Sudan y'Epfo igiye gukora amatora ya mbere kuva yabona ubwigenge

Perezida wa Sudan y'Epfo Salva Kiir yavuze ko amatora amaze igihe kirekire yaracyererejwe azaba mu mwaka utaha nkuko byateganyijwe.

Kiir, w'imyaka 71, yavuze ko aziyamamariza indi manda muri ayo matora, ya mbere kuva iki gihugu kibonye ubwigenge.

Nta wundi mukandida wari watangaza ko aziyamamaza ariko Visi Perezida wa mbere Riek Machar na we yitezwe kwiyamamaza.

Kiir ni Perezida kuva iki gihugu cyabona ubwigenge mu 2011 nyuma y'intambara yamaze imyaka.

Ariko intambara yarakomeje muri Sudan y'Epfo na nyuma yuko ibonye ubwigenge – intambara hagati y'abaturage b'iki gihugu yadutse mu 2013 ubwo Perezida Kiir yashwanaga na Machar.

Amasezerano yo gusaranganya ubutegetsi yashyizweho umukono mu kwezi kwa Kanama (8) mu 2018 hagati y'impande zarwanaga, agamije gusoza intambara yari imaze imyaka itanu.

Manda ya guverinoma y'inzibacyuho (imfatakibanza mu Kirundi), yari yitezwe kurangira mu 2022, yongerewe igihe kugira ngo abategetsi bacyemure ibibazo bijyanye n'ishyirwa mu bikorwa ry'amasezerano y'amahoro.

Ku wa kabiri, Kiir yavuze ko ibyo bibazo bizaba byamaze gukemurwa "mbere y'amatora" ateganyijwe kuba mu kwezi kw'Ukuboza (12) mu mwaka utaha wa 2024.