Umugore yafunzwe kubera gufata ibinini byo gukuramo inda igihe cyararenze

Umugore wo mu Bwongereza ufite abana batatu yakatiwe gufungwa imyaka irenga ibiri kubera gukuramo inda yarengeje igihe cyemewe n'amategeko cyo kuyikuramo.

Carla Foster, w'imyaka 44, yabonye imiti yo kumufasha gukuramo inda nyuma yuko yisuzumishije mu buryo bw'iyakure, aho atavugishije ukuri ku gihe yari amaze atwite.

Uburyo bw'"ibinini binyuze ku iposita", bwatangijwe mu gihe cya guma mu rugo ubwo hari hari icyorezo cya Covid, bufasha gukuramo inda y'igihe kigera ku byumweru 10, igakurirwamo mu rugo.

Ariko urukiko rwa Stoke-on-Trent Crown Court rwumvise ko uwo mugore yari amaze ibyumweru biri hagati ya 32 na 34 atwite ubwo yafataga ibyo binini.

Gukuramo inda biremewe mu Bwongereza ku nda imaze ibyumweru bigera kuri 24. Ariko nyuma y'ibyumweru 10, kuyikuramo bikorerwa ku ivuriro.

Abashinjacyaha baburanye bavuga ko Foster yari yatanze amakuru atari ukuri abizi ko inda ye irengeje igihe cyemewe n'amategeko, ndetse ko yashakishije ku rubuga rwa internet amakuru bavuze ko agaragaza "itegurwa mu bwitonzi" ry'icyo gikorwa.

Urukiko rwumvise ko hagati y'ukwezi kwa Gashyantare (2) n'ukwezi kwa Gicurasi (5) mu 2020, yashakishije kuri internet "uburyo bwo guhisha inda", "uburyo bwo gukuramo inda utagiye kwa muganga" n'"uburyo bwo gutakaza umwana ku mezi atandatu".

Hashingiwe ku makuru yahaye ikigo cy'Ubwongereza cy'ubujyanama ku gutwita (British Pregnancy Advisory Service, BPAS), yohererejwe ibyo binini kuko byagereranywaga ko yari amaze ibyumweru birindwi atwite.

Uruhande rumwunganira rwaburanye ruvuga ko guma mu rugo no kugabanya guhura na muganga imbona nkubone byahinduye uburyo bwo kubona ubuvuzi, ko rero yagombaga gushakisha amakuru ku rubuga rwa internet.

Maître Barry White yagize ati: "Uregwa birashoboka cyane ko yari kuba yarakoresheje serivisi iyo ziza kuba zari ziriho icyo gihe. Ibi bizamuhoramo [azahora abyibuka] igihe cyose".

Ku itariki ya 11 Gicurasi mu 2020, amaze gufata ibinini byo gukuramo inda, yahamagaye kuri telefone saa kumi n'ebyiri n'iminota 39 z'umugoroba (18:39 BST) ku isaha yaho, asaba ubufasha bwihuse, avuga ko ari ku bise.

Umwana yavutse adahumeka ubwo yari ari kuri telefone ahamagara, ndetse yemezwa ko yapfuye hashize iminota hafi 45.

Isuzuma rya muganga ryo kumenya icyishe uwo mwana w'umukobwa rivuga ko impamvu yateje urupfu rwe ari ukuvuka apfuye no kuba nyina yarakoresheje imiti yo gukuramo inda ndetse ko bigereranywa ko yari amaze ibyumweru biri hagati ya 32 na 34 atwite.

Foster, w'i Staffordshire rwagati mu Bwongereza, yari asanzwe afite abana batatu b'abahungu mbere yuko yongera gutwita mu 2019.

Urukiko rwumvise ko mu ntangiriro ya guma mu rugo yari yarasubiranye n'umukunzi (umugabo) we ubu batakibana, icyo gihe akaba yari atwite inda y'undi mugabo.

Umucamanza yemeye ko yari afite "agahinda kenshi kamushengura umutima" kuko yashakaga guhisha iyo nda.

Mbere, Foster yari yarezwe gushwanyaguza umwana, ikirego yahakanye.

Nyuma yemeye ikirego cyo gusimbura icyo, giteganywa mu gice cya 58 cyo mu itegeko ryo mu 1861 rihana ibyaha bikorewe umuntu, gutanga imiti cyangwa gukoresha ibikoresho mu gukuramo inda, ubushinjacyaha bwemeye icyo kirego.

Ibarurwa isaba imbabazi 'ntikwiye'

Mu kumukatira igihano, umucamanza Edward Pepperall yavuze ko ari urubanza "rubabaje cyane". Umucamanza yongeyeho ko iyo aza kwemera icyaha mbere yari gutekereza ku kuba ahagaritse igifungo yamukatiye ntahite ajya muri gereza kugikora.

Umucamanza yavuze ko uregwa "yashegeshwe n'icyaha" kandi ko yagize agahinda gakabije ndetse ko uregwa yavuze ko ari umubyeyi mwiza w'abana batatu, umwe muri bo akaba acyenera ubufasha bwihariye, kandi ko gufungwa kwe byagira ingaruka kuri uwo mwana.

Uwo mugore yakatiwe igifungo cy'amezi 28, amezi 14 muri ayo azayamara muri gereza naho ayandi asigaye ayamare adafunze ariko hari ibyo agomba gukurikiza.

Mbere y'isomwa ry'urwo rubanza ku wa mbere, ibaruwa yashyizweho umukono n'imiryango imwe irengera ubuzima bw'abagore yohererejwe urukiko isaba ko ahabwa igihano kitarimo gufungwa.

Ariko umucamanza yavuze ko "bidakwiye" kandi ko inshingano ye ari "ugushyira mu bikorwa amategeko nkuko ateganywa n'Inteko Ishingamategeko".

Yabwiye uregwa ko abanditse iyo baruwa "bahangayikishijwe no kuba gufungwa kwawe gushobora guca intege abandi bagore mu kugera kuri serivisi zo mu buryo bw'iyakure z'imiti yo gukuramo inda no guca intege abandi bagore batwite inda nkuru [ziri hafi kuvuka] ntibasabe ubuvuzi cyangwa ntibisanzure kandi ngo babwize ukuri abaganga".

Ariko yavuze ko na we afite "ubushobozi bwo kwirengagiza iby'abashyigikiye ko gukuramo inda bigera kuri benshi kurushaho kandi ibyo, uko mbibona, nsanga bidakwiye nkuko bidakwiye ku mucamanza kwakira ibaruwa y'umwe mu miryango iharanira ko hashyirwaho amategeko arushaho kubuza gukuramo inda".

'Itegeko rishaje cyane'

Icyo gihano uwo mugore yakatiwe cyateje uburakari bwinshi mu miryango iharanira uburenganzira bw'abagore hamwe no mu mpirimbanyi zibuharanira.

Ikigo BPAS, cya kindi cyo mu Bwongereza gitanga ubujyanama ku gutwita, cyavuze ko "cyumijwe kandi kibabajwe" n'igihano uwo mugore yakatiwe. Cyavuze ko icyo gihano gishingiye ku "itegeko rishaje cyane".

Clare Murphy, umuyobozi w'ikigo BPAS, yagize ati: "Nta wundi mugore ushobora kongera kunyura muri ibi.

"Mu myaka itatu ishize, habayeho kwiyongera kw'umubare w'abagore n'abakobwa bagira ihungabana ritewe n'amaperereza maremare ya polisi no gushyirwaho inkeke y'igifungo kigera ku cya burundu hashingiwe ku itegeko rishaje cyane rihana gukuramo inda.

"Abagore b'intege nke [baba] bari mu bihe bya mbere bigoye cyane udashobora kwibaza bakwiye ibirenze ibi mu bucamanza bwacu".

Clare yongeyeho ko abadepite bagomba gutanga uburyo bwo kubarinda kugira ngo "ntihagire abandi bagore bari muri ibi bihe byo kwiheba bongera gukangishwa gufungwa".

Hagati aho, Depite Stella Creasy, wo mu ishyaka rya Labour ritavuga rumwe n'ubutegetsi mu Bwongereza, yasabye ko hakorwa "ivugurura ryihutirwa".

Mu butumwa bwo kuri Twitter, yagize ati: "Muri rusange igifungo ku muntu wakoze icyaha cy'urugomo mu Bwongereza ni amezi 18.

"Umugore wakuyemo inda adakurikije uburyo bwemewe [ubu] amaze gukatirwa gufungwa amezi 28 hashingiwe ku itegeko ryo mu 1868 - ducyeneye ivugurura ryihutirwa kugira ngo kubigeraho [kugera ku gukuramo inda] mu mutekano ku bagore bose bo mu Bwongereza bibe uburenganzira bwa muntu".

Urwego rw'ubushinjacyaha rwagize ruti: "Izi manza z'imbonekarimwe cyane ni urusobe kandi zitera ihungabana.

"Abashinjacyaha bacu bafite inshingano yo gutuma amategeko yashyizweho n'Inteko Ishingamategeko atekerezwaho neza kandi agashyirwa mu bikorwa mu gihe hafatwa ibyemezo bigoye".

Ubwo yari abajijwe niba minisitiri w'intebe yizera ko guhana gukuramo inda igejeje mu bihe bimwe na bimwe ari uburyo bukwiye, umuvugizi wa Rishi Sunak yavuze ko amategeko ariho ubu afata impu zombi (ari hagati na hagati).

Yagize ati: "Amategeko yacu uko ameze ubu afata impuzu zombi ku burenganzira bw'umugore bwo gukuramo inda mu mutekano kandi bwemewe n'amategeko no ku burenganzira bw'umwana utaravuka.

"Nta gahunda nzi iriho yo guhindura ubwo buryo".