Ni 'akaga' kuba Ubwongereza burimo gukorana n'Ubushinwa-Trump

Donald Trump yavuze ko ari akaga gakomeye kuba Ubwongereza bukorana n'u Bushinwa, mu gihe Minisitiri w'Intebe Sir Keir Starmer yakomeje uruzinduko rwe i Beijing rugamije kongera kubaka umubano mwiza hagati y'ibihugu byombi.

Perezida wa Leta Zunze Ubumwe za Amerika aha yavugaga ku masezerano agamije kongera ubucuruzi n'ishoramari hagati y'Ubwongereza n'u Bushinwa, yatangajwe nyuma y'uko Sir Keir ahuye na Perezida w'u Bushinwa Xi Jinping mu rugendo rw'iminsi itatu.

Trump yagize ati: "Nibyo, ni akaga cyane kubikora," ubwo yabazwaga icyo atekereza ku Bwongereza bwaguriye umubano wabwo mu by'ubucuruzi n'u Bushinwa, mu muhango wo kumurika filime mbarankuru ivuga ku mugore we Melania.

Mu gusubiza amagambo ya Trump, ibiro bya Minisitiri w'Intebe (Downing Street) byagaragaje ko Leta ya Washington yari isanzwe izi iby'uru rugendo n'intego zarwo mbere y'igihe.

Ibiro bya Minisitiri w'Intebe w'u Bwongereza, byongeye gutangaza ko Perezida Trump ateganya kugirira uruzinduko mu Bushinwa muri Mata (4) uyu mwaka.

Trump ntiyagize byinshi avuga ku bijyanye n'imikoranire y'u Bwongereza n'u Bushinwa, ahubwo yahise ahindukirira ku gihugu cya Canada, atanga umuburo usa n'uwo.

Yagize ati: "Ntekereza ko ari ikibazo gikomeye kurushaho kuri Canada."

Yongeyeho ati: "Canada ntabwo ihagaze neza. Imeze nabi cyane, kandi ntimushobora gufata u Bushinwa nk'ubuje gukemura ibibazo byanyu."

Trump yari aherutse no gutangaza muri iki cyumweru ko ashobora gushyiraho imisoro yisumbuye ku bicuruzwa bya Canada mu gihe icyo gihugu cyashyira mu bikorwa amasezerano y'ubukungu cyagiranye n'u Bushinwa, yakomotse ku ruzinduko ruheruka Minisitiri w'Intebe wa Canada, Mark Carney, yagiriye i Beijing.

Aya magambo aje nyuma y'uko Minisitiri w'Intebe w'u Bwongereza, Sir Keir Starmer, atangaje ko umubano w'u Bwongereza n'u Bushinwa "uhagaze neza kandi ukomeye" nyuma y'ibiganiro yagiranye na Perezida Xi Jinping ku wa kane.

Sir Keir yavuze ko ibiganiro yagiranye na Xi "byagenze neza cyane" kandi ko byatanze "urwego rw'imikoranire twari twiteze."

Yabwiye inama y'ihuriro ry'abacuruzi b'u Bwongereza n'u Bushinwa (UK-China Business Forum) yabereye kuri Banki y'u Bushinwa i Beijing ati: "Twagiranye ibiganiro byiza kandi byuzuye ubushuti. Mu by'ukuri twateye intambwe ifatika, kuko u Bwongereza bufite byinshi cyane byo gutanga."

Mu byamaze kuva muri uru ruzinduko rwa Sir Keir harimo amasezerano yo koroshya ingendo nta visa hagati y'ibihugu byombi, kugabanya imisoro ku nzoga za whisky, ndetse n'ishoramari rya miliyari £10.9 rya sosiyete AstraZeneca rigamije kubaka inganda zo gukora imiti mu Bushinwa.

Hatangajwe kandi amasezerano y'ubufatanye mu bindi byiciro, birimo kurwanya ibyaha by'ubugizi bwa nabi byateguwe (organised crime) ndetse n'ikibazo cy'abimukira binjira muri ibi bihugu mu buryo bunyuranyije n'amategeko.

Perezida w'Urugaga rw'Ubucuruzi rw'Abongereza mu Bushinwa (British Chamber of Commerce in China), Chris Torrens, yashimye urugendo Sir Keir yagiriye i Beijing anavuga ko rwagenze neza.

Torrens yabwiye BBC ko byumvikana ko u Bwongereza bwakomeza kureba ku Bushinwa, kuko ari umwe mu bafatanyabikorwa bakomeye mu bucuruzi.

Yongeyeho ko abandi bayobozi bo mu bihugu by'Uburengerazuba bamaze kujya i Beijing vuba aha cyangwa se biteganyijwe ko bazajyayo mu gihe cya vuba, harimo na Trump utegerejwe kuhagirira uruzinduko muri Mata.

Ati: "Amerika ishobora kuba iri gufatira ibihano cyangwa kunenga izindi nzego z'ubukungu no gushyiraho imisoro ku bihugu bikorana n'Ubushinwa, ariko yo ubwayo ishobora kugirana amasezerano n'Ubushinwa. Mu by'ukuri, twiteze ko bizaba muri uyu mwaka."

Sir Keir yari ateganyijwe gushika i Shanghai, ari na ho azarangiriza urugendo rwe arimo kugirira mu Bushinwa, mbere yo gukomeza i Tokyo guhura na mugenzi we w'Ubuyapani, Sanae Takaichi, mu musangiro w'akazi wo ku mugoroba.

Abadepite bo mu ishyaka ritavuga rumwe n'ubutegetsi banenze Sir Keir ku bijyanye n'urugendo yagiriye mu Bushinwa, ari na rwo rwa mbere umuyobozi w'u Bwongereza agiyeyo kuva mu mwaka wa 2018.

Ushinzwe umutekano w'imbere mu gihugu mu ishyaka ritavuga rumwe n'ubutegetsi (Shadow Home Secretary), Chris Philp, yavuze ko Sir Keir "yagiye i Beijing yunamira Perezida Xi", anashinja guverinoma kugurana umutekano w'igihugu ku nyungu nto z'ubukungu zitangwa n'Ubushinwa.

Nk'uko bitangazwa n'Urwego rw'u Bwongereza rushinzwe Ubucuruzi n'Iterambere (Department for Business and Trade), Amerika ni yo yari umufatanyabikorwa wa mbere w'u Bwongereza mu bucuruzi mu mwaka wa 2025, mu gihe Ubushinwa bwari ku mwanya wa kane.