Ba minisitiri b'intebe ba New Zealand na Finland bamaganye ikibazo 'gishingiye ku gitsina'
Ahavuye isanamu, Getty Images
Abategetsi ba New Zealand/ Nouvelle-Zélande na Finland bamaganye umunyamakuru wavuze ko bateguye inama ibahuza kuko “bari mu myaka imwe”.
Mu kiganiro n’abanyamakuru i Auckland, Sanna Marin wa Finland hamwe na Jacinda Ardern wa New Zealand bavuze ko bahuye kuko ari ba minisitiri b’intebe, atari uko bombi ari abategetsi bakiri bato kandi b’abagore.
Ardern yabajije niba abategetsi b’abagabo bashobora kubazwa ikibazo nk’icyo babajijwe.
Yagize ati: “Kuko abagore babiri bahuye ntabwo ari uko ari abagore gusa”.
Umunyamakuru w’umugabo wo kuri radio Newstalk ZB yo muri Nouvelle-Zélande yabajije impamvu y’ibiganiro byahuje aba bategetsi, agira ati: “Abantu benshi baraza kwibaza niba mwahuye kuko gusa muri mu myaka imwe kandi mukaba muhuje ibintu byinshi aho”.
Ardern yahise amuca mu ijambo avuga ko yibaza niba “hari uwaba yarigeze abaza Barack Obama na John Key niba barahuye kuko banganyaga imyaka”.
Obama wahoze ari perezida wa Amerika (2009 – 2017) na John Key wari minisitiri w’intebe wa New Zealand (2008 - 2016) bavutse mu 1961 kandi harimo ikinyuranyo cy’iminsi micye ku gihe bavukiye.
Arden w’imyaka 42, yongeyeho ati: “Twebwe, dufite abagabo benshi muri politike, ibyo ni ukuri. Kuko abagore babiri bahuye, ntabwo ari ukubera ko ari abagore gusa.”
Nyuma yavuze urutonde rw’amasezerano y’ubucuruzi hagati y’ibihugu byabo, yongeraho ati: “Inama yacu uyu munsi ni uburyo bwo kuzamura amahirwe y’ubukungu ari hagati y’ibihugu byacu.
“Ni akazi kacu kubikora, hatarebwe igitsina cyacu.”
Marin w’imyaka 37, nawe yabyemeje avuga ko bahuye “kuko turi ba minisitiri b’intebe”.
Uyu ari mu ruzinduko rwe rwa mbere muri New Zealand kandi abaye minisitiri w’intebe wa mbere wa Finland usuye iki gihugu.
Mu nama yahuje aba bategetsi, bavuze ko baganiriye ingingo zikomeye, zirimo ubukungu bwazambye ku isi no kuzamuka kw’ibiciro by’imibereho.
Jacinta Ardern yavuze ko bombi basangiye “ubushake bukomeye” bwo gufasha Ukraine kubera ko yasagariwe n’Uburusiya.
Baganiriye kandi ku myigaragambyo ivugwa muri Iran.
Marin ati: “Ntewe kandi impungenge n’uko ibintu ubu byifashe muri Iran….abagore b’intwari bari kwigaragambya ku mategeko n’umutekano w’abagore muri Iran, tugomba gukemurira hamwe ibibazo nk’ibi.”
Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya X ubutumwa
Ikibazo cy’uwo munyamakuru cyateje umwuka mubi ku mbuga nkoranyambaga.
Benshi kuri Twitter bavuze ko kibasiye abantu hashingiye ku gitsina cyabo.
Bibaye nyuma y’amezi macye Sanna Marin avuzwe mu binyamakuru ku isi nyuma y’amashusho amwerekana arimo guceza mu birori n’inshuti ze.
Abatamushyigikiye bavuga ko ntacyo yitaho, mu gihe abandi bavuga ko yibasirwa kuko ari umugore.
Icyo gihe abajijwe kuri ibyo, Jacinda Ardern yavuze ko adashaka kwivanga mu bibera imbere mu kindi gihugu, ariko yongeraho ko abanenga Marin bakabije.
