DR Congo n'u Rwanda bageze ku masezerano y'ibanze y'amahoro azasinywa mu cyumweru gitaha
Ahavuye isanamu, @US_SrAdvisorAF
Ibiro bishinzwe ububanyi n'amahanga bya Leta Zunze Ubumwe za Amerika byatangaje ko u Rwanda na DR Congo byumvikanye ku nyandiko y'ibanze y'amasezerano y'amahoro nyuma y'iminsi itatu y'ibiganiro by'inzobere z'impande zombi.
Massad Boulos, umujyanama mukuru wa Perezida Trump kuri Afurika, yatangaje ku rubuga X ko atewe ishema no kuba yarahagarariye ibyo biganiro byagejeje ku kumvikana kw'impande zombi.
Boulos yavuze ko mu cyumweru gitaha "twiteze kwakira ba Minisitiri b'Ububanyi n'amanga [ba DRC n'u Rwanda] kugira ngo basinye ayo masezerano tariki 27 Kamena bihagarariwe na Marco Rubio", uyu ni Minisitiri w'ububanyi n'amahanga wa Amerika.
Byitezwe ko nyuma y'aho abakuru b'ibihugu bya DR Congo n'u Rwanda bazasinya ayo masezerano y'amahoro mbere y'uko atangira gushyirwa mu bikorwa.
Ni ibiki bigize ayo masezerano yagezweho?
Ububanyi n'amahanga bwa Amerika bwatangaje gusa imirongo migari igize ayo masezerano y'ibanze, ibirambuye biyarimo ntabwo biramenyekana neza.
Ntibizwi kugeza ubu ibiteganywa n'aya masezerano ku mutwe wa M23, niba uzarekura ibice ugenzura – ibyo wakunze guhakana – cyangwa na wo uzagera ku masezerano ya wo na leta ya Kinshasa ku rundi ruhande mu biganiro by'i Doha muri Qatar.
Itangazo ry'ibiro by'ububanyi n'amahanga bwa Amerika rivuga ko amasezerano yagezweho hagati y'u Rwanda na DRC yubakiye ku itangazo ry'amahame yumvikanyweho n'impande zombi mu kwezi kwa Mata (4), kandi areba inyungu za politike, iz'umutekano n'iz'ubukungu z'impande zombi.
Zimwe mu ngingo zigize ayo masezerano yumvikanyweho zirimo;
- Kubaha ubusugire bw'imipaka
- Kubuza imirwano
- Guhagarika/kuvana [ingabo] mu bikorwa
- Kwambura intwaro
- Kwakira imitwe [yitwara gisirikare] itari iya leta habanje kugira ibisabwa
- Gushyiraho uburyo buhuriweho bwo kugenzura umutekano
- Gufasha gucyura impunzi n'abavuye mu byabo imbere mu gihugu
Ahavuye isanamu, @UnderSecStateP
Leta ya Kinshasa, ONU, n'ibihugu bimwe by'iburengerazuba nka Leta Zunze Ubumwe za Amerika bashinja leta y'u Rwanda gufasha umutwe wa M23 ubu ugenzura ibice bitandukanye mu ntara za Kivu y'Epfo na Kivu ya Ruguru, ibyo u Rwanda ruhakana.
Kinshasa yakomeje gusaba ko u Rwanda rugomba kuvana ingabo zarwo muri DR Congo kugira ngo bagere ku masezerano y'amahoro.
Leta y'u Rwanda, ONU na bimwe mu bihugu by'iburengerazuba na bo bashinja Kinshasa gukorana n'umutwe wa FDLR urwanya u Rwanda, ibyo Kinshasa na yo ihakana.
Mu kwezi gushize muri uyu muhate wo guhuza ibihugu byombi, Amerika yavuze ko impungenge za buri ruhande – Kinshasa isaba kuvana ingabo z'u Rwanda muri DR Congo, Kigali isaba gusenya umutwe wa FDLR – zigomba kurebwaho no kubahirizwa muri ayo masezerano y'amahoro.
Washington kandi yavuze ko izi mpande zombi nizigera ku masezerano y'amahoro azakurikirwa n'ishoramari rya miliyari z'amadorari za kompanyi z'Abanyamerika mu bucukuzi n'ubucuruzi bw'amabuye y'agaciro muri DR Congo n'u Rwanda.
Abategetsi ba Amerika bavuze ko leta ya Qatar yitabiriye ibiganiro byagejeje kuri aya masezerano y'ibanze yagezweho "kugira ngo bijyane n'imihate y'ibihugu byombi" [Qatar na Amerika] y'ibiganiro bigamije kugera ku mahoro.
Ibiro bishinzwe ububanyi n'amahanga bwa Amerika bivuga ko uruhande rwa DR Congo n'u Rwanda byishimiye "umusanzu n'imihate ya Leta Zunze Ubumwe za Amerika na Qatar nk'abafatanyabikorwa mu kubona igisubizo mu mahoro".
