Somalia: Igitero cyiciwemo abantu cyibasiye imodoka zitwaye ibiribwa
Ahavuye isanamu, AFP
Abantu batari munsi ya 20, barimo abagore n'abana, bishwe, n'imfashanyo y'ibiribwa irangizwa, nyuma yuko intagondwa zigabye igitero ku modoka nyinshi mu karere ka Hiiraan kari rwagati muri Somalia.
Guverineri w'ako karere yabwiye ishami rya BBC ritangaza ibiganiro mu rurimi rw'Igisomali ati: "Bashyizemo igisasu ubwo abantu bari bari mu modoka nuko barayituritsa".
Umutwe w'intagondwa ziyitirira idini ya Islam wa al-Shabab wavuze ko wari ugambiriye umutwe witwaje intwaro ukorana na leta ya Somalia.
Intagondwa za al-Shabab, zikorana n'umutwe wa al-Qaeda, zishaka guhirika ubutegetsi bwa leta ya Somalia.
Al-Shabab igenzura igice kinini cy'amajyepfo n'icyo hagati cya Somalia, ariko yashoboye kwagura aho ifite ijambo igera mu turere tugenzurwa na leta ya Somalia ifite icyicaro mu murwa mukuru Mogadishu.
Mu byumweru bibiri bishize, abarwanyi bayo biraye muri hoteli y'i Mogadishu bica abantu barenga 20.
Guverineri w'akarere ka Hiiraan, Ali Jeyte Osman, yavuze ko umubare w'abantu biciwe muri icyo gitero cyo ku wa gatanu ushobora kwiyongera, mu gihe hari amakuru ko abantu bagera kuri 27 bishwe.
Yagize ati: "Bamwe bakomeretse naho abandi barirukanse ubwo kurasa kwatangiraga. Imirambo iracyakusanywa, irimo n'abagore n'abana".
Osman yashinje izi ntagondwa kuba mu ntambara n'abaturage b'abasivile bo muri ako karere, azishinja gutwika ibyaro no gusenya amariba y'amazi.
Mohamed Abdirahman, umutegetsi w'ubwoko bwo muri ako gace, yavuze ko icyo gitero giteye ubwoba, yongeraho ko ubunyamaswa nk'ubwo butari bwarigeze na rimwe bubaho muri ako karere.
Ibiro ntaramakuru AFP byasubiyemo amagambo ye agira ati: "Aba bari abasivile b'inzirakarengane batakoze ikintu na kimwe cyatuma ibi ari byo bakwiye".
Perezida wa Somalia Hassan Sheikh Mohamud yasezeranyije ko leta ye "izakora igishoboka cyose" mu rugamba rwo kurwanya "iterabwoba" muri iki gihugu.
Mu itangazo, al-Shabab yavuze ko amakamyo yagabyeho igitero yari atwaye imfashanyo y'ibiribwa igenewe umutwe w'abarwanyi bo muri ako karere umaze igihe ufatanya na leta ya Somalia mu kurwanya al-Shabab.
Amapfa akomeje kwibasira akarere k'ihembe ry'Afurika yatumye abantu babarirwa mu bihumbi amagana bo muri Somalia bata ingo zabo barasuhuka.
Mu gihe cya vuba aha gishize, umuryango w'abibumbye (ONU/UN) waburiye ko ibiri imbere ari byo bibi cyane.
