M23 na Kinshasa bumvikanye gushyiraho urwego rwo kugenzura iyubahirizwa ry'agahenge
Ahavuye isanamu, @Com_mediasRDC
Minisiteri y'ububanyi n'amahanga ya Qatar yatangaje ko uyu munsi i Doha leta ya DR Congo n'umutwe wa AFC/M23 basinye ku bwumvikane bwo gushyiraho urwego rwo kugenzura iyubahirizwa ry'agahenge.
Ubu bwumvikane bugendanye kandi bukurikiwe n'amahame yo guhagarika imirwano impande zombi zashyizeho umukono muri Nyakanga (7) uyu mwaka i Doha, amahame atarubahirijwe kuko imirwano yakomeje mu ntara za Kivu y'Epfo na Kivu ya Ruguru.
Leta ya Qatar ivuga ko uru rwego rwo kugenzura bumvikanyeho ruzajya rukora iperereza rukareba abarenze ku byumvikanyweho rugaha raporo inzego bireba mu gukumira ko imirwano yongera.
Impande zombi zageze kuri ibi mu gihe imirwano muri iyi minsi ikomeje kuvugwa muri teritwari za Rutshuru, Masisi na Walikare n'ahandi hagati ya M23 n'imitwe itandukanye ya Wazalendo ifashwa na leta.
Ahavuye isanamu, @MofaQatar
Minisiteri y'itangazamakuru n'itumanaho ya DR Congo ivuga ko urwego bemeranyijweho ruzaba rugizwe "n'abahagarariye leta n'abo ku ruhande rwa AFC/M23 n'indorerezi za Qatar, Amerika, Ubumwe bwa Afurika, CIRGL na MONUSCO".
Iyi minisiteri ivuga ko ibi bigezweho nyuma y'uko mu kwezi gushize hashyizweho urundi rwego rwo gushyira mu ngiro guhererekanya imfungwa, ivuga ko ibi ari ingenzi mu kubahiriza ya mahame yo guhagarika imirwano impande zombi zasinye mu kwezi kwa Nyakanga uyu mwaka.
Leta ya Kinshasa ivuga ko mu kwemera ibi byose ishimangira "umushake wayo mu kugera ku guhagarika imirwano, gushakira abaturage umutekano, no gutegura ibisabwa ngo hagerwe ku masezerano y'amahoro arambye"
Leta ya Qatar ivuga ko gushyiraho uru rwego rwumvikanyweho uyu munsi ari "intambwe ikomeye" mu kugana ku masezerano y'amahoro hagati y'impande zombi.
