Israel: Ukora isuku kwa Minisitiri w'ingabo yakatiwe gufungwa kubera kugerageza kunekera aba 'hackers' bakorana na Iran

Inyandiko gusa

David Gritten

BBC News

Minisitiri w'ingabo wa Israel Benny Gantz

Ahavuye isanamu, EPA

Insiguro y'isanamu, Omri Goren yoherereje amafoto aba 'hackers' y'ibintu bimwe byo mu rugo rwa Minisitiri w'ingabo Benny Gantz (uyu uri ku ifoto)

Urukiko rwo muri Israel rwafunze uwahoze akora isuku kwa Minisitiri w'ingabo Benny Gantz, wagerageje guha amakuru itsinda ry'abinjira muri za mudasobwa (hackers) rifitanye imikoranire na Iran.

Omri Goren, w'imyaka 38, yakatiwe gufungwa imyaka itatu bijyanye n'amasezerano yo kwemera icyaha yatumye abashinjacyaha bamukuriraho ibirego byo gukora ubutasi.

Minisiteri y'ubutabera ya Israel yavuze ko Goren yabwiye itsinda Black Shadow ry'aba 'hackers' ko ashobora kuryoherereza amakuru kuri Gantz no gushyira software (logiciel) yo kwangiza (malware) muri mudasobwa ye, na ryo rikamuha amafaranga.

Ariko yahakanye kugerageza abizi neza kunekera Iran, umwanzi ukomeye cyane wa Israel.

Nyuma yo gukatirwa igifungo ku wa kabiri, amagambo y'abanyamategeko be yasubiwemo n'ikinyamakuru the Times of Israel bagira bati:

"Si maneko kandi ibi si amahano yo kuneka".

Skip Ibisomwa cane and continue reading
Ibisomwa cane

End of Ibisomwa cane

Skip podcast promotion and continue reading
WhatsApp channel ya BBC Gahuza

Amakuru ya BBC Gahuza ako kanya kuri WhatsApp yawe

Kanda hano ujyeho

End of podcast promotion

Bongeyeho bati: "Ibi bijyanye n'umugabo wisanze yugarijwe n'umwenda [ideni] agatahura [ahari] icyuho ku mutekano".

Amakuru avuga ko Goren yabwiye abakora iperereza ko yateganyaga gushuka abo ba 'hackers' bakamuha amafaranga ariko ntagire amakuru n'amwe abaha.

Inyandiko ya mbere y'ibirego yatangajwe mu kwezi kwa cumi na kumwe mu 2021 yaregaga Goren gutera intambwe ya mbere akagera ku itsinda Black Shadow ku rubuga rwa Telegram.

Hari nyuma yuko asomye mu bitangazamakuru byo muri Israel amakuru ajyanye no kugerageza kw'iryo tsinda kwo kwinjira muri za mudasobwa.

Mu kwemeza iryo tsinda ko koko ari umukozi wa Gantz, yaryoherereje amafoto y'ibintu byo mu rugo rw'uyu Minisitiri w'ingabo, arimo nk'intebe ye, mudasobwa, ububiko bw'umutamenwa n'amakuru ajyanye no kwishyura imisoro, nkuko bikubiye muri iyo nyandiko y'ibirego.

Minisiteri y'ubutabera yavuze ko kugerageza kwa Goren kwaburijwemo n'urwego rw'ubutasi bw'imbere mu gihugu rwa Israel, ruzwi nka Shin Bet, kandi ko nta makuru y'ibanga yahishuriwe iryo tsinda ry'aba 'hackers'.

Ariko, urwego Shin Bet hari ibyo rwabajijwe ku kuntu Goren yemerewe gukorera Minisitiri w'ingabo, mu gihe mbere yari yarakatiwe gufungwa mu bihe bine bitandukanye, harimo no gufungirwa gukora ubujura bwibisha intwaro.

Uru rwego nyuma rwemeye ko habayeho "ukunanirwa gukurikiza uburyo busanzwe bw'imikorere" ku kuntu uwo mugabo yakorewe igenzurwa mbere yo guhabwa akazi.

Rwavuze ko kubera iyo mpamvu amategeko y'imikorere ubu yakajijwe.