Imvo n'imvano: Abahiganywe na Tshisekedi muri DRC ntibemera intsinzi ye. Biraherera he?

Akanama gashinzwe amatora CENI muri Republika ya Demokrasi ya Congo katangaje imyanzuro y'agateganyo y'ibyavuye mu matora yabaye kw'itariki 20 z'ukwezi kwa 12 k'umwaka ushize.

CENI yatangaje ko uwaje kwisonga mu matora y'umukuru w'igihugu ari Felix Antoine Tshisekedi Tshilombo wabonye amajwi agera kuri 73.34 kw'ijana, akurikirwa na Moise Katumbi wabonye amajwi 18.08 kw'ijana naho Martin Fayulu aba uwa gatatu n'amajwi 5.33 kw'ijana.

Nubwo habaye amatora rusange, n'ukuvuga ay'umukuru w'igihugu, abashingamateka, abakenguzamateka n'abajyanama b'uturere, uyu munsi turibanda ku matora y'umukuru w'igihugu.

Mu gihe Felix Tshisekedi w'itoje ku giti cye ariko ashyigikiwe n'amashyaka agera kuri 200 yishyize mw'ihuriro yise Union Sacre, baririmbaga intsinzi mu mpera z'iki cyumweru gishize, abahanganye nawe bo bari mu kwamagana ibyavuye mu matora bavuga ko habayemo uburiganya bukomeye, ko ayo matora bita baringa adashobora kwemerwa.

Banagerageje gukora imyigaragambyo mu murwa mukuru wa Kinshasa ariko igipolisi kiburizamo iyo myigaragambyo.

Gusa baracyarahira bakarengwa bakavuga ko bazakomeza gukora iyo myigaragambyo kabona n'uko igipolisi n'igisirikare cyoherejwe hirya no hino kubabuza.

Ubutegetsi bubabwira ko hari inzira ziteganywa n'amategeko zo kugaragaza ibitaragenze neza mu matora maze urukiko rushinzwe kwubahiriza itegeko nshinga rugafata icyemezo.

Ese aba batatsinze aya matora bazashyire bemere ibyatangajwe na CENI ? Bazakoresha se izihe nzira kugirango akababaro kabo kumvwe ?

Prezida Tshisekedi se we azashobora gutegeka n'ibibazo byugarije igihugu cye na cyane cyane ikibazo cy'umutekano kivugwa mu ntara za Kivu na Ituri ?

Ngibyo ibyo tugiye kuganira muri kino kiganiro

Abatumire bacu ni Umushingamateka Emmanuel Ngaruye Muhozi wo mw'ihuriro Union Sacree rishyigikiye Felix Tshisekedi, ari i Kinshasa, turi kumwe kandi na Wilson Twitegure ukuriye urubyiruko rwo mw'ishyaka Ensemble Pour La Republique rya Moise Katumbi mu karere ka Masisi, we ari i Goma, turi kumwe kandi na Joseph Sebarenzi inzobere muri politike n' ibyo gukemura amatate, we ari muri Amerika.

Iki kiganiro mwagiteguriwe kandi mugiye kukigezwaho na Felin Gakwaya