Museveni bamusanzemo Covid-19

Perezida Yoweri Museveni wa Uganda bamusanzemo Covid-19, ariko ameze neza kandi akomeje inshingano ze mu gihe arimo gufata imiti, nk’uko bivugwa n’umutegetsi mukuru muri minisiteri y’ubuzima.

Diane Atwine, umunyamabanga uhoraho muri iyo minisiteri kuwa gatatu yatangaje kuri Twitter ati: “Uyu munsi…Perezida bamusanzemo Covid-19. Ni nyuma y’uko yari yagize ibimenyetso bimeze nk’ibicurane byoroheje. Gusa ameze neza kandi akomeje imirimo ye bisanzwe”.

Atwine yakomozaga ku mabwiriza agikurikizwa, arimo nko gupima abantu ahagiye umukuru w’igihugu, mu kwirinda Covid-19.

Mbere y’ibyavuzwe na Atwine, ejo ku wa gatatu ubwo yagezaga ijambo ku nteko ishinga amategeko, Museveni w’imyaka 78, yavuze ko ashobora kuba yaranduye Covid kuko mu gitondo yumvise akabeho, bigatuma asaba ko bamupima.

Yavuze ko ibipimo bibiri muri bitatu byerekanye ko ntayo afite, ariko ategereje igisubizo cy’ikindi cya gatatu.

Yagize ati: “Ndacyekwaho corona none mpagaze hano. Niyo mpamvu mwabonye nza mu modoka itandukanye n’iya Mama”, asobanura umugore we Janet Museveni wari wamuherekeje ku nteko ishinga amategeko.

Museveni ni umwe mu bategetsi bagifata ingamba zikomeye mu kwirinda Covid, aboneka kenshi mu bandi yambaye agapfukamunwa, kandi abantu yakiriye akenshi bicara kure ye.

Ubwo Covid yari irembeje isi, Uganda iri mu bihugu byari bifite amabwiriza akarishye yo kuyirinda arimo imikwabu, gufunga amashuri n’ubucuruzi, gufunga imipaka, n’ibindi.

Iki gihugu cyongeye gufungura ibintu byose neza mu 2022.