwe uzwi nka 'Indigenous People of Biafra' (IPOB).
Uyu mutwe ni uw'abaharanira ko habaho leta yigenga ya Biafra.
Yavuze ko leta na Google "basangiye impungenge imwe ku ikoreshwa ry'imbuga nkoranyambaga mu buryo burimo gushyira mu gaciro", nkuko bikubiye mu itangazo rya minisiteri y'itumanaho.
Charles Murito, umuyobozi wa Google ku miyoborere n'igenamigambi muri Afurika yo munsi y'ubutayu bwa Sahara, yagize ati:
"Dusangiye intego zimwe kandi ntidushaka ko urubuga rwacu rukoreshwa mu bintu bibi".
Abantu babarirwa muri za miliyoni bo muri iki gihugu cya mbere gituwe cyane muri Afurika - Nigeria ituwe n'abaturage miliyoni 206 - bakoresha imbuga nka YouTube, Twitter, Facebook na TikTok.
