Umunyamakuru w'Umurusiya yagurishije umudali we wa Nobel ngo afashe abahunze muri Ukraine

Umwanditsi mukuru w'Umurusiya w'ikinyamakuru cyigenga Novaya Gazeta yagurishije muri cyamunara umudali we w'igihembo cy'amahoro cyitiriwe Nobel kuri miliyoni 103.5 z'amadolari y'Amerika (miliyari 105 uyavunje mu mafaranga y'u Rwanda).

Dmitry Muratov yavuze ko ayo mafaranga yose azajya mu gufasha impunzi zahunze intambara Uburusiya bwagabye muri Ukraine.

Muratov ni umwe mu banyamakuru babiri bahembwe mu 2021 igihembo cy'amahoro cyitiriwe Nobel kubera kurwanirira ubwisanzure no gutanga ibitekerezo mu bwisanzure mu Burusiya.

Ikinyamakuru Novaya Gazeta cyahagaritse ibikorwa byacyo mu kwezi kwa gatatu uyu mwaka, nyuma yuko Uburusiya buteye Ukraine mu kwezi kwa kabiri.

Cyahagaritse ibikorwa nyuma yuko Uburusiya buvuze ko umuntu uwo ari we wese uzavuga ko ibikorwa byabwo muri Ukraine ari "intambara" azacibwa amande menshi cyangwa agafungirwa ibikorwa.

Uburusiya buvuga ko intambara yo muri Ukraine ari "igikorwa cyihariye cya gisirikare".

Inzu ikoresha cyamunara ya Heritage Auctions, yagurishije uwo mudali, ntiyahishuye uwawuguze.

Mu kwezi kwa kane, Muratov yagabweho igitero cy'irangiry'ibara ritukura ririmo ikinyabutabire cya acetone, ubwo yari muri gariyamoshi mu Burusiya.

Umugabo wamugabyeho icyo gitero yateye hejuru agira ati: "Muratov, ibi ni ku bw'abahungu bacu".

Yari umwe mu itsinda ry’abanyamakuru bashinze ikinyamakuru Novaya Gazeta mu mwaka wa 1993 nyuma y’isenyuka ry’ubwari Ubumwe bw’Abasoviyeti.

Kuva mu mwaka wa 2000, abanyamakuru batandatu bo muri icyo kinyamakuru hamwe n’abakorana na cyo barishwe mu bwicanyi bufitanye isano n’akazi kabo, barimo n’umunyamakuru Anna Politkovskaya wakoraga inkuru zicukumbuye.

Igurishwa mu cyamunara ry'uwo mudali wo muri zahabu ryabereye i New York, rizafasha ibikorwa by'ubugiraneza by'ishami ry'umuryango w'abibumbye ryita ku bana (UNICEF) byo gufasha abana bahunze bo muri Ukraine, nkuko bikubiye mu itangazo ry'inzu ya cyamunara Heritage Auctions.

Muri videwo yatangajwe na Heritage Auctions, Muratov yagize ati: "Ubutumwa bw'ingenzi cyane ku bantu uyu munsi ni ugusobanukirwa ko hari intambara irimo kuba kandi ko ducyeneye gufasha abantu barimo kugirwaho ingaruka cyane kurusha abandi".

Mu mwaka ushize, yatsindiye igihembo cy'amahoro cyitiriwe Nobel hamwe n'umunyamakuru Maria Ressa uri mu bashinze urubuga rw'amakuru Rappler rwo muri Philippines.

Ressa na Muratov bombi bazwiho gutangaza inkuru zicukumbuye zarakaje abategetsi b'ibihugu byabo, ndetse bahindutse ikimenyetso cy'urugamba rwo guharanira ubwisanzure bw'itangazamakuru.