Padiri Romanelli ari mu bakomeretse mu gitero cya Israel cyishe abantu kuri kiliziya imwe gusa iba muri Gaza

Minisitiri w'intebe wa Israel Benjamin Netanyahu yavuze ko igihugu cye "cyicuza cyane ku gitero cyayobye" cyakubise inyubako imwe gusa ya kiliziya iri muri Gaza hagapfira abantu batatu mu bahahungiye. Vatican yavuze ko muri benshi bakomeretse harimo Padiri Gabriel Romanelli w'iyi kiliziya.

Mu itangazo, Netanyahu yagize ati: "Buri buzima bw'inzirakarengane butakaye biba ari icyago. Twihanganishije imiryango [yabuze abayo] n'ab'ukwemera".

Iki gitero cyabaye ku wa kane ubwo ingabo za Israel zarasaga kuri kiliziya y'Umuryango Mutagatifu muri Gaza.

Abantu bakomeretse barimo na padiri w'iyi kiliziya Gabriel Romanelli, nk'uko bivugwa na Kiliziya ya Yeruzalemu ari na yo ireberera iyi imwe iba muri Gaza.

Vatican ivuga ko Romanelli "yakomeretse gato", mu gihe izindi nkomere zirimo abamerewe nabi.

Papa Léon wa 14 yatangaje ko "ababajwe cyane no kumenya iki gitero cyishe kikanakomeretsa abantu", yongera gusaba ko muri Gaza haba agahenge.

Padiri Romanelli ukomoka muri Argentine yamenyekanye cyane kubera uko yavuganaga hafi buri munsi kuri telephone n'uwari Papa Francis ubwo iyi ntambara yatangiraga.

Papa Francis yashimaga umuhate wa Romanelli nk'umupadiri gatolika wenyine wari muri Gaza icyo gihe.

Mu itangazo, Netanyahu yavuze ko Israel "irimo gukora iperereza ku byabaye kandi ikomeje ubushake bwayo bwo kurinda abaturage n'ahantu hatagatifu".

Igisirikare cya Israel, IDF, cyo cyatangaje ko iperereza ry'ibanze ryerekana ko ibice by'igisasu cyarashwe muri ako gace ari byo byaguye kuri iyo kiliziya y'Umuryango Mutagatifu muri Gaza.

Karoline Leavitt, umuvugizi w'ibiro bya perezida wa Amerika yavuze ko Perezida Donald Trump atishimiye iki gitero kuri kiliziya muri Gaza.

Karoline avuga ko Trump yahamagaye na Netanyahu ngo amubaze kuri iki gitero.

Giorgia Meloni, Minisitiri w'intebe w'Ubutaliyani, yamaganye Israel kuri iki gitero avuga ko "ibitero Israel imaze amezi ikora ku baturage b'abasivile bitakwihanganirwa".

Umubare utazwi neza w'abantu bahungiye kuri iyi kiliziya bizeye ko hatekanye, ni ho bamaze igihe baba nk'uko kiliziya y'i Yeruzalemu ibyemeza. Ivuga ko muri bo hari benshi bakomeretse.

Ku wa kane, abandi bantu barenga 20 muri Gaza barishwe mu biterobitandukanye bya Israel mu tundi duce twa Gaza.

Ku mibare itangwa na minisiteri y'ubuzima ya Hamas hamwe na leta ya Israel, abantu bose hamwe barenga 60,000 (Abanyepalestine 58,313 n'abanya-Israel 1,983) bamaze kwicwa muri iyi ntambara yatangiye tariki 7 Ukwakira 2023, ubu yahinduye igice kinini cya Gaza umuyonga.

Israel yateye Gaza ivuga ko ije kwihimura ku gitero cya Hamas imbere muri Israel, kandi ko igamije kurandura umutwe wa Hamas.